Read cisena KUBULUKA 32 Bible Online

KUBULUKA 32 - cisena bible

KUBULUKA 32

¹Pidaona anthu kuti Mose akhadembuka kutchitha paphiri pale, iwo adagumanyikana kuzungulira Aroni mbalonga kuna iye mbati, “Ife nkhabe dziwa pyachitikira munthu weneyu, Mose, ule adatitsogolera kutibulusa m'dziko ya Iguputo; tisasanyiretu pyathu milungu kuti ititsogolere.”

²Aroni adalonga kuna iwo mbati, “Dulani mphete za m'khutu zagolidi zimbavala akazanu, ananu achimuna na achikazi zile, mudze nazo kuna ine.”

³Tenepo anthu onsene adadula mphete zawo zagolidi mbadza nazo kuna Aroni.

⁴Iye adakwata mphetezo mbazinyungulusa mbakhuthulira m'chikombole kusasanya mfanikizo wa mwanamphulu wagolidi. Anthu adalonga mbati, “Aisraele, yeneyi ndi milungu yathu, idatibulusa m'dziko ya Iguputo ile.”

⁵Pidaona Aroni penepi adamanga guwa patsogolo pa mfanikizo wa mwanamphulu wagolidi mbalalika mbati, “Mangwana kunakhala phwando yakulemedza nayo MBUYA.”

⁶Bzobzo mangwana mwache iwo adadza na nyama dzaotcha ninga nsembe zakupyerera, pontho na pinango kudya ninga nsembe zachiphatizano. Anthu adachita phwando, kudya na kumwa kwene, pile pidasanduka kuchita pyakuzuda.

⁷MBUYA adalonga kuna Mose mbati, “Tchitha ubwerere kabodzi kene, thangwi anthu ako adatsogolera iwe kubuluka mu Iguputo ale, adawa mbandikhonda.

⁸Iwo aleka kale kuteweza matongero adaapanga ine kuti ateweze; iwo asasanya mfanikizo wa mwanamphulu na golidi wakunyunguluswa, pontho akuchipembedza na kupereka nsembe kuna icho. Iwo akulonga kuti yeneyi ndi milungu yawo, idaabulusa mu Iguputo ile.

⁹Ine ndadziwa kuuma mtima kwa anthu enewa.

¹⁰Tenepo, leka yesa kundikhondesa. Ine ndazhangali nawo, tenepo ndinati ndiavunge. Kubuluka penepo ndinachitisa iwe na pidzukulu pyako kukhala dzinza ikulu.”

¹¹Mbwenye Mose adadembetera MBUYA Mulungu wache mbati, “MBUYA, mwatani munazhangalira anthu anu tenepa, ale adapulumusa imwe kudziko ya Iguputo na mphamvu zikulu?

¹²Thangwi yache ninji Aiguputo akwanise kulonga kuti imwe mudabulusa anthu anu mu Iguputo kufuna kuachitira pyakuipa pakuapha m'mapiri na kuavungiratu? Lekani zhangali; mbombowesani ukali wanu, pontho lekani dzesa nyatwa pana anthu anu.

¹³Kumbukani anyabasanu, Abrahamu, Isake na Israele. Kumbukani kudumbira kudachita imwe kuna iwo na dzinanu kuti munaapasa pidzukulu pyakuinjipa ninga nyenyezi za kuthambo, pontho kupasa pidzukulu pyawo dziko idadumbira imwe kuti inakhala yawo ene ndzidzi onsene.”

¹⁴Tenepo MBUYA adambombowesa ukali wache mbakhonda dzesa nyatwa pana anthu ache, nyatwa idaathuswa na iye kuti anaidzesa ile.

¹⁵Mose adatchitha paphiri pale kubwerera uku athukula pyakulemberapo piwiri pyamiyala pyakulembapo matongero khundu yonsene.

¹⁶Mulungu mwenechiroache ndiye adalembapo matongerowo.

¹⁷Yoswa adava anthu akukhuwa mbalonga kuna Mose mbati, “Ndikuva ninga nkhondo mumsasamu.”

¹⁸Mose adalonga mbati, “Penepi nee pikuveka ninga kukunda, penu kukundwa tayu, mbwenye ndikuva kuimba.”

¹⁹Pidafika Mose chifupiletu na msasa ule, adaona mfanikizo wa mwanamphulu wamamuna mbaona anthu akuvina, tenepo iye adazhangali. Penepo m'tchinde mwa phiri, adaponya pansi pyakulemberapo pyamiyala pikhathukula iye pile mbipisweka.

²⁰Iye adakwata mfanikizo wa mwanamphulu akhadasasanya iwo ule mbamnyungulusa, pontho adachipeya mbichikhala dotha mbachivungaza na madzi. Tenepo adachitisa Aisraele kuti amwe madziwo.

²¹Iye adalonga kuna Aroni mbati, “Anthuwa adachitanji kuna iwe mwakuti waadawisa pikulu ninga tenepa?”

²²Aroni adatawira mbati, “Leka kundizhangalira; iwe ukudziwa phinga ina anthu enewa pakuchita pyakudawika.

²³Iwo adalonga kuna ine mbati, ‘Ife nkhabe dziwa pyachitikira munthu weneyu, Mose, ule adatidzesa kuno kubulukira ku Iguputo; tenepo tisasanyire pyathu milungu kuti ititsogolere.’

²⁴Ine ndidaapanga kudza na mphete zawo zagolidi za m'makutu, tenepo ale akhali napyo adazidula mbandipasira. Ine ndidapiponya pamoto, penepo pene pidasanduka mwanamphulu wamamunayi!”

²⁵Mose adaona kuti Aroni akhadachitisa anthu kusanduka ching'au-ng'au pontho kupichitisa okha ene kukhala anthu akupupwa pamaso pa anyamalwawo.

²⁶Tenepo iye adaimira pamsuwo ukulu wakupitira mumsasamo mbakhuwa mbati, “Munthu onsene ule ali kukhundu ya MBUYA mbadze kuna ine kuno!” Tenepo Alevi onsene adagumanyikana pana iye,

²⁷iyembo adaapanga mbati, “MBUYA Mulungu wa Israele akulonga kuti munthu onsene pakati panu akwate talasadache mbaende mumsasa onsenewu kubulukira kumsuwo uno kwenda kumsuwo unango wa msasawu na kupha mbaleache, shamwaliache na atsanthembache.”

²⁸Anthu a dzinza ya Levi adavera mbapha anthu ninga pikwi pitatu nsiku yeneyo.

²⁹Mose adalonga kuna Alevi mbati, “Lero mwapipambula mwekha ene[47] kuphatira basa MBUYA ninga a nyansembe pakupha ananu achimuna, abale anu, tenepo MBUYA akupasani mtsanzayiso wache.”

³⁰Mangwana mwache Mose adalonga kuna anthu mbati, “Imwe mwadawa pikulu. Mbwenye chinchino ndinati ndiende pontho kuphiri kuna MBUYA, mwinango ndinakwanisa kapempha kuti pyakudawa pyanu pilekererwe.”

³¹Tenepo Mose adabwerera kuna MBUYA mbati, “Anthuwa adawa pikulu. Iwo adasasanya milungu yagolidi mbaipembedza.

³²Ndaphata miyendo alekerereni pyakudawa pyawo; mbwenye ngakhala imwe munaalekerera tayu, apo fudzani dzinanga m'bukhu idalemba imwe madzina a anthu anu ile.”

³³MBUYA adatawira mbati, “Madzina anafuna fudzwa m'bukhumu ngale ene andidawira ale.

³⁴Chinchino, ndoko katsogolere anthu kumbuto idakupanga ine ile. Tenepo dziwa kuti mngelo wanga ndiye anakutsogolerani, mbwenye ndzidzi ukudza, ule unafuna ine tchunyusa anthu enewa thangwi ya pyakudawa pyawo.”

³⁵MBUYA adagwisa utenda pakati pa anthu, thangwi iwo adachitisa kuti Aroni asasanye mfanikizo wa mwanamphulu wamamuna wagolidi.