Read cisena KUBULUKA 33 Bible Online

KUBULUKA 33 - cisena bible

KUBULUKA 33

¹MBUYA adalonga kuna Mose mbati, “Bulukani pambuto pano, iwe na anthu adabulusa ine mu Iguputo, muende kudziko idadumbira ine kuna Abrahamu, Isake na Yakobo na kuna pidzukulu pyawo.

²Ndinatuma mngelo kukutsogolerani, pontho ndinathamangisa Akanani, Aamori, Ahiti, Aperizi, Ahivi na Ayebusi.

³Imwe mukwenda kudziko yamphonje. Mbwenye ine sinati ndiende namwe tayu, gopesera ndinakuvungani panjira thangwi ndimwe anthu akuuma mtima.”

⁴Pidava anthu penepi, adatoma kulira, tenepo hadavaleve pyakuthemesera manungo awo tayu.

⁵Thangwi MBUYA akhadatonga Mose kulonga kuna iwo kuti, “Imwe ndimwe anthu ukuuma mtima. Ngakhala ine ndikhafuna kwenda namwe, penu ndzidzi ung'ono ene, mbidakuvunganiletu. Chinchino dulani pyakuthemesera manungo anu, inembo ndinadziwa pyakuti ndichite namwe.”

⁶Tenepo pidabuluka iwo paphiri ya Sinai Aisraele hadavaleve pyakuthemesera manungo tayu.

⁷Ndzidzi onsene ukhamanga Aisraele msasa, Mose akhakwata Chikhumbi cha Mulungu mbakachiikha kutali pang'ono na msasawo. Iye adachithula Chikhumbi cha Mulungu, tenepo munthu onsene ule akhafuna kuvunza nzeru kuna MBUYA akhaenda kweneko.

⁸Ndzidzi onsene ukhaenda Mose kweneko, anthu akhaimira pamsuwo wa makumbi awo mbayang'ana Mose mpakana iye apite m'Chikhumbimo.

⁹Mose angapita m'Chikhumbimo, makole akuoneka ninga mzati akhatchitha mbakhala pamsuwo wa Chikhumbicho, tenepo MBUYA akhalonga kuna Mose kubulukira m'makolemo.

¹⁰Sindzidzi anthu nkhuona makole akuoneka ninga mzati pamsuwo wa Chikhumbi akhalamba pansi munthu onsene pamsuwo wa khumbi yache.

¹¹MBUYA akhalonga na Mose maso na maso, ninga mumbalongera munthu na shamwaliache. Kubuluka penepo Mose akhabwerera kumsasa kule, mbwenye mphale akhamphedza ule, Yoswa, mwana Nuni, adasalira m'Chikhumbimo.

¹²Mose adalonga kuna MBUYA mbati, “Ndimomwene imwe mwandipanga kuti nditsogolere anthuwa kuaendesa kudziko yeneyo, mbwenye hamudandipange tayu mbani anafuna kundituma na imwe. Imwe mwalonga kuti mumbandidziwa mwadidi mwene, pontho mwakukomerwa nane.

¹³Chinchino imwe ngakhala mwakomerwa nane, ngandipangeni pinthu pinafuna imwe kuchita, towera ndikuphatireni basa mbamuthimiza kukomerwa nane. Kumbukani pontho kuti imwe mwasankhula dzinzayi kukhala yanu ene.”

¹⁴MBUYA adalonga mbati, “Ndinati ndiende namwe mbandikuchitisani kukunda.”

¹⁵Mose adatawira mbati, “Ngakhala imwe nee munaenda nafe tayu, lekani kutibulusa pano.

¹⁶Munthu onsene anadziwa tani kuti imwe mwakukomerwa na anthu anu, pontho na ine ngakhala imwe munaenda nafe tayu? Kukhala kwanu nafe kunasiyanisa pakati pa ife na anthu anango a padziko yapansi pano.”

¹⁷MBUYA adalonga kuna Mose mbati, “Ndinati ndichite ninga mwapemphera iwe, thangwi ndimbakudziwa mwadidi mwene pontho ndakomerwa nawe.”

¹⁸Tenepo Mose adapempha MBUYA mbati, “Ndaphata miyendo, nganditawirisenimbo kuona demelero yanu.”

¹⁹MBUYA adatawira mbati, “Ndinachitisa kuti uone udidi wanga onsene ukugwanda pamaso pako, pontho pamaso pako ndinalalika dzinanga yakupambulika yakuti MBUYA. Ine ndinava nsisi na anthu anafuna ine kuvera nsisi; ndinava nyambalo na anthu anafuna ine kuvera nyambalo.

²⁰Ine nkhabe kukutawirisa kuti uone nkhope yanga tayu, thangwi nkhabe munthu anakwanisa kundiona mbakhala na moyo,

²¹mbwenye pano pana mbuto chifupi na ine pale panakwanisa iwe kuimira pamwala.

²²Demelero yanga ingagwanda pano, ndinakuikha m'nkhwimba yamwalawo mbandikubisa na dzanjanga mpakana ndigwande.

²³Tenepo ndinabulusa dzanjanga, penepo iwe unaona kunduli kwanga nee nkhope yanga tayu.”