Read cisena KUBULUKA 26 Bible Online

KUBULUKA 26 - cisena bible

KUBULUKA 26

¹“Sasanya Chikhumbi cha Mulungu na mapindi khumi a chinguwo chakufewa chakulukwa mwaluso na usalu wachoza, msuzi wanyemba na wakufira, pontho uchiluke mwakuthemesera pabodzi pene na pyakulengwa pyakukhala na maphaphido.

²Mapindi onsene akhale sasawa, ulaphiache makhono khumi na mawiri, pontho umimbache makhono mawiri.[27]

³Sonera mapindi mashanu pabodzi pene kukhala chinguwo chibodzi chikulu, pontho uchite chibodzi-bodzi na mapindi mashanu anangowo.

⁴Sasanya magango na nguwo yachoza mbuaikhe m'khundu mwa phindi yakumalisa ya chinguwo chibodzi chikulu, pontho chita chibodzi-bodzi kuna chinguwo chinango chikulucho.

⁵Magangowo athema kukhala makumashanu paphindi yakutoma ya chinguwo chibodzi chikulu, pontho magango makumashanu paphindi yakumalisa ya chinguwo chinango chikulucho, towera magangowo ayang'anisane.

⁶Sasanya ngoloweko zagolidi makumashanu zakuphatanizira nazo nguwo ziwiri zikulu zile, towera Chikhumbi cha Mulungu chikhale chibodzi chamumphu.

⁷“Sasanya chinguwo chakuphimba nacho Chikhumbicho kubulukira pa mapindi khumi na ibodzi a nguwo yakusasanywa na ubweya wa mbuzi.

⁸Pyonsenepyo thungache ikhale sasawa, ulaphiache makhono khumi na atatu, pontho umimbache makhono mawiri.[28]

⁹Sonera mapindi onsene mashanu pabodzi kukhala chinguwo chibodzi chikulu, pontho mapindi anango atanthatu asonerwe kukhalambo chinguwo chibodzi chikulu. Funya kawiri phindi yachitanthatu, ile ikhali kunkhope kwa Chikhumbi.

¹⁰Ikha magango makumashanu m'khundu mwa phindi yakumalisa ya chinguwo chibodzi chikulu, pontho chita chibodzi-bodzi kuna chinguwo chinango chikulucho.

¹¹Sasanya ngoloweko zankuwa makumashanu mbauziikhe m'magango, towera ziphatanize nguwo ziwiri zikulu zile kukhala chinguwo chibodzi chamumphu.

¹²Leka kati na kati ya phindi yakusalira kulemberera pyayo kunduli kwa Chikhumbi.

¹³Mapindi anango ulaphiache wakukwana kati ya khono[29] akusalirawo kukhundu yonsene ya ulaphi wa chinguwo chikulu athema kulemberera pyayo kukhundu ya Chikhumbicho.

¹⁴“Sasanya pyakuphimba napyo pinango piwiri, chibodzi chakusasanywa na nthembe za mabira amuna zakuikhwa tinta yakufira, chinango chikhale chakusasanywa na nthembe zakufewa kukhala chakuphimba nacho chakunja.

¹⁵“Matabwa akuimirisa Chikhumbicho akhale akesha.

¹⁶Thabwa yonsene ikhale makhono manayi ulaphiache, pontho umimbache ukhale wakulapha kufika ntchafu.[30]

¹⁷Pathabwa yonsene sasanya mitsomeko miwiri kumakhundu mawiri a thabwa, towera matabwa akwanise kuphatanizwa.

¹⁸Sasanya matabwa makumawiri a kukhundu yakumwera,

¹⁹pontho mathako makumanayi a siliva kupita pansi pa matabwawo, mathako mawiri pathabwa ibodzi pansi pa mitsomeko miwiri.

²⁰Sasanya matabwa makumawiri a kukhundu yakumpoto ya Chikhumbi,

²¹na mathako asiliva makumanayi, mawiri pansi pa thabwa ibodzi.

²²Sasanya matabwa matanthatu kunduli kwa Chikhumbi, kumadokero dzuwa kwache,

²³pontho matabwa mawiri a m'nkhomo.

²⁴Matabwa a m'nkhomozi athema kuphatanizwa kubulukira pansi mpakana padzulu. Matabwa mawiri asasanya m'nkhomo ziwiri ale athema kusasanywa ninga tenepa.

²⁵Tenepo panakhala matabwa masere akukhala na mathako asiliva khumi na atanthatu, awiri pansi pa thabwa ibodzi.

²⁶“Sasanya mitandaliko khumi na mishanu yakesha, mishanu ya matabwa kukhundu ibodzi ya Chikhumbi,

²⁷mishanu ya matabwa a kukhundu yakumadokero dzuwa, kunduli kwa Chikhumbi.

²⁸Mitandaliko ya pakati pa phembo ya matabwa ifike kubulukira kukhundu ibodzi mpakana khundu inango ya Chikhumbi.

²⁹Kukutiza matabwawo na golidi mbuikhemo m'mphete zagolidi kuphatisa mitandaliko, ile pontho yathema kukukutizwa na golidi.

³⁰Sasanya Chikhumbi kuteweza na mudakuonesera ine mule paphiri pale.

³¹“Sasanya chinguwo chakufewa chakulukwa mwaluso na usalu wachoza, msuzi wanyemba na wakufira. Uchiluke mwakuchithemesera pabodzi pene na pyakulengwa pyakukhala na maphaphido.

³²Chimanike pamizati minayi ya matabwa akesha akukukutizwa na golidi, pontho akukhala na ngoloweko mbachiikhwa pamatfako manayi asiliva.

³³Ikha chinguwocho mumzera pansi pa ngoloweko makumashanu kunsoyi m'bwalo mwa Chikhumbi, pontho kunduli kwa chinguwocho ikhako Bokosi ya Chiverano yakukhala na pyakulemberapo piwiri pyamiyala. Chinguwocho chinasiyanisa Mbuto Yakuchena na Mbuto Yakuchenesesa.

³⁴Ikha mphampha pa Bokosi ya Chiverano.

³⁵Kunja kwa Mbuto Yakuchenesesa ikhako thebulu kutsamiza kufufu yakumpoto ya Chikhumbicho, pontho chakuikhirapo nyale kutsamiza kufufu yakumwera.

³⁶“Sasanya chinguwo chakufewa chakulukwa mwaluso na usalu wachoza, msuzi wanyemba na wakufira chakuthemeserwa mwadidi kuti chikhale pamsuwo wa Chikhumbi.

³⁷Sasanya mizati mishanu yakesha yakukukutizwa na golidi, pontho yakuikhwa ngoloweko zagolidi kuphatisa chinguwocho. Sasanya mathako mashanu ankuwa, towera aikhwe pansi pa mizatiyo.