Read cisena KUBULUKA 37 Bible Online

KUBULUKA 37 - cisena bible

KUBULUKA 37

¹Bezalele adasasanya Bokosi ya Chiverano na matabwa akesha, ulaphiache khono ibodzi na dzanja, umimbache ukhali wakulapha kufika m'ntchafu, pontho chengo chache[55] chakulapha kufika m'ntchafu.

²Iye adaikukutiza na golidi chadi-chadi kuzungulira m'bwalo na kunja kwene mbaikha chigundiro chagolidi kuizungulira.

³Iye adasasanya mphete zinayi zagolidi zakuthukulira, mbazifeka kumiyendo yache minayi yakukhala na mphete ziwiri kukhundu zonsene ziwiri.

⁴Iye adasasanya miti yakuthukulira minayi yakesha mbaikukutiza na golidi,

⁵pontho adapitisa mphete kukhundu zonsene ziwiri za bokosi.

⁶Iye adasasanya mphampha yagolidi chadi-chadi, ulaphiache khono ibodzi na dzanja, pontho umimbache ukhali wakulapha kufika m'ntchafu.[56]

⁷Iye adasasanya pyakulengwa piwiri pyakukhala na maphaphido pyagolidi wakuchita kufulwa na nyundo kukhundu ziwiri za mphampha,

⁸chibodzi kukhundu ibodzi, chinangombo kukhundu inango. Iye adapisasanya kuti pikhale phindi ibodzi ene na mphampha.

⁹Pyakulengwa pyakukhala na maphaphidopyo pidayang'anisana, pontho pidafuthula maphaphido awo kuphimbira mphamphayo.

¹⁰Iye adasasanya thebulu na matabwa akesha, ulaphiache khono ibodzi, umimbache kati ya khono, pontho chengo chache[57] chakulapha kufika m'ntchafu.

¹¹Iye adaikukutiza na golidi chadi-chadi mbaikha chigundiro chagolidi m'nkhomo zache kuzungulira thebulu yonsene.

¹²Iye adasasanya chigundiro chakukhala na mapembo, akulapha ninga chala chapakati cha m'manja, kuzungulira thebuluyo na kuikha mthimba wagolidi kuzungulira chigundirocho.

¹³Iye adasasanya mphete zinayi zakuthukulira zagolidi mbaziikha kunkhomo zinayi kumiyendo.

¹⁴Mphete zakuphatisa miti yakuthukulira thebuluyo zidaikhwa chifupi na chigundiro cha mapembocho.

¹⁵Iye adasasanya miti yakuithukulira yakesha, mbaikukutiza na golidi.

¹⁶Iye adasasanya pyombo pya thebuluyo na golidi chadi-chadi: mapalato na piwaya pyakufukizira pyakununkhira, pontho pitomba na ndilo pyakuphatisira basa kupereka nsembe ya chakumwa.

¹⁷Iye adasasanya chakuikhirapo nyale chagolidi chadi-chadi, thako na manungo ache pidachitwa kufulwa na nyundo; maluwache akuthemesera nawo, kuthimizapo mphukira na maluwa kusasanya phindi ibodzi ene na chakuikhirapo nyale.

¹⁸Nthambi zitanthatu zidaphutchukira khundu zache, nthambi zitatu kukhundu ibodzi, nthambi zinango zitatu kukhundu inangoyo.

¹⁹Nthambi zonsene zitanthatu zikhali na maluwa matatu akuthemesera akuoneka ninga maluwa a muti wamfula akukhala na mphukira na maluwa.

²⁰Manungo a chakuikhirapo nyale akhali na maluwa akuthemesera manayi akuoneka ninga maluwa a muti wamfula akukhala na mphukira na maluwa.

²¹Pakhali mphukira ibodzi pansi pa nthambi ziwiri zonsene.

²²Mphukirazo, nthambi zache, pontho chakuikhirapo nyale pikhali phindi ibodzi pyagolidi chadi-chadi wakuchitwa kufulwa.

²³Iye adasasanya nyale zinomwe pachakuikhirapo nyale chibodzi, pontho na chakukwizira tsakalache na pyakuwolera dotha pyache pyagolidi chadi-chadi.

²⁴Iye adaphatisa basa golidi chadi-chadi wakulemera makilogramu makumatatu na mashanu kusasanyira chakuikhirapo nyalecho na pinthu pyache pyonsene.

²⁵Iye adasasanya guwa na matabwa akesha yakufukizirapo pyakununkhira. Nkhomo zache zonsene zikhali sasawa, ulaphiache ukhali kati ya khono, umimbache kati ya khono, pontho chengo chache[58] chikhali khono ibodzi. Nyanga zache nkhomo zinayi zathema kukhala phindi ibodzi na guwayo.

²⁶Iye adakukutiza padzulu pache, makhundu ache onsene manayi, na nyanga zache zene na golidi chadi-chadi, pontho adaikha chigundiro chagolidi m'nkhomo zache zinayi kuzungulira.

²⁷Iye adasasanya mphete zakuthukulira ziwiri zagolidi mbaziphatisa pansi pa chigundiro kumakhundu mawiri kuphatisa miti yakuthukulira guwayo.

²⁸Iye adasasanya miti yakuthukulira yakesha mbaikukutiza na golidi.

²⁹Iye adasasanya pontho mafuta akupambulika akudzoza nawo, pontho na pyakununkhira pyakufukiza pyakusasanywa na nyaluso pakuvungaza pyakununkhira.