Read cisena KUBULUKA 38 Bible Online

KUBULUKA 38 - cisena bible

KUBULUKA 38

¹Iye adasasanya guwa yakuperekerapo nsembe zakupyerera na matabwa akesha. Nkhomo zache zikhali zonsene sasawa, ulaphiache ukhali makhono mawiri na kati ya khono, umimbache ukhali makhono mawiri na kati ya khono, pontho chengo chache[59] chikhali khono ibodzi na kati ya khono.

²Iye adasasanya nyanga padzulu pa nkhomo zinayi, towera pyonsene na guwayo pikhali phindi ibodzi ene. Iye adapikukutiza na nkuwa pyonsenepyo.

³Iye adasasanya pinthu pya paguwa: supulia akugweramo dotha, mafosholo, ndilo, pyakujobolera nyama na chiwaya chakugasirapo moto. Pinthu pyonsenepi pidasasanywa na nkuwa.

⁴Iye adasasanya waya wa mangalade wankuwa mbaaikha pansi magulupiya a paguwayo, towera abwerere pakati m'bwalo mwa guwayo.

⁵Iye adasasanya mphete zinayi zakuthukulira mbaziikha m'nkhomo zache.

⁶Iye adasasanya miti yakuithukulira yakesha mbaikukutiza na nkuwa,

⁷pontho adaikha m'mphete kukhundu ziwiri zonsene za guwa. Guwayo idasasanywa na matabwa mbikhala na benga m'bwalo mwache.

⁸Iye adasasanya mphale yakukhala na thako yankuwa, kubulukira kugilazi yankuwa yakuperekwa na akazi, ale akhaphata basa pamsuwo wa Chikhumbi cha Mulungu.

⁹Iye adasasanya mpanda wa Chikhumbi cha Mulungu na chinguwo chakufewa. Kukhundu yakumwera chinguwocho chikhali ulaphiache makhono makumanayi na anayi,[60]

¹⁰chakuphatiswa na mizati makumawiri ankuwa m'mathako makumawiri ankuwa, akukhala na ngoloweko pontho na mitandaliko pyasiliva.

¹¹Pyontho-pyonthopyo pidachitwa kukhundu yakumpoto ya mpandawo.

¹²Kukhundu yakumadokero dzuwa chinguwo chikhali ulaphiache makhono makumawiri na mawiri,[61] chakukhala na mizati khumi, pontho na mathako khumi, na ngoloweko pontho na mitandaliko yasiliva.

¹³Kukhundu yakumabulukiro dzuwa, kuna msuwo kule, mpandawo ukhali ulaphiache makhono makumawiri na mawiri.

¹⁴Kukhundu yonsene ya msuwo kukhali ulaphiache makhono matanthatu na kati ya khono[62] a chinguwo, akukhala na mizati mitatu, pontho na mathako matatu.

¹⁶Chinguwo chonsene chakuzungulira mpandawo chidasasanywa na nguwo yakufewa.

¹⁷Mathako a mizati yonsene adasasanywa na nkuwa, pontho ngoloweko na mitandaliko, na chapadzulu cha mizati pidasasanywa na siliva. Mizati yonsene yakuzungulira padzulu idaphatanizwa na mitandaliko yasiliva.

¹⁸Chinguwo cha pamsuwo wa mpanda chikhali chakusasanywa na nguwo yakufewa ya usalu wa choza, msuzi wanyemba na wakufira chakuthemesera mwadidi. Icho chikhali ulaphiache makhono mafemba, chengo chache[63] makhono mawiri ninga chinguwo cha mpanda.

¹⁹Icho chidaphatiswa na mizati minayi m'mathako manayi ankuwa. Ngoloweko zawo, pya padzulu na mitandaliko yawo pidasasanywa na siliva.

²⁰Ntchiri zonsene zakuphatisa nkhambala za Chikhumbi na mpandache ene pidasasanywa na nkuwa.

²¹Ufu ndi nyandandanda wa utale wakuphatiswa basa m'Chikhumbi cha Mulungu, mule mukhakoyiwa pyakulemberapo piwiri pyamiyala pale pakhadalembwa Matongero Khumi. Nyandandanda udatongwa na Mose mbulembwa na anthu a dzinza ya Levi, ale adaphata basa mwakuyang'anirwa na Itamara, mwana Aroni nyansembe.

²²Bezalele, mwana Uri, pontho mdzukuluache Huri, wa dzinza ya Yuda adasasanya pyonsene pikhatonga MBUYA pile.

²³Nyakumphedzerache, Oholiabu, mwana Ahisamaki, wa dzinza ya Dani, akhali nyakulemba ninga nyakulemba chidindo nyakutanda makhaliro a chinthu, pontho nyakuluka nguwo zakufewa zachoza, msuzi wanyemba na zakufira.

²⁴Golidi onsene, ule akhadaperekwa kuna MBUYA kuphatisirwa basa pa Chikhumbi cha Mulungu, kulemera kwache kudakwana makilogramu chikwi malingana na mdida ukhaphatiswa basa ndzidzi wenewo.

²⁵Siliva kubulukira kuna anthu, adalembwa ale, adalemera makilogramu pikwi pitatu na madzana manayi na makumatatu, malingana na mdida wa ndzidzi wenewo.

²⁶Penepi pidandendemera na pyonsene pidapagalwi na munthu onsene pandzidzi wa kulembera, munthu onsene kupagali pikhafunikapyo, malingana na mdida wa ndzidzi wenewo. Penepo pakhali amuna pikwi pitanthatu na pitatu na madzana ashanu na makumashanu akukwanisa pyaka makumawiri pyakubalwa penu kupiringana penepo adalembwa ale.

²⁷Kulemera kwa siliva kukhali makilogramu pikwi pitatu na madzana manayi adaphatisirwa basa kusasanyira mathako dzana a Chikhumbi cha Mulungu, pontho na nguwo, kulemera kwache kukhali makilogramu makumatatu na anayi pa thako ibodzi.

²⁸Na kulemera makilogramu makumatatu kwakusalira kwa siliva, Bezalele adasasanya mitandaliko, ngoloweko za pamizati na pya padzulu pawo.

²⁹Nkuwa wakuperekwa kuna MBUYA udalemera makilogramu pikwi piwiri na madzana manayi na makumawiri na ashanu.

³⁰Na nkuwa iye adasasanya mathako a pamsuwo wa Chikhumbi cha Mulungu, guwa yankuwa yakukhala na mangalade ankuwa, pinthu pyonsene pya guwa yansembe,

³¹mathako akuzungulira mpanda na a msuwo pampanda, pontho ntchiri zonsene zakuphatisa nkhambala zakuzungulira mpanda onsene.