Read cisena KUBULUKA 4 Bible Online

KUBULUKA 4 - cisena bible

KUBULUKA 4

¹Tenepo Mose adamtawira MBUYA mbati, “Mwinango Aisraele anakhonda kandikhulupira penu kavesera pinaapanga ine. Ndikachite tani ngakhala iwo analonga kuti imwe hamudandionekera tayu?”

²Tenepo MBUYA adavunza mbati, “Ninji chaphatira iwe m'manja mwakomo?” Iye adatawira mbati, “Ndodo.”

³MBUYA adalonga mbati, “Iponye pansi.” Pidaiponya Mose pansi, idasanduka nyoka, iye mbaithawa.

⁴Tenepo MBUYA adalonga kuna Mose mbati, “Kotama uilokote na kumchira kwacheko.” Mose adakotama mbaiphata, tenepo nyokayo idasanduka pontho ndodo m'manja mwache.

⁵MBUYA adalonga mbati, “Kachite penepi kutsikimizira Aisraele kuti MBUYA, Mulungu wa makolo awo, Mulungu wa Abrahamu, Isake na Yakobo akuonekeradi.”

⁶MBUYA adalonga pontho kuna Mose mbati, “Pitisa dzanjako mumkhanjo mwako.” Mose adaveradi, tenepo pidaibulusa iye, dzanjayo idadzala na matanya akuchena ninga matalala.

⁷Tenepo Mulungu adalonga mbati, “Bwezera mkono wako mumkhanjomo.” Mose adachitadi tenepo, pontho pidaubulusa iye, ndzidzi wenewo ukhali wakuwanga mbukhala montho mwakale ninga manungo ache anango onsene.

⁸Mulungu adalonga mbati, “Ngakhala anakhonda kakukhulupira penu kukwana na chakudodomesa chakutomachi, penepo iwo anakakhulupira na chachiwirichi.

⁹Ngakhala hanakhulupira tayu basi na pyakudodomesa piwiripi, pontho ngakhala hanakavesera pinakaapanga iwe tayu, katunge madzi pang'ono mumkulo wa Nailo mbukakhuthulira pansi. Madziwo anasanduka chiropa.”

¹⁰Mbwenye Mose adalonga kuna MBUYA mbati, “Tayu, Mbuyanga, lekani tuma ine. Ine nkhabe dziwa kulonga mwadidi, podi na kale ene, penu chinchino kubulukira ndzidzi udatoma imwe kulonga na ine. Ine ndine munthu wakulemera lulume pontho wachibubu.”

¹¹MBUYA adalonga kuna iye mbati, “Mbani ambampasa munthu mulomo wache? Mbani ambamchitisa kukhala dodo penu kukhala bewewe? Mbani ambampasa maso penu kumchitisa kukhala boli-boli? Ndine, MBUYA, ambamchitisa tenepo.

¹²Chinchino, ndoko! Ndinakuphedza kulonga, pontho ndinakupanga pyakuti ukalonge.”

¹³Mbwenye Mose adatawira mbati, “Tayu, Mbuya, ndaphata miyendo tumani munthu unango ene.”

¹⁴Na mafala enewa MBUYA adazhangalira Mose mbalonga mbati, “Apo tani mbaleako Aroni, Mlevi? Ndikupidziwa kuti iye anakwanisa kulonga mwadidi. Tenepo, chinchino, iye akudza dzagumanikana nawe, iyembo anakomerwa kukuona.

¹⁵Iwe unakwanisa kulonga kuna iye mbumpanga pyakuti akalonge. Ndinaphedza monsenene awiri kulonga, pontho ndinapanga monsenene awiri pyakuti muchite.

¹⁶Iye anakhala nyakukulongera mbalonga kuna anthu m'mbuto mwako. Tenepo kuna iye iwe unakhala ninga Mulungu, kumpanga iye pyakuti alonge kuna anthu.

¹⁷Kwata ndodoyi, thangwi unachita nayo pyakudodomesa.”

¹⁸Tenepo Mose adabwerera kuna Yetero, tebzalache, mbalonga kuna iye mbati, “Ndaphata miyendo, nditawiriseni kubwerera ku Iguputo kuna abale anga kuti ndikaone ngakhala ana moyo na lero.” Yetero adamtawirisa mbagonekana naye.

¹⁹Mose mbali ku Midiani, MBUYA adalonga kuna iye mbati, “Bwerera ku Iguputo, thangwi onsene akhafuna kukupha ale amala kufa.”

²⁰Tenepo Mose adakwata mkazache na anache achimuna, mbaapakiza pabulu mbaenda nawo ku Iguputo, uku iye m'manja mwache akwata ndodo ikhadampanga Mulungu kuti akwate ile.

²¹MBUYA adalonga pontho kuna Mose mbati, “Podi chinchino ukwenda ku Iguputo, kaonesese kuti wachita pyakudodomesa pyonsene kuna mfumu pakuphatisa basa mphamvu zidakupasa ine kuti uchitire nazo zile. Mbwenye ndinachitisa mtima wa mfumu kukhala wakuuma, tenepo iye hanatawirisa kuti Aisraele abuluke m'dziko mwachemo tayu.

²²Natenepo iwe wathema kampanga mfumuyo kuti ine, MBUYA, ndikulonga kuti, ‘Israele ndi mwananga wamamuna wautombo.

²³Ndidakupanga kuti umtawirise mwananga wamamunayo kuti aende, towera akandipembedza, mbwenye iwe udakhonda pyako. Chinchino ndinati ndiphe mwanako wamamuna wautombo.’ ”

²⁴Panjira padagonera iwo ulendo wawo ku Iguputo, MBUYA adagumanikana na Mose mbafuna kumpha.

²⁵Tenepo Zipora, mkazache, adalokota mwala wakusongoka mbagwanda nawo mwanache nsonga yachimuna mbakhuya nawo manyalo[7] a Mose. Na thangwi ya kugwanda nsonga yachimuna kweneku, iye adalonga kuna Mose mbati, “Ndiwe mamuna wa chiropa kuna ine.” Natenepo MBUYA hadaphe Mose tayu.

²⁷Ndzidzi wenewu MBUYA akhadalonga kuna Aroni mbati, “Ndoko m'thando yatchetcha ukagumanikane na Mose.” Tenepo iye adenda kagumanikana naye paphiri ya Mulungu. Pidagumanikana iye naye adampsompsona.

²⁸Natenepo Mose adapanga Aroni pyonsene pikhadalonga MBUYA ndzidzi ukhampanga iye kuti abwerere ku Iguputo; iye adampanga pontho pyakudodomesa pikhadamtonga MBUYA kuti iye achite pile.

²⁹Tenepo Mose na Aroni adenda ku Iguputo mbakagumanyisa pabodzi akadamu a Aisraele onsene.

³⁰Aroni adaapanga mafala onsene akhadalonga MBUYA kuna Mose ale, tenepo Mose adachita pyakudodomesa pyonsene pamaso pa anthu.

³¹Iwo adakhulupira, pontho pidava iwo kuti MBUYA akhadadza kuna iwo, pontho kuti akhadaona kuvuyiwa kwawo, adalamba pansi mbampembedza.