Read cisena KUBULUKA 3 Bible Online

KUBULUKA 3 - cisena bible

KUBULUKA 3

¹Nsiku inango pikhadyesa Mose mabira na mbuzi za Yetero, tebzalache, nyansembe wa ku Midiani, iye adawambuka thando yatchetcha na mkumbiwo mbafika kuphiri ya Sinai, phiri ya Mulungu.

²Kweneko mngelo wa MBUYA adamuonekera ninga malulume a moto kubulukira m'thenthere. Mose adaona kuti thenthere ikhagaka moto, kwache iyo nee ikhapya tayu.

³Iye adalonga yekha mbati, “Penepi ndi malengo-lengo! Pyakhala tani kuti thenthere ichimwane kupya? Ndinati ndifendedze chifupi kuti ndikapione.”

⁴Pidaona MBUYA kuti Mose akhafendeza chifupi adamchemera kubulukira m'thenthere mbati, “Mose! Mose!” Iye adatawira mbati, “Ndawo, ndili pano!”

⁵Mulungu adalonga mbati, “Leka fendedzeratu chifupi. Dula nkhwaira zako, thangwi pambuto pana iwepo mphakuchena.

⁶Ndine Mulungu wa makolo ako, Mulungu wa Abrahamu, Isake na Yakobo.” Tenepo Mose adabisa nkhope yache, thangwi akhachita mantha kuyang'ana kuna Mulungu.

⁷MBUYA adalonga mbati, “Ndaona kusanyika kunachita anthu anga m'dziko ya Iguputo; ndava kulira kunachita iwo kufuna kupulumuswa m'manja mwa anyakuyang'anira avinga. Kusanyika kwawo konsene ndikukudziwa,

⁸tenepo ndatchitha kuti ndiapulumuse m'manja mwa anthu a ku Iguputo, pontho kuti ndiabuluse mu Iguputomo mbandiaendesa kudziko yakukoma, ikulu, dziko yamphonje, pontho ile chinchino inakhala Akanani, Ahiti, Aamori, Aperizi, Ahivi, na Ayebusi.

⁹Ine ndavadi kulira kunachita anthu anga, pontho ndaona mule munaavuyira anthu a ku Iguputo.

¹⁰Chinchino ndikukutuma kuna mfumu wa ku Iguputo, towera ukatsogolere anthu anga kuabulusa mu Iguputomo.”

¹¹Mbwenye Mose adalonga kuna Mulungu mbati, “Ndine ani ine kuti ndiende kuna mfumu, pontho kabulusa Aisraele mu Iguputo?”

¹²Mulungu adatawira mbati, “Ndinakhala nawe, tenepo ungabulusa anthuwo mu Iguputo, munandipembedza paphiri pano. Chenecho chinakhala chitsikimizo chakuti ndidakutuma ndine.”

¹³Mbwenye Mose adatawira mbati, “Ine ndingaenda kuna Aisraeleko mbandikaapanga kuti, ‘Mulungu wa makolo anu andituma kuna imwe,’ iwo anakandivunza kuti, ‘Dzinache mbani?’ Apo ndikaapange tani?”

¹⁴Mulungu adalonga mbati, “Ine ndine ule ndine. Iwe wathema kaapanga tenepa: ‘Ule ambachemerwa INE NDINE[6] andituma kuna imwepo.’

¹⁵Kaapange Aisraele kuti ine, MBUYA, Mulungu wa makolo awo, Mulungu wa Abrahamu, Isake na Yakobo, ndakutuma kuna iwo. Yeneyi ndi dzinanga yakukhala na kukhala, mifendu inadzayo inandichemera na dzina yeneyi.

¹⁶Ndoko kagumanyise pabodzi akadamu onsene a Aisraele mbuapange kuti ine, MBUYA, Mulungu wa makolo awo, Mulungu wa Abrahamu, Isake na Yakobo ndidakuonekera. Ukaapange kuti ine ndaakumbuka, pontho ndaona pinthu pinaachitira anthu a ku Iguputo.

¹⁷Ndapinyerezera kuti ndiabuluse m'dziko ya Iguputo, kule kunavuyiwa iwo, tenepo ndinaaendesa kudziko yamphonje; dziko ya Akanani, Ahiti, Aamori, Aperizi, Ahivi na Ayebusi.

¹⁸“Anthu anga anakava pinafuna iwe kaapanga. Tenepo iwe wathema kwenda na akadamu a Aisraele kuna mfumu wa ku Iguputo kampanga kuti, ‘MBUYA, Mulungu wa Aheberi, apionesera yekha ene kuna ife. Chinchino titawiriseni kwenda ulendo wa nsiku zitatu m'thando yatchetcha kapereka nsembe kuna MBUYA Mulungu wathu.’

¹⁹Ndikupidziwa kuti mfumu wa ku Iguputo hanakutawirisani tayu kuchita tenepo ngakhala mkono wamphamvu hunamkhakhamiza tayu.

²⁰Mbwenye ndinati ndiphatise basa mphamvu zanga, pontho ndinatchunyusa dziko ya Iguputo pakuchita pinthu pyakudodomesa kweneko. Pingamala penepi iye anakutawirisani kwenda.

²¹“Ndinachitisa anthu a ku Iguputo kukulemedzani, towera anthu anga angabuluka m'dzikomo aleke kubuluka chimanja-manja.

²²Mkazi onsene wa Chiisraele anaenda kuna tsanthembache wa Chiiguputo na mkazi onsene wakukhala m'nyumba mwache mbakapempha nguwo, golidi na pyakuthemesera pyasiliva. Aisraele anavazika pinthu penepi anawo achimuna na achikazi mbakwata mfuma kubuluka nayo ku Iguputo.”