Read cisena KUBULUKA 30 Bible Online

KUBULUKA 30 - cisena bible

KUBULUKA 30

¹“Sasanya na matabwa akesha guwa yakufukizirapo pyakununkhira.

²Nkhomo zache zonsene zathema kukhala sasawa, ulaphiache ukhale kati ya khono, umimbache kati ya khono, pontho chengo chache[43] chikhale khono ibodzi. Nyanga zache m'nkhomo zinayi zathema kukhala phindi ibodzi na guwayo.

³Ukukutize mphampha na golidi chadi-chadi khundu zache zinayi, pontho uikhe chigundiro chagolidi m'nkhomo zache kuzungulira.

⁴Sasanya mphete zakuthukulira ziwiri zagolidi mbuziphatanize pansi pa chigundiro kumakhundu mawiri kuphatisa miti yakuthukulira guwayo.

⁵Sasanya miti yakuithukulira yakesha mbuikukutize na golidi.

⁶Ikha guwayi kunja kwa chinguwo chakumanikwa kutsogolo kwa Bokosi ya Chiverano. Yeneyi ndi mbuto inafuna kugumanikana ine na iwe.

⁷Machibese onsene Aroni angadza dzapukuta nyale, iye athema kufukiza pyakununkhira penepo.

⁸Iye athema kuchita chibodzi-bodzi ndzidzi unagasa iye nyale dzuwa ingathobila. Nsembe yeneyi yakufukiza pyakununkhira yathema kuthimiza kwenda m'tsogolo okhonda lekeza mifendu yonsene inadzayo.

⁹Leka pereka nsembe paguwa penepa pyakufukiza pyakununkhira pyakukhondeswa, nsembe za nyama, penu nsembe za mapira, pontho leka thira nsembe yachakumwa paguwapa.

¹⁰Kabodzi pachaka Aroni athema kuchita mwambo wakuchenesa guwa pakutswinga chiropa cha nyama yakuperekwa nsembe kulekerera pyakudawa panyanga zache zinayi. Penepi pyathema kuchitwa chaka na chaka mifendu yonsene inadzayo. Guwa yeneyi njakuchena monsene mwene, yakupambulika kuna ine, MBUYA.”

¹¹MBUYA adalonga kuna Mose mbati,

¹²“Ungachita kalembera wa Aisraele kudziwa kuinjipa kwawo, mamuna onsene athema kundipagali kuombola moyo wache, towera kuvungika kuleke kudza pana iye ndzidzi unalembera iwe anthu.

¹³Munthu onsene wakwenda kuna anthu akulembwa kale athema kupagali kobiri yakukwana theka ya sekeli[44] malingana na mdida wa sekeli wakuphatiswa basa nsiku na nsiku. Munthu onsene athema kupagali penepi ninga chakupereka kuna ine.

¹⁴Munthu onsene wakwenda kuna anthu akulembwa kale, kweneku nkhulonga kuti munthu wa pyaka makumawiri pyakubalwa, penu kupiringana penepo, athema kundipagali konta yeneyi.

¹⁵Nyakufuma aleke kundipagali kupiringana theka ya sekeli, pontho nyakutcherenga aleke kupereka pyakuchepa kupiringana kobiri yakukwana theka ya sekeli ndzidzi unandipagali iye konta yeneyi kuombola moyo wache.

¹⁶Gumanya kobiri zenezi kubulukira kuna Aisraele, tenepo uphatise basa kobirizo kuyang'anira mwadidi Chikhumbi cha Mulungu. Msonkho wenewu unakhala wakupagalira kuombola moyo wawo, tenepo ine ndinakumbuka kuatchinjiriza.”

¹⁷MBUYA adalonga kuna Mose mbati,

¹⁸“Sasanya mphale yakusambira yankuwa yakukhala na thako yankuwa. Uiikhe pakati pa Chikhumbi na guwa yansembe, tenepo uikhemo madzi mwenemo.

¹⁹Aroni na anache achimuna athema kuphatisa basa madzi a m'mwenemo kusamba manja na kutsuka manyalo awo,

²⁰mbadzati kupita m'Chikhumbi cha Mulungu, penu kufika chifupi na guwa kupisa nsembe na moto zakuperekwa kuna MBUYA. Tenepo iwo hanaphiwa tayu.

²¹Iwo athema kusamba manja na kutsuka manyalo awo, towera aleke kufa. Enewa ndi matongero, ale iwo na pidzukulu pyawo athema kuteweza mifendu yonsene inadzayo.”

²²MBUYA adalonga kuna Mose mbati,

²³“Kwata pyakununkhira pyadidiletu: Matugwe matanthatu a madzi a mure, makilogramu matatu a kinamoni wakununkhira, makilogramu matatu a kane wakununkhira,

²⁴na makilogramu matanthatu a kasiya wakununkhira. Thimiza matugwe manayi a mafuta aolivi,

²⁵pontho na penepi usasanye mafuta akupambulika akudzoza nawo akuvungazwa na nyaluso pakuvungaza pyakununkhira.

²⁶Aphatise basa kudzoza nawo Chikhumbi cha Mulungu, Bokosi ya Chiverano,

²⁷thebulu na pyombo pyache pyonsene, chakuikhirapo nyale na pinthu pyache pyonsene, guwa yakufukizirapo pyakununkhira,

²⁸guwa yakuperekapo nsembe zakupyerera, pabodzi pene na pinthu pyache pyonsene na mphale na thako yache.

²⁹Pambulira kuna ine pinthu penepi na njira yeneyi, tenepo pinakhala pyakuchena monsene mwene, pontho munthu onsene penu chinthu chonsene chinakhuya penepi chinavungwa na mphamvu za kuchena kwache.[45]

³⁰Tenepo dzoza unyansembe Aroni na anache, pontho apambulire kuna ine towera akhale anyansembe anga.

³¹Longa kuna Aisraele kuti, ‘Mafuta akudzoza nawo akupambulikawa athema kuphatiswa basa pa basa yanga mifendu yonsene inadzayo.

³²Athema nee kudzolwa pamanungo a anthu tayu, pontho iwe wathema nee kusasanya mafuta anango ninga tenepa tayu. Ngakupambulika, tenepo uayese ninga akupambulika.

³³Munthu onsene anasasanya mafuta ninga enewa, penu kuphatisa basa mafutawa kudzoza munthu, ule nee si nyansembe tayu, hanayeswave ninga mbodzi wa anthu anga tayu.’ ”

³⁴MBUYA adalonga kuna Mose mbati, “Kwata sasawa pyakununkhira pyadidi ipi: Sitakati, onika, galibanumu na libano chadi-chadi.

³⁵Upiphatise basa kusasanya pyakufukiza pyakununkhira pyakuvungazwa na nyaluso pakuvungaza pyakununkhira. Piikhe munyu kuti pikhale pyangwiro, pontho pyakuchena.

³⁶Peya pinango pya ipyo kukhala ufa, tenepo pikwate uende napyo mbupiikhe m'Chikhumbi cha Mulungu kutsogolo kwa Bokosi ya Chiverano. Pyakufukiza pyakununkhira penepi pikhale pyakuchena monsene mwene.

³⁷Leka phatisa basa njira zakuvunganizira pyakufukiza pyakununkhira sasawa ninga penepi kupidzoza wekha ene. Pikhale pinthu pyakuchena, pontho pyakupambulika kuna ine.

³⁸Ngakhala munthu anasasanya pinthu ninga penepi kuti apiphatise basache, iye hanayeswave ninga mbodzi wa anthu anga tayu.”