Read cisena KUBULUKA 27 Bible Online

KUBULUKA 27 - cisena bible

KUBULUKA 27

¹“Sasanya guwa yansembe na matabwa akesha. Nkhomo zache zikhale zonsene sasawa, ulaphiache ukhale makhono mawiri na kati ya khono, umimbache ukhale makhono mawiri na kati ya khono, pontho chengo chache[31] chikhale khono ibodzi na kati ya khono.

²Sasanya nyanga padzulu pa nkhomo zinayi. Pyonsene na guwayo pikhale phindi ibodzi, pontho yonseneyo ikukutizwe na nkuwa.

³Sasanya supulia wakugweramo dotha, mafosholo, ndilo, pyakujobolera nyama na chiwaya chakugasirapo moto. Pinthu pyonsenepi pisasanywe na nkuwa.

⁴Sasanya waya wa mangalade ankuwa mbuikhe mphete zinayi zakuthukulira nazo zankuwa m'nkhomo zache.

⁵Ikha mangalade pansi pa magulupiya a guwa yansembe, towera abwerere pakati m'bwalo mwa guwayo.

⁶Sasanya miti yakuithukulira yakesha mbuikukutize na nkuwa,

⁷mbuziikhe m'mphete kukhundu ziwiri zonsene za guwa ingathukulwa.

⁸Sasanya guwayo na mapembo a matabwa mbusiye benga m'bwalo, kuteweza na mudakuonesera ine paphiri pale.

⁹“Sasanya mpanda wa Chikhumbi cha Mulungu na chinguwo chakufewa. Kukhundu yakumwera chinguwocho chikhale ulaphiache makhono makumanayi na manayi,[32]

¹⁰chakuphatiswa na mizati makumawiri yankuwa m'mathako makumawiri ankuwa, na ngoloweko pontho na mitandaliko pyasiliva.

¹¹Pyontho-pyonthopyo pyathema kuchitwa kukhundu yakumpoto ya mpandawo.

¹²Kukhundu yakumadokero dzuwa kwathema kukhala chinguwo chakulapha makhono makumawiri na mawiri,[33] chakukhala na mizati khumi, pontho na mathako khumi.

¹³Kukhundu yakumabulukiro dzuwa kuna msuwo kule, mpandawo wathema kukhala makhono makumawiri na mawiri.

¹⁴Kukhundu yonsene ya msuwo kwathema kukhala makhono matanthatu na kati ya khono a nguwo,[34] akukhala na mizati mitatu, pontho na mathako matatu.

¹⁶Chinguwo chakufewa chakufunga nacho pamsuwo chathema kukhala makhono mafemba ulaphiache[35] chakulukwa na usalu wachoza, msuzi wanyemba na wakufira, pontho wakuthemesera mwadidi. Chathema kuphatiswa na mizati minayi m'mathako manayi.

¹⁷Mizati yonsene ya mpanda yathema kuphatanizwa na mitandaliko yasiliva, pontho ngoloweko zathema kukhala zasiliva, mathako awo mbakhala ankuwa.

¹⁸Mpanda wakuzungulira Chikhumbi wathema kukhala ulaphiache makhono makumanayi na manayi, umimbache makhono makumawiri na mawiri, pontho chengo chache[36] makhono mawiri na kati ya khono. Chinguwo chathema kukhala chakufewa mbachikhala na mathako ankuwa.

¹⁹Pinthu pyonsene pyakuphatisirwa basa m'Chikhumbi, pontho na ntchiri zonsene zakuphatisa nkhambala za Chikhumbi na mpandache ene pyathema kukhala pyankuwa.

²⁰“Panga Aisraele kukudzesera mafuta aolivi adidiletu, towera aphatiswe basa m'nyale kuti ikwanise kugaswa mawulo onsene.

²¹Aroni na anache achimuna athema kuikha nyale m'Chikhumbi cha Mulungu kunja kwa chinguwo chakutchinga nacho Bokosi ya Chiverano. Mwenemo pamaso panga yathema kugaka kubulukira mawulo mpakana machibese. Matongero enewa athema kukoyiwa na Aisraele na pidzukulu pyawo kwenda na kwenda.