Read cisena KUBULUKA 34 Bible Online

KUBULUKA 34 - cisena bible

KUBULUKA 34

¹MBUYA adalonga kuna Mose mbati, “Sema miyala miwiri ninga ya pakutoma ile, tenepo ine ndinalembapo mafala, ale akhali pa pyakulemberapo pyakutoma pidaswa iwe pile.

²Mangwana na machibese usasanyike kudza pansonga ya phiri ya Sinai dzagumanikana na ine pano.

³Nee mbodzi athema kukwira pabodzi na iwe, penu kuoneka chifupi paphiri pano tayu, pontho nee mabira, penu ng'ombe pyathema kudya m'tchinde mwa phirimo.”

⁴Tenepo Mose adasema pyakulemberapo pinango piwiri pyamiyala ninga pyontho pyakutoma pile, tenepo bzobzo mangwana mwache adapithukula m'manja mwache mbakwira napyo paphiri pale ninga montho mukhadampangira MBUYA.

⁵MBUYA adatchitha m'makole mbaimira naye penepo, tenepo adalalika dzinache yakupambulika yakuti MBUYA.[48]

⁶Penepo MBUYA adagwanda pamaso pache mbalalika kuti, “MBUYA, MBUYA, ine ndine Mulungu wakuva nyambalo na nsisi, wakusowa chipsu, wakuonesa kuafuna anthu kokhonda mala, pontho wakukhulupirika.

⁷Ndimbaonesa kuafuna kwanga kokhonda mala kuna mifendu pikwi-pikwi[49] mbandilekerera umambala, kupandukira na pyakudawa; mbwenye nkhabe leka kutchunyusa munthu wakuchita pyakuipa; ine ndimbatchunyusa ana na pidzukulu pya mifendu mpakana mfendu wachitatu na wachinayi thangwi ya pyakudawa pya makolo awo.”

⁸Msanga-msanga Mose adalamba pansi mbampembedza.

⁹Iye adalonga mbati, “Mbuya, ngakhala mwakomerwadi nane, ndikukupemphani kuti muende nafe. Anthuwa ngakuuma mtima, mbwenye lekererani pyakuipa na pyakudawa pyathu, pontho titawiriseni kuti tikhale anthu anu ene.”

¹⁰MBUYA adalonga kuna Mose mbati, “Chinchino ndasasanya chiverano chitswa na Aisraele. Ndinachita pinthu pikulu pamaso pawo pyakuti chipo nee ndidzati ndapichitabi konsene pansi pano pakati pa madzinza anango ene. Anthu onsene anaona pinthu pikulu pinakwanisa ine, MBUYA, kuchita, thangwi ndinati ndikuchitireni chinthu chakugoswa.

¹¹Verani matongero anakupasani ine lerowa. Ndinathamangisa Aamori, Akanani, Ahiti, Aperizi, Ahivi na Ayebusi pinamenya imwe nkhondo.

¹²Lekani chita chiverano na anthu a m'dziko inaenda imweyo, gopesera ipyo pinakhala msampha kuna imwe.

¹³Kwache mugwise maguwawo akupambulika, iswani piguwa pyawo pyakupambulika, pontho mugwise adzimunthu awo a milungu Ashera.[50]

¹⁴“Lekani pembedza milungu inango na mbodzi ene, thangwi ine, MBUYA, ule dzinanga ndi Ntchanje, ndine Mulungu wa ntchanje.

¹⁵Lekani chita chiverano na anthu a m'dzikomo, thangwi iwo angapembedza milungu mbapereka nsembe kuna iyo, iwo anakuchemerani kuti muphatizane nawo, tenepo imwe munayeswa kudya pinthu pyakuperekwa kuna milungu yawoyo.

¹⁶Imwe mungasembera ananu achimuna anawo achikazi, iwo anaachitisa kukhala okhonda khulupirika kuna ine mbapembedza milungu yawoyo.

¹⁷“Lekani sasanya mifanikizo na ntove kukhala milungu.

¹⁸“Sekerani Phwando ya Mikate yakusowa Chakufufumisira. Nsiku zinomwe mwezi wa Abibu, idyani mikate yakusowa chakufufumisira ninga mudakupangirani ine, thangwi ndi mwezi wenewo udabuluka na imwe m'dziko ya Iguputo.

¹⁹“Mwana onsene wamamuna wautombo, pontho chifuyo chonsene chimuna chakutoma kubalwa mphyanga,

²⁰kwache imwe mwathema kundipagali kuombola bulu onsene wakutoma kubalwa pakupereka mwanabira m'mbuto mwache. Ngakhala imwe hamunandipagali kupiombola tayu, khumulani khosi yache. Ndipagalini kuombola mwana wamamuna onsene wautombo. “Nee munthu mbodzi athema kudza pamaso panga okhonda chakupereka tayu.

²¹“Imwe muna nsiku zitanthatu zakuti muphate mabasanu, mbwenye lekani phata basa pansiku yachinomwe, podi kwene kuti ukhale ndzidzi wakutipula, penu wakuvuna.

²²“Sekerani Phwando ya Pyakuvuna pakupereka mbewu zanu zakutoma kutokota za tirigu, pontho sekerani Phwando ya Misasa ndzidzi unatchola imwe nsapo zanu.

²³“Amuna onsene athema kundipembedza, ine MBUYA Mulungu wa Israele, katatu pa chaka.

²⁴Ndingamala kuthamangisa madzinza pamaso panu, pontho kuthimiza madire a dziko yanu, nkhabe mbodzi anafuna yesa kukupokoserani dziko yanu pandzidzi wa maphwando matatuwa tayu.

²⁵“Lekani pereka pabodzi na mikate yakukhala na chakufufumisira chiropa cha nyama inapereka imwe nsembe kuna ine. Lekani koya nyama yakuphiwa pa Phwando ya Paska kufikirana mangwana mwache.

²⁶“Chaka na chaka idzani kunyumba ya MBUYA Mulungu wanu na mbewu zadidiletu zakutoma kutokota zimbavuna imwe zile. “Lekani tereka mwanabira penu mwanambuzi kubodzi kwene na mkaka wa mache.”

²⁷MBUYA adalonga kuna Mose mbati, “Lemba mafala enewa, thangwi chiverano chinasasanya ine na iwe, pontho na Aisraele chagona pa mafala enewa.”

²⁸Mose adakhala penepo na MBUYA nsiku makumanayi, mosiku na masikati, nee kudya na kumwa pinthu tayu. Tenepo iye adalemba pa pyakulemberapo pyamiyala pile mafala a chiverano, ale ndi Matongero Khumi.

²⁹Pidatchitha Mose paphiri ya Sinai uku athukula Matongero Khumi, iye hadapidziwe tayu kuti nkhope yache ikhayetimira, thangwi akhadalonga na MBUYA.

³⁰Aroni na anthu onsene adayang'ana Mose mbaona nkhope yache ikuyetimira, tenepo iwo adachita mantha kufedza chifupi naye.

³¹Mbwenye Mose adaachemera, tenepo Aroni na akadamu onsene adenda kuna iye, tenepo Mose adalonga kuna iwo.

³²Kubuluka penepo Aisraele onsene adagumanyikana mwakumzungulira, tenepo Mose adaapanga matongero onsene akhadampasa MBUYA paphiri ya Sinai.

³³Pikhadamala Mose kulonga nawo, iye adampsampsira nkhope yache na chakumpsampsikira.

³⁴Ndzidzi onsene ukhapita Mose m'Chikhumbi cha Mulungu, iye akhakunundula chakupsampsikira chile. Iye angabulukamo, akhapanga Aisraele pyonsene pikhadampanga MBUYA kuti alonge,

³⁵tenepo anthu akhaona kuti nkhope yache ikhayetimira. Penepo iye akhavala pontho chakumpsampsikira chile mpakana ndzidzi unango udenda iye kalonga na MBUYA.