Read cisena KUBULUKA 28 Bible Online

KUBULUKA 28 - cisena bible

KUBULUKA 28

¹“Chemeresa mbaleako Aroni na anache achimuna, Nadabu, Abihu, Eleazara na Itamara. Apambule pakati pa Aisraele, towera akwanise kundiphatira basa ya unyansembe.

²Sasanyira mbaleako, Aroni, nguwo za unyansembe, towera akhale wachilemedzo, pontho wakubalika.

³Chemera anyabasa onsene, ale apasa ine nzeru pabasa yeneyi, pontho uapange kuti asasanyire Aroni nguwo, towera akhale nyansembe wakupambulika wakundiphatira basa.

⁴Uapange kuti asasanye chapagangafuwa, efodi, mkhanjo, mayala akuthemeserwa mwadidi, nduwira na mthimbalimba. Iwo athema kusasanyira mbaleako, Aroni, na anache achimuna, towera iwo akwanise kundiphatira basa ninga anyansembe.

⁵Anyaluso athema phatisa basa usalu wachoza, msuzi wanyemba na wakufira, usalu wagolidi na nguwo yakufewa.

⁶“Iwo athema kusasanya efodi na usalu wachoza, msuzi wanyemba na wakufira, usalu wagolidi, pontho na nguwo yakufewa yakuthemeserwa mwadidi.

⁷Nthambi ziwiri za m'mapewa, zile zinakwanisa kumangisa efodi, zathema kusonerwa m'khundu mwache.

⁸Bande yakufewa yakusasanywa na pinthu pyontho-pyonthopyo yathema kusonerwa ku efodi, towera bande na efodi pikhale phindi ibodzi.

⁹Kwata miyala miwiri ya onikisi ulembepo madzina khumi na mawiri a ana achimuna a Yakobo,

¹⁰nyandandanda kutoma na wautombo kufikirana chimalisira bele, ulembe madzina matanthatu pamwala ubodzi, matanthatumbo pamwala unangowo.

¹¹Kwata nyaluso pakusasanya pidindo kuti alembe madzina a ana achimuna a Yakobo pamiyala miwiriyi mbamuikhemo m'pyakuikhiramo pyagolidi.

¹²Piikhe nthambo za m'mapewa za efodi kuimirira madzinza khumi na awiri a Israele. Penepa Aroni anakwata madzinawo pamapewa pache, towera chikhale chikumbuso pamaso pa ine, MBUYA.

¹³Sasanya pyakuthemesera piwiri pyagolidi pyakuoneka ninga kaluwa,

¹⁴pontho na njema ziwiri zagolidi chadi-chadi zakupotwa ninga nkhambala mbaziphatanizwa na pyakuthemeserapi.

¹⁵“Sasanyira Nyansembe Wamkulu chapagangafuwa pache chakudziwisa pinafuna Mulungu. Icho chathema kusasanywa na pinthu pyontho-pyonthopyo sasawa ninga efodi, pontho na pyakuthemesera pyache.

¹⁶Chathema kukhala nkhomo zache zonsene sasawa, pontho chakufunywa kawiri. Ulaphiache ukhale dzanja ibodzi, pontho umimbache ukhalembo dzanja ibodzi.[37]

¹⁷Ikhapo miyala yakudula m'mizera minayi; mzera wakutoma uikhe rubi, topazi[38] na garaneti;

¹⁸mzera wachiwiri, emeradi, safire na daimondi;

¹⁹mzera wachitatu, yasinti, agate[39] na ametisiti;

²⁰pontho mzera wachinayi berili,[40] onikisi na yasipere.[41] Miyala yeneyi yathema kuikhwa m'pyakuikhiramo pyagolidi pile.

²¹Mwala onsene mwa miyala khumi na miwiriyi wathema kulembapo dzina ibodzi ya ana achimuna a Yakobo kuimirira madzinza a Israele.

²²Pya chapagangafuwa, sasanya njema zagolidi chadi-chadi zakupotwa ninga nkhambala.

²³Sasanya mphete ziwiri zagolidi mbuziphatanize kunkhomo zakudzulu za chapagangafuwa,

²⁴pontho mangirira kumphete ziwiri nkhambala ziwiri zagolidi.

²⁵Mangirira nkhomo ziwiri za nkhambalazo kupyakuthemesera piwiri pyakuoneka ninga kaluwa, tenepo piphatanize kutsogolo kwa nthambo za m'mapewa za efodi.

²⁶Tenepo sasanya mphete ziwiri zagolidi mbupiphatanize kunkhomo zapansi kwa chapagangafuwa m'khundu-khundu m'bwalo chifupi na efodi.

²⁷Sasanya mphete zinango ziwiri zagolidi mbuziikhe kupansi kutsogolo kwa nthambo ziwiri za efodi chifupi na msono, pontho padzulu pa bande yakuchita kulukwa.

²⁸Mangirira mphete za chapagangafuwa kumphete za efodi na nkhambala yachoza, towera chapagangafuwa chikhale padzulu pa bande, pontho kuti chikhonde lera.

²⁹“Aroni angapita m'Mbuto Yakuchena, iye avale chapagangafuwa chenechi pamtima pache chakulembwa madzina a madzinza a Israele, towera chikhale chikumbuso pamaso pa ine, MBUYA.

³⁰Muchapagangafuwa ikhamo Urimu na Tumimu, towera pikhale pamtima pa Aroni ndzidzi onsene unadza iye pamaso panga. Natenepo Aroni athema ndzidzi onsene kuvala chapagangafuwachi pamtima pache, chile chakukwanisa kumdziwisa kufuna kwanga kuna Aisraele.

³¹“Mkhanjo ule umbakhala pansi pa efodi wathema kusasanywa na nguwo yachoza.

³²Wathema kukhala na benga kuti msolo ukwanise kupitamo, benga yeneyi yathema kukhala na chigundiro chakuchita kulukwa kuti ileke ng'ambika.

³³Kuzungulira pansi pa chikhwayeti cha mkhanjo ikha mavulere akulukwa na usalu wachoza, msuzi wanyemba na wakufira pyakuoneka ninga ntheme, pontho pakati pa ntheme na ntheme pakhale belo yagolidi kuzungulira chikhwayeti.

³⁵Aroni athema kuvala mkhanjo wenewu angaphata basa ninga nyansembe. Iye angadza pamaso panga m'Mbuto Yakuchena, penu angabulukamo, kulira kwa belo kunaveka basi, tenepo iye nkhabe phiwa tayu.

³⁶“Sasanya chinthu chakuphaphathika chagolidi chadi-chadi, pontho uchilembe ninga chidindo kuti, ‘Kupambulika kuna MBUYA.’

³⁷Uchimangirire kutsogolo kwa nduwira na nkhambala yachoza.

³⁸Aroni athema kuchivala pachipumu pache, pontho pyakupereka pyonsene pyakuperekwa na Aisraele mwakukhonda thema, pinakhala pamsolo pa Aroni. Iye athema ndzidzi onsene kuchivala pachipumu pache, towera ine, MBUYA, nditambire anthu.

³⁹“Luka mayala a Aroni a nguwo yakufewa, pontho usasanye nduwira ya nguwo yakufewa, pontho na mthimbalimba wakuthemeserwa mwaluso na usalu.

⁴⁰“Sasanya mayala, mithimbalimba, na nduwira pya ana a Aroni kuti akhale achilemedzo pontho akubalika.

⁴¹Mvazike mbaleako Aroni na anache achimuna nguwo zenezi. Tenepo uadzoze unyansembe, pontho uapambule pakuadzoza na mafuta aolivi, towera andiphatire basa ya unyansembe.

⁴²Uasasanyire akapundu a nguwo yakufewa akulapha kubulukira m'chuno kufika ntchafu, towera akhonde oneka pezi.

⁴³Aroni na anache ndzidzi onsene athema kupivala ndzidzi unapita iwo m'Chikhumbi cha Mulungu, penu kufika chifupi na guwa yansembe kuphata basawo ya unyansembe m'Mbuto Yakuchena, towera iwo akhonde kuphiwa thangwi ya kuoneka kwawo pezi. Matongero enewa ngakukhala na kukhala kuna Aroni na pidzukulu pyache.