Read cisena KUBULUKA 29 Bible Online

KUBULUKA 29 - cisena bible

KUBULUKA 29

¹“Pyathema iwe kuchita kuna Aroni na anache achimuna kuapambula kukhala anyansembe kundiphatira basa mphipi: Kwata mwanamphulu wamamuna na mabira mawiri achimuna akusowa chilema.

²Phatisa basa ufa wa tirigu wakunerika, kwache wakusowa chakufufumisira, uphike mikate pang'ono na mafuta aolivi, inango yokhonda phikwa na mafuta, inango ikhale ninga pitumbuwa pyakukhwazwa mafuta.

³Uiikhe m'chitundu, mbuipereke kuna ine ndzidzi unapereka iwe nsembe ng'ombe imuna na mabira mawiri achimuna ale.

⁴“Udze na Aroni na anache achimuna kumsuwo wa Chikhumbi cha Mulungu, pontho uasambise na madzi.

⁵Tenepo mvazike Aroni nguwo za unyansembe; mayala, mkhanjo umbaenda pansi pa efodi ule, efodi, chapagangafuwa, na bande.

⁶Mvazike nduwira, pontho umangirirepo chidzindikiro chakulembwa kuti, ‘Kupambulika kuna MBUYA.’

⁷Tenepo kwata mafuta akudzoza nawo mbumdzoza pakuakhuthulira mumsolo mwache.

⁸“Idza na anache achimuna mbuavazike mayala;

⁹uamange mithimbalimba m'chuno mwawo, pontho uamange nduwira m'misolo mwawo. Mwenemo ndiye mwathema iwe kudzoza Aroni na anache achimuna unyansembe. Iwo na pidzukulu pyawo athema kundiphatira basa ya unyansembe ndzidzi onsene.

¹⁰“Idza na ng'ombe imuna kunkhope kwa Chikhumbi cha Mulungu, pontho panga Aroni na anache kuti asanjike manjawo pamsolo pa ng'ombeyo.

¹¹Cheka ng'ombeyo penepo pamaso panga pamsuwo wa Chikhumbi.

¹²Kwata chiropa cha ng'ombe mbuchitswinge panyanga ya guwa yansembe na chala chako. Tenepo tchanyula chiropa chakusaliracho pathako ya guwayo.

¹³Kubuluka penepo ukwate mafuta onsene akukukutiza pya m'mimba ale, khundu yadidiletu ya fafa na nswikira ziwiri na mafutache ene mbupiotche paguwapo kupipereka nsembe kuna ine.

¹⁴Mbwenye mupise nyamacheyo, nthembe yache na matumbo ache ene kunja kwa msasa. Yeneyi ndi nsembe yakubulusira pyakudawa pya anyansembe.

¹⁵“Kwata mbodzi wa mabira amuna, pontho upange Aroni na anache kuikha manjawo pamsolo pa birayo.

¹⁶Mcheke, tenepo ukwate chiropa chache uchiwazire kumakhundu manayi onsene a guwa.

¹⁷Gwanda gwanda birayo m'mapindi; tsuka pya m'mimba pyache na miyendo yache ya m'nduli, tenepo piikhe pabodzi na msolo na mapindi anangowo.

¹⁸Pisa nyama yonseneyo paguwa ninga chakupereka kuna MBUYA chakusasanywa na moto. Khwema ya chakupereka chenechi imbandikomera.

¹⁹“Kwata bira unango wamamuna, pontho panga Aroni na anache kuikha manjawo pamsolo pabirayo.

²⁰Mcheke, tenepo kwata chiropa chache pang'ono mbuchitswinge pansi kukhutu ya madyo ya Aroni na anache, pachikhatho cha dzanjawo yamadyo, pontho na pachala chawo chikulu cha dzinyalo yawo yamadyo. Tayira chiropa chakusaliracho kumafufu manayi a guwayo.

²¹Kwata chiropa pang'ono chili paguwa chile, pontho na mafuta akudzoza nawo, tenepo uchiwazire pamanungo a Aroni na nguwo zache, pontho pana anache na nguwo zawo zene. Iye na anache na nguwo zawo pinakhala pyakupambulika kuna ine.

²²“Gwanda gwanda mafuta a nyamache, mafuta a kumchira, mafuta akukukutiza pya m'mimba, khundu yadidiletu ya fafa, nswikira ziwiri na mafutache, na ntchafu yamadyo.

²³Kwata kubulukira m'chitundu cha mikate yakuperekwa kuna ine, mkate ubodzi wa mtundu onsene; ubodzi wakuphikwa na mafuta aolivi, ubodzi okhonda phikwa na mafuta pontho na chitumbuwa chibodzi.

²⁴Ikha pyakudya pyonsenepyo m'manja mwa Aroni na anache, tenepo apange kuti apipereke kuna ine kukhala mtukwa wakupambulika.

²⁵Tenepo pikwate, mbupiotche paguwa padzulu pa nsembe zakupyererazo kukhala chakupereka kuna ine chakusasanywa na moto. Khwema ya chakupereka chenechi imbandikomera.

²⁶“Kwata chidali cha bira weneyu uchipambule kuna ine ninga mtukwa wakupambulika. Phindi yeneyi ya nyama inakhala yako.

²⁷“Nyansembe angadzozwa, chidali na ntchafu pya bira pyakuphatiswa basa kudzoza napyo pyathema kupambulwa kuna ine ninga mtukwa wakupambulika, pontho wakupambulirwa anyansembe.

²⁸Kweneku nkhukhonda sanduza kwanga manyerezero kuti ndzidzi unapereka anthu anga nsembe zachiphatizano, chidali na ntchafu pya nyama pikhale pya anyansembe. Penepi ndi mtukwa wa anthu wakuperekwa kuna ine, MBUYA.

²⁹“Nguwo za Aroni za unyansembe zathema kusiyirwa anache, iye angafa, towera iwo avale angadzozwa unyansembe.

³⁰Mwana Aroni anapita m'mbuto mwache kukhala nyansembe, pontho ule anapita m'Chikhumbi cha Mulungu kaphata basa m'Mbuto Yakuchena athema kuvala nguwo zenezi nsiku zinomwe.

³¹“Kwata nyama ya bira yakuphatiswa basa kudzoza nayo Aroni na anache uitereke m'mbuto yakupambulika.

³²Pamsuwo wa Chikhumbi Aroni na anache athema kudya nyamayo na mikate idasalira m'chitundu ile.

³³Iwo anadya nsembe zile zidaphatiswa basa kulekerera pyakudawa pandzidzi udadzozwa iwo unyansembe na kupambulirwa kuna MBUYA. Anyansembe okha basi ndiye athema kudya pyakudya penepi, thangwi mphyakupambulika.

³⁴Ngakhala nyama inango, penu mikate inango hinadyiwa tayu kumachibese, pyakusalirapyo pyathema kupiswa mbapileke kudyiwa, thangwi mphyakupambulika.

³⁵“Chita penepi nsiku zinomwe kudzoza Aroni na anache ninga montho mwakupangira ine.

³⁶Nsiku yonsene iwe wathema kupereka nsembe ng'ombe imuna, towera pyakudawa pilekererwe. Penepi pinachenesa guwa yansembe. Tenepo ikhwaze mafuta aolivi kuti ikhale yakupambulika.

³⁷Chita penepi nsiku zinomwe zonsene. Penepo guwa inakhala yakuchena monsene mwene, tenepo munthu onsene penu chinthu chonsene chinakhuya guwayi chinavungwa na mphamvu za kuchena kwache.[42]

³⁸“Nsiku zonsene kutomera lero kwenda m'tsogolo idza upereke nsembe paguwa anabira awiri akukwanisa chaka chibodzi.

³⁹Pereka mbodzi wa mabirawo na machibese, unangomboyo umpereke na mawulo.

⁴⁰Pereka pabodzi na bira wakutomayo ufa wakunerika wa tirigu wakukwana kilogramu ibodzi wakuvunganizwa na tugwe mbodzi wa mafuta aolivi. Khuthula tugwe mbodzi wa vinyu ninga nsembe.

⁴¹Pereka nsembe wachiwiriyo na mawulo, pontho upereke na mdida wa ufa, mafuta aolivi na vinyu sasawa na bira wakuperekwa na machibeseyo. Chenechi ntchakupereka kuna ine, MBUYA, chakusasanywa na moto, pontho khwemache imbandikomera.

⁴²Mifendu yonsene inadzayo nsembe yeneyi yathema kuperekwa pamaso panga pamsuwo wa Chikhumbi cha Mulungu. Penepo ndiye panafuna ine kugumana na anthu anga mbandilonga kuna iwe.

⁴³Penepo ndinagumanikana na Aisraele, pontho demelero yanga inachitisa mbutoyo kukhala yakuchena.

⁴⁴Ndinachitisa Chikhumbicho na guwa kukhala pyakupambulika, pontho ndinapambula Aroni na anache kuti andiphatire basa ya unyansembe.

⁴⁵Ndinakhala pakati pa Aisraele, pontho ndinakhala Mulungu wawo.

⁴⁶Iwo anapidziwa kuti ine ndine MBUYA, Mulungu wawo, ule adaabulusa m'dziko ya Iguputo, towera ine ndikwanise kukhala pakati pawo. Ndine MBUYA, Mulungu wawo.