Read cisena KUBULUKA 35 Bible Online

KUBULUKA 35 - cisena bible

KUBULUKA 35

¹Mose adachemeresa dzinza yonsene ya Aisraele mbalonga kuna iwo mbati, “Penepi ndiye pyakutongani MBUYA kuti imwe mupichite:

²Imwe muna nsiku zitanthatu zakuti munakwanisa kuphata mabasanu, mbwenye nsiku yachinomwe njakuchena, Nsiku Yakupuma yakupambulika kuna ine, MBUYA. Munthu anaphata basa pansiku yeneyo athema kuphiwa.

³Lekani kuphatisa na moto ene m'misa mwanu pa Nsiku Yakupuma.”

⁴Mose adalonga kuna Aisraele onsene mbati, “Penepi ndiye pyatonga MBUYA:

⁵Perekani pyakupereka kuna MBUYA. Munthu onsene anakhumba kuchita tenepo athema kudza na pyakupereka pya golidi, siliva na nkuwa;

⁶nguwo yakufewa, usalu wa choza, msuzi wanyemba na yakufira; nguwo yakusasanywa na ubweya wa mbuzi;

⁷nthembe za mabira amuna zakuikhwa tinta yakufira; nthembe zakufewa; matabwa akesha;

⁸mafuta aolivi a m'nyale; pyakununkhira pya mafuta akudzoza nawo, pontho na pyakufukiza pyakununkhira;

⁹miyala ya onikisi na miyala yakudula inango yakuthemesera nguwo ya efodi pya Nyansembe Wamkulu, pontho na chapagangafuwa pache.

¹⁰“Anyaluso onsene pakati panu athema kudza dzasasanya pyonsene pyatonga MBUYA:

¹¹Chikhumbi na chinguwo chache chakuphimba nacho pansoyi na chakuphimba nacho chakunja, ngoloweko zache na matabwa, mitandaliko yache, miti yache na mathako ache;

¹²Bokosi ya Chiverano, miti yache, mphamphache, chinguwo chakutchinga nacho;

¹³thebulu, miti yache, na pyombo pyache pyonsene; mkate wakuperekwa kuna Mulungu;

¹⁴chakuikhirapo nyale na pinthu pyache, nyale na mafutawo;

¹⁵guwa yakufukizirapo pyakununkhira na miti yache, mafuta akudzoza nawo; pyakufukiza pyakununkhira; nguwo yakutchinga nayo msuwo wa Chikhumbi;

¹⁶guwa yakuperekerapo nsembe zakupyerera, mangalade ankuwa, miti yache na pinthu pyache pyonsene; mphale na thako yache;

¹⁷chinguwo chakutchinga nacho mpanda; mizati yache na mathako ache; nguwo yakutchinga nayo pamsuwo wa mpanda;

¹⁸ntchiri zakuphatisa nkhambala za Chikhumbi na mpandache;

¹⁹pontho nguwo zakukoma m'maso zathema kuvala anyansembe ndzidzi unaphata iwo basa m'Mbuto Yakuchena, zenezi ndi nguwo zakupambulika za Aroni, nyansembe na anache achimuna.”

²⁰Aisraele onsene adabuluka pana Mose,

²¹tenepo munthu onsene akhafuna kupereka akhadza na pyakupereka kuna MBUYA kuti asasanyire Chikhumbi cha Mulungu. Iwo adadza na pyonsene pikhafunika pyakuphatiswa basa pakupembedza na pakusasanya nguwo za anyansembe.

²²Anthu onsene akhafuna kuchita tenepo ale, amuna penu akazi akhadza na nthona, mphete za m'khutu, mphete za m'pyala, mikufu, pyakuthemesera pya mtundu onsene pyagolidi mbapipereka kuna MBUYA.

²³Munthu onsene, ule akhali na nguwo yakufewa; usalu wachoza, msuzi wanyemba penu wakufira; nguwo yakusasanywa na ubweya wa mbuzi, nthembe za mabira amuna zakuikhwa tinta yakufira, penu nthembe zakufewa akhadza napyo.

²⁴Onsene ale adakwanisa kupereka siliva, penu nkuwa adadza napyo mbapipereka ninga pyakupereka pyawo kuna MBUYA, onsenembo, ale akhali na matabwa akesha, pile mbipidakwanisa kuphatiswa basa yonsene adadza nawo.

²⁵Akazi onsene aluso pakusasanya usalu adadza na usalu wakufewa, pontho na usalu wachoza, msuzi wanyemba na wakufira, ukhadasasanya iwo.

²⁶Akazi onsene ale akhali na luso pontho akhapifuna adasasanya usalu wa ubweya wa mbuzi.

²⁷Akadamu adadza na miyala ya onikisi, pontho na miyala inango yakudula yakufuna kuikhwa muefodi na chapagangafuwa,

²⁸na pyakununkhira pya mafuta aolivi a m'nyale, mafuta akudzoza nawo, pontho na pyakufukiza pyakununkhira.

²⁹Anthu onsene ale akhapifuna kuchita tenepo adadza na pyakupereka pyawo kuna MBUYA dzaphatira napyo basa ikhadatonga MBUYA kuti Mose aiphate ile.

³⁰Mose adalonga kuna Aisraele mbati, “Yang'ana, MBUYA asankhula Bezalele, mwana wamamuna wa Uri, ule ndi mdzukuluache Huri, wa dzinza ya Yuda.

³¹Mulungu adamdzaza na Mzimu[51] wache pontho na luso, kukwanisa kuphata basa, pontho nzeru kuvesa basa ya manja ya mtundu onsene,

³²luso kudziwa kutanda makhaliro a pinthu, pontho kupisasanya na siliva, golidi na nkuwa;

³³kugwanda miyala na kuiikha m'pyakuthemesera; kusema miti; pontho na basa yamtundu onsene yamanja.

³⁴MBUYA apereka kuna iye pontho na Oholiabu, mwana wamamuna wa Ahisamaki, wa dzinza ya Dani, nzeru zakukwanisa kufunzisa basawo kuna anango.

³⁵Iye aapasa luso pamabasa onsene akuphatwa na anyakulemba, anyakutanda pinthu, na anyakuluka nguwo zakufewa; zachoza, msuzi wanyemba na yakufira, na nguwo zinango. Iwo anakwanisa kuphata basa yamtundu onsene mwaluso.