Read cisena KUBULUKA 40 Bible Online

KUBULUKA 40 - cisena bible

KUBULUKA 40

¹MBUYA adalonga kuna Mose mbati,

²“Pansiku yakutoma ya mwezi wakutoma imisa Chikhumbi cha Mulungu.

³Uikhemo Bokosi ya Chiverano yakukhala na Matongero Khumi, pontho utchinge na chinguwo kutsogolo kwache.

⁴Ikhamo thebulu, pontho pathebulu uikhepo pyombo. Pontho uikhemo chakuikhirapo nyale, tenepo uikhe nyale padzulu pachepo.

⁵Ikhamo guwa yagolidi yakufukizirapo pyakununkhira kutsogolo kwa Bokosi ya Chiverano, pontho umanike chinguwo pamsuwo wa Chikhumbi.

⁶Ikha guwa yakuperekerapo nsembe zakupyerera kunkhope kwa Chikhumbi.

⁷Ikha mphale yankuwa pakati pa Chikhumbi na guwa yansembe mbuidzaze na madzi.

⁸Umange mpanda kuzungulira Chikhumbicho, pontho umanike chakutchinga nacho pamsuwo pache.

⁹“Tenepo pambula Chikhumbi na pinthu pyache pyonsene pakuidzoza na mafuta akupambulika, tenepo inakhala yakuchena.

¹⁰Kubuluka penepo pambula guwa yansembe na pinthu pyache pyonsene, natenepo inakhala yakuchena.

¹¹Pambula mphale na thako yache ninga monthomo.

¹²“Idza na Aroni na anache achimuna pamsuwo wa Chikhumbi cha Mulungu, pontho uasambise na madzi.

¹³Vazika Aroni nguwo za unyansembe, mdzoze, pontho umpambule, towera akwanise kundiphatira basa ya unyansembe.

¹⁴Idza na anache, tenepo uavazike mayala.

¹⁵Tenepo uadzoze ninga montho mudadzozera iwe babawo, towera akwanise kundiphatira basa ya unyansembe. Kudzoza kweneku kunapambulira pidzukulu pyawo kuphata basa ya unyansembe mifendu yonsene inadzayo.”

¹⁶Mose adachita pyonsene ninga montho mukhadatongera MBUYA.

¹⁷Tenepo pansiku yakutoma ya mwezi wakutoma wa chaka chachiwiri pidabuluka iwo m'dziko ya Iguputo, Chikhumbi cha Mulungu chidamangwa.

¹⁸Mose adaikha pansi mathako ache, adaimisa matabwa, adaikha mitandaliko ache mbaimisa mizati yache.

¹⁹Iye adafuthula chinguwo chakuphimba nacho Chikhumbi mbaikha chakuphimba nacho chakunja, ninga montho mukhadatongera MBUYA.

²⁰Tenepo adakwata pyakulemberapo piwiri pyamiyala mbapiikha m'Bokosi ya Chiverano. Iye adaikha miti m'mphete za bokosiyo mbaikha mphampha padzulu pache.

²¹Tenepo adamanika chinguwo chakutchinga nacho bokosiyo m'Chikhumbi. Penepa iye adatchinga Bokosi ya Chiverano, ninga montho mukhadatongera MBUYA.

²²Iye adaikha thebulu m'Chikhumbi kukhundu yakumpoto kunja kwa chinguwo,

²³pontho adaikha pathebulu mkate wakuperekwa kuna MBUYA, ninga montho mukhadatongera MBUYA.

²⁴Iye adaikha m'Chikhumbimo chakuikhirapo nyale kukhundu yakumwera kuyang'anisana na thebulu,

²⁵tenepo adagasa nyale pamaso pa MBUYA, ninga montho mukhadatongera MBUYA.

²⁶Iye adaikha guwa yagolidi m'Chikhumbimo, kutsogolo kwa chinguwo,

²⁷mbafukizapo pyakununkhira, ninga montho mukhadatongera MBUYA.

²⁸Iye adamanika chinguwo pamsuwo wa Chikhumbi,

²⁹pontho kutsogolo kwa chinguwocho iye adaikha guwa yakuperekerapo nsembe zakupyerera mbaperekapo nsembe zakupyerera na nsembe za mapira ninga montho mukhadatongera MBUYA.

³⁰Iye adaikha mphale pakati pa Chikhumbi cha Mulungu na guwa yansembe mbaidzaza na madzi.

³¹Mose, Aroni na anache adasamba manjawo mbatsuka manyalo awo penepo

³²ndzidzi onsene ukhapita iwo m'Chikhumbi penu kuguwa yansembe, ninga montho mukhadatongera MBUYA.

³³Mose adamanga mpanda kuzungulira Chikhumbi na guwa yansembe mbaikha chinguwo chakutchinga nacho pamsuwo wa mpanda. Tenepo iye adamalisa basa yonsene.

³⁴Tenepo makole adaphimba Chikhumbi cha Mulungu, pontho demelero ya MBUYA idadzala m'Chikhumbicho.

³⁵Na thangwi yakuti makole adatchitha pa Chikhumbi cha Mulungu, pontho kuti demelero ya MBUYA ikhadadzala m'Chikhumbimo, Mose hadakwanise tayu kupita m'Chikhumbi mule.

³⁶Aisraele akhafulusa msasa kwenda mbuto inango ngakhala makole anathukuka kubuluka pa Chikhumbipo.

³⁷Ndzidzi ukhakhala makole penepo, iwo hakhafulusa msasawo kamanga mbuto inango tayu.

³⁸Ndzidzi onsene wa ulendo wawo, Aisraele onsene adakwanisa kuona makole akuonesa kuti MBUYA alipo padzulu pa Chikhumbi na masikati, pontho na moto wakugaka padzulu pache na mosiku.