Read cisena KUBULUKA 36 Bible Online

KUBULUKA 36 - cisena bible

KUBULUKA 36

¹“Bezalele, Oholiabu, na amuna anango aluso, ale MBUYA aapasa luso na nzeru yakuvesa pinthu, ale ambadziwa kusasanya pyonsene pyakufunika kumangirira Chikhumbi cha Mulungu, athema kusasanya pyonsene ninga montho mwatongera MBUYA.”

²Mose adachemera Bezalele, Oholiabu na anyaluso anango, ale akhadapaswa na MBUYA kukwanisa kuphata basa, pontho na ale akhafuna pyakuphedza, tenepo Mose adaapanga kutoma phata basa.

³Iwo adatambira kubulukira kuna iye pyakupereka pyonsene pikhadadza na Aisraele kuti piphatiswe basa kumangira Chikhumbi cha Mulungu. Mbwenye Aisraele adathimiza kudza kuna Mose na pyakupereka pyawo machibese onsene.

⁴Tenepo anyaluso akhaphata basa ale adenda

⁵mbakalonga kuna Mose mbati, “Anthu akudza na pinthu pizinji kupiringana pinthu pinafunika pabasa idatonga MBUYA kuti iphatwe ile.”

⁶Tenepo Mose adatumiza mphangwa mumsasa monsene mule kuti paleke khalave munthu na mbodzi ene wakuthimiza kudza na pyakupereka pya pa Chikhumbi cha Mulungu; tenepo anthu adaleka kupereka.

⁷Pikhadadzeswa kale pile pikhali pizinji pyakwanga kupiringana pinthu pyakufunika kuphatira napyo basa yonsene.

⁸Amuna anyalusoletu pakati pa ale akhaphata basa adasasanya Chikhumbi cha Mulungu. Iwo adachisasanya na mapindi khumi a chinguwo chakufewa chakulukwa mwaluso na usalu wachoza, msuzi wanyemba na wakufira, mbachithemesera na pyakulengwa pyakukhala na maphaphido.

⁹Mapindi a chinguwocho akhali sasawa, ulaphiache makhono khumi na awiri, pontho umimbache makhono mawiri.[52]

¹⁰Iwo adasona mapindi mashanu kukhala chinguwo chibodzi chikulu mbachita chibodzi-bodzi na mapindi anango ashanu ale.

¹¹Iwo adasasanya magango na nguwo yachoza mbaaikha m'khundu mwa phindi yakumalisa ya chinguwo chibodzi chikulu mbachita chibodzi-bodzi kuna chinguwo chinango chikulucho.

¹²Iwo adaikha magango makumashanu paphindi yakutoma ya chinguwo chibodzi chikulu, pontho magango makumashanu paphindi yakumalisa ya chinguwo chinango chikulucho, towera magangowo ayang'anisane.

¹³Iwo adasasanya ngoloweko zankuwa makumashanu zidaphatisira iwo basa kuphataniza nguwo ziwiri zikulu zile, mwakuti Chikhumbi cha Mulungu chikhali chibodzi chamumphu.

¹⁴Tenepo iwo adasasanya chinguwo chakuphimbira nacho Chikhumbicho kubulukira pa mapindi khumi na ibodzi a nguwo yakusasanywa na ubweya wa mbuzi.

¹⁵Iwo adapisasanya pyonsene sasawa, ulaphiache makhono khumi na atatu, pontho umimbache makhono mawiri.[53]

¹⁶Iwo adasonera mapindi mashanu pabodzi pene mbapikhala chinguwo chibodzi chikulu, pontho mapindi anango atanthatu adapisonera pabodzi kukhalambo chinguwo chibodzi chikulu.

¹⁷Iwo adaikha magango makumashanu m'khundu mwa phindi yakumalisa ya chinguwo chibodzi chikulu, pontho adaikha magango makumashanu paphindi yakumalisa chinguwo chinango chikulucho.

¹⁸Iwo adasasanya ngoloweko zankuwa makumashanu zakuphatanizira nazo nguwo ziwiri zikulu zile, towera chikhale chinguwo chibodzi chamumphu.

¹⁹Iwo adasasanya pyakuphimba napyo pinango piwiri, chibodzi chakusasanywa na nthembe za mabira amuna zakuikhwa tinta yakufira, chinango cha nthembe zakufewa chakuphatiswa basa kuphimba nacho chakunja.

²⁰Iwo adasasanya matabwa akuimirisa akesha kuphatiswa basa pa Chikhumbicho.

²¹Thabwa yonsene ulaphiache ukhali makhono manayi, pontho umimbache ukhali wakulapha kufika m'ntchafu,[54]

²²na mitsomeko miwiri kumakhundu mawiri a thabwa, towera matabwa akwanise kuphatanizwa. Matabwa onsene akhali na mitsomeko yeneyi.

²³Iwo adasasanya matabwa makumawiri kuti akhale kukhundu yakumwera,

²⁴pontho mathako makumanayi asiliva kuti apite pansi pa matabwawo, mathako mawiri pathabwa ibodzi pansi pa mitsomeko yache miwiri.

²⁵Iwo adasasanya matabwa makumawiri kuti akhale kukhundu yakumpoto ya Chikhumbi,

²⁶na mathako asiliva makumanayi, mawiri pansi pa thabwa ibodzi.

²⁷Iwo adasasanya matabwa matanthatu kuikhwa kunduli kwa Chikhumbi, kumadokero dzuwa kwache,

²⁸pontho matabwa mawiri a m'nkhomo.

²⁹Matabwa a m'nkhomozi adaphatanizwa kubulukira pansi mpakana padzulu. Matabwa mawiri, ale adasasanya m'nkhomo ziwiri, adasasanywa sasawa.

³⁰Tenepo pakhali matabwa masere akukhala na mathako asiliva khumi na atanthatu, mawiri pansi pa thabwa ibodzi.

³¹Iwo adasasanya mitandaliko khumi na mishanu yakesha, mishanu ya matabwa kukhundu ibodzi ya Chikhumbi,

³²mishanu ya matabwa kukhundu yakumadokero dzuwa, kunduli kwa Chikhumbi.

³³Mtandaliko wa pakati ufike pakati na kati pa phembo ya matabwa kubulukira kukhundu ibodzi ya Chikhumbi kufikiratu khundu inango ya Chikhumbi.

³⁴Iwo adakukutiza matabwawo na golidi mbafekamo mphete zagolidi kuphatisa mitandaliko, ile pontho idakukutizwa na golidi.

³⁵Iwo adasasanya chinguwo chakufewa chakulukwa mwaluso na usalu wachoza, msuzi wanyemba na wakufira mbaithemesera na pyakulengwa pyakukhala na maphaphido.

³⁶Iwo adasasanya mizati minayi ya matabwa akesha akukukutizwa na golidi, kuphatisa chinguwocho. Iwo adafekamo ngoloweko zagolidi mbasasanya mathako manayi asiliva kuphatisa mizatiyo.

³⁷Iwo adasasanya chinguwo chakufewa chakulukwa mwaluso na usalu wachoza, msuzi wanyemba na wakufira chakuthemeserwa mwadidi kutchinga nacho msuwo wa Chikhumbi.

³⁸Kuphatisira chinguwochi iwo adasasanya mizati mishanu yakukhala na ngoloweko, padzulu pawo, na mitandaliko yawo yakukukutizwa na golidi. Iwo adasasanya mathako mashanu ankuwa, towera aikhwe pansi pa mizatiyo.