Read cisena KUBULUKA 31 Bible Online

KUBULUKA 31 - cisena bible

KUBULUKA 31

¹MBUYA adalonga kuna Mose mbati,

²“Yang'ana, ine ndasankhula Bezalele, mwana wamamuna wa Uri, ule ndi mdzukuluache Huri, wa dzinza ya Yuda,

³pontho ndamdzaza na Mzimu wa Mulungu.[46] Ine ndampasa nzeru kuvesa pinthu, luso pontho kukwanisa kuphata basa yamtundu onsene yamanja,

⁴kukwanisa kutanda makhaliro a pinthu mwaluso, pontho kupisasanya na siliva, golidi na nkuwa;

⁵kugwanda miyala na kuiikha m'pyakuthemesera; kusema miti; pontho na basa yamtundu onsene yamanja.

⁶Ndasankhula pontho Oholiabu, mwana wamamuna wa Ahisamaki, wa dzinza ya Dani kuti aphate naye pabodzi basa. Ndapereka pontho luso kuna anango onsene akuphata basa yamtundu onsene yamanja, towera akwanise kusasanya pyonsene pyaatonga ine kuti pisasanywe:

⁷Chikhumbi cha Mulungu, Bokosi ya Chiverano na mphamphache, pinthu pinango pyonsene pya m'Chikhumbi,

⁸thebulu na pinthu pyache pyonsene, chakuikhirapo nyale chagolidi chadi-chadi na pinthu pyache pyonsene, guwa yakufukizirapo pyakununkhira,

⁹guwa yakuperekerapo nsembe zakupyerera na pinthu pyache pyonsene, mphale na thako yache,

¹⁰nguwo zakuthemeserwa na usalu zakupambulika za Aroni na anache zakuphatisa basa ndzidzi unaphata iwo basa ya unyansembe,

¹¹mafuta akudzoza nawo, na pyakufukiza pyakununkhira pya Mbuto Yakuchena. Ndzidzi unasasanywa pinthu penepi, pyathema kusasanywa sasawa ninga mwakupangira ine.”

¹²MBUYA adatonga Mose

¹³kulonga kuna Aisraele kuti, “Koyani Sabudu, Nsiku Yakupuma, thangwi ntchidzindikiro pakati pa imwe na ine mifendu yonsene inadzayo, kuonesa kuti ine, MBUYA, ndakusanduzani imwe kukhala anthu anga.

¹⁴Imwe mwathema kukoya Nsiku Yakupuma, thangwi njakupambulika. Munthu anakhonda kuikoya mbaphata pyache basa pansikuyi, athema kuphiwa.

¹⁵Imwe muna nsiku zitanthatu zakuphata mabasanu, mbwenye nsiku yachinomwe ndi Nsiku Yakupuma yakupambulika kuna ine. Munthu anaphata basa pansiku yeneyo, athema kuphiwa.

¹⁶Aisraele a mifendu yonsene athema kukoya nsikuyi ninga chidzindikiro cha chiverano kwenda na kwenda.

¹⁷Chenechi ntchidzindikiro chakukhazikika pakati pa Aisraele na ine, thangwi MBUYA adasasanya kudzulu na dziko yapansi nsiku zitanthatu, tenepo adalekeza basache kupuma pansiku yachinomwe.”

¹⁸Pikhadamala Mulungu kulonga kuna Mose paphiri ya Sinai, adampasa pyakulemberapo piwiri pyamiyala, pale pakhadalembapo Mulungu mwenechiro matongero.