Read cisena KUBULUKA 39 Bible Online

KUBULUKA 39 - cisena bible

KUBULUKA 39

¹Na usalu wachoza, msuzi wanyemba na wakufira iwo adasasanya nguwo zakukoma m'maso, zile zidathema kuvala anyansembe ndzidzi ukhaenda iwo kaphata basa m'Mbuto Yakuchena. Iwo adasasanyira Aroni nguwo za unyansembe, ninga mukhadatongera MBUYA kuna Mose.

²Iwo adasasanya efodi wa nguwo yakufewa; usalu wachoza, msuzi wanyemba na wakufira; pontho na usalu wagolidi.

³Iwo adakhoma maphaphi akutetepa agolidi mbaulenjalenja, towera piphatiswe basa panguwo zakufewa, pontho na usalu wachoza, msuzi wanyemba na wakufira.

⁴Iwo adasasanya nthambo ziwiri za m'mapewa za efodi mbazimangirira kukhundu zache, towera chileke kugwa.

⁵Bande yakufewa yakuchita kulukwa mwaluso idasasanywa na pinthu pyontho-pyonthopyo idaphatiswa kuefodi, towera bande na efodi pikhale phindi ibodzi ninga mukhadatongera MBUYA kuna Mose.

⁶Iwo adasasanya miyala miwiri ya onikisi mbaiikha m'pyakuikhiramo pyagolidi mbachilembapo ninga chidindo chakukhala na madzina a ana khumi na awiri achimuna a Yakobo.

⁷Iye adapiikha m'nthambo za m'mapewa za efodi kuimirira madzinza khumi na awiri a Israele, ninga montho mukhadatongera MBUYA kuna Mose.

⁸Iwo adasasanya chapagangafuwa pakuphatisa basa pinthu pyontho-pyonthopyo pya pa efodi, pontho chakuthemeserwa sasawa.

⁹Nkhomo zache zonsene zikhali sasawa, pontho chakufunywa kawiri. Ulaphiache ukhali dzanja ibodzi, pontho umimbache ukhalimbo dzanja ibodzi.[64]

¹⁰Iwo adaikha miyala yakudula m'mizera minayi; mzera wakutoma adaikha rubi, topazi na garaneti;

¹¹mzera wachiwiri, emeradi, safire na daimondi;

¹²mzera wachitatu, yasinti, agate na ametisiti;[65]

¹³pontho mzera wachinayi berili, onikisi na yasipere. Miyala yeneyi idaikhwa m'pyakuikhiramo pyagolidi pile.

¹⁴Mwala onsene mwa miyala khumi na awiriyi padalembwapo dzina ibodzi ya ana achimuna a Yakobo, kuimirira madzinza khumi na awiri a Israele.

¹⁵Pya chapagangafuwa iwo adasasanya njema zagolidi chadi-chadi zakupotwa ninga nkhambala.

¹⁶Iwo adasasanya mphete ziwiri zagolidi pontho na pyakuthemesera piwiri pyagolidi pyakuoneka ninga kaluwa mbaziphataniza kunkhomo za kudzulu za chapagangafuwa.

¹⁷Iwo adaikha kumphete ziwiri nkhambala ziwiri zagolidi zile

¹⁸mbaikha nkhambala ziwiri zinango kupyakuthemesera piwiri pyagolidi pile mbaziphataniza kutsogolo kwa nthambo za m'mapewa za efodi.

¹⁹Iwo adasasanya mphete ziwiri zagolidi mbaziphataniza kunkhomo zapansi kwa chapagangafuwa m'khundu-khundu m'bwalo chifupi na efodi.

²⁰Iwo adasasanya mphete zinango ziwiri zagolidi mbaziikha kupansi kutsogolo kwa nthambo ziwiri za efodi chifupi na msono, pontho padzulu pa bande yakuchita kulukwa.

²¹Ninga montho mukhadatongera MBUYA kuna Mose, iwo adamangirira mphete za chapagangafuwa kumphete za efodi na nkhambala yachoza, towera chapagangafuwa chikhale padzulu pa bande, pontho kuti chikhonde lera.

²²Mkhanjo ule umbakhala pansi pa efodi udasasanywa onsene na nguwo yachoza.

²³Benga yakupitisira msolo idaikhwa chigundiro chakuchita kulukwa m'bwalo mwache kuti ileke ng'ambika.

²⁴Kuzungulira pansi pa chikhwayeti cha mkhanjo adaikha mavulere akulukwa na nguwo yakufewa pontho na usalu wachoza, msuzi wanyemba na wakufira wakuoneka ninga ntheme, pontho pakati pa ntheme na ntheme pakhali belo yagolidi chadi-chadi kuzungulira chikhwayeti, ninga montho mukhadatongera MBUYA kuna Mose.

²⁷Iwo adasasanyira Aroni na anache mayala,

²⁸nduwira, akamdedzi, makapundu,

²⁹pontho na mthimbalimba na nguwo yakufewa, pontho na usalu wachoza, msuzi wanyemba na wakufira wakuthemeserwa mwaluso, ninga montho mukhadatongera MBUYA kuna Mose.

³⁰Iwo adasasanya chinthu chakuphaphathika chagolidi chadi-chadi kukhala chidzindikiro chakupambulika mbalemba ninga chidindo kuti, “Kupambulika kuna MBUYA.”

³¹Iwo adachimangirira kutsogolo kwa nduwira na nkhambala yachoza, ninga montho mukhadatongera MBUYA kuna Mose.

³²Basa yonsene pa Chikhumbi cha Mulungu idaphatika monsene mwene. Aisraele adasasanya pyonsene ninga montho mukhadatongera MBUYA kuna Mose.

³³Iwo adadza na Chikhumbicho kuna Mose, pontho na pinthu pyache pyonsene: ngoloweko zache na matabwa, mitandaliko yache, mizati yache na mathako ache ene;

³⁴chinguwo chache chakuphimba nacho pansoyi cha nthembe za mabira amuna zakuikhwa tinta yakufira, chinguwo chakuphimba nacho cha nthembe zakufewa, pontho na chinguwo chakuphimba nacho chakunja;

³⁵Bokosi ya Chiverano, miti yache, mphamphache;

³⁶thebulu, na pyombo pyache pyonsene, pontho mkate wakuperekwa kuna MBUYA;

³⁷chakuikhirapo nyale chagolidi chadi-chadi, nyale zache, pinthu pyache pyonsene na mafuta a nyale;

³⁸guwa yansembe yagolidi; mafuta akudzoza nawo; pyakufukiza pyakununkhira; chinguwo chakutchinga nacho pamsuwo wa Chikhumbi;

³⁹guwa yankuwa yakukhala na mangalade, miti yache yakuthukulira, na pinthu pyache pyonsene; mphale na thako yache;

⁴⁰chinguwo chakutchinga nacho mpanda; mizati yache na mathako ache; nguwo yakutchinga nayo pamsuwo wa mpanda na nkhambala zache; ntchiri zache; pinthu pyache pyonsene pya m'Chikhumbi cha Mulungu;

⁴¹pontho nguwo zakukoma m'maso zathema kuvala anyansembe ndzidzi unaphata iwo basa m'Mbuto Yakuchena, zenezi nguwo zakupambulika za Aroni, nyansembe na anache achimuna.

⁴²Aisraele adaphata basa yonsene ninga mudatongera MBUYA kuna Mose.

⁴³Mose adayang'ana mwadidi pyonsene mbaona kuti iwo akhadasasanya pyonsenepyo ninga mukhadatongera MBUYA. Natenepo Mose adaatsanzayisa.