Read cisena KUBULUKA 6 Bible Online

KUBULUKA 6 - cisena bible

KUBULUKA 6

¹Tenepo MBUYA adalonga kuna Mose mbati, “Chinchino unati uone pinafuna ine chita kuna mfumu. Ndinamkhakhamiza kutawirisa anthu anga kuti aende. Ndinati ndimkhakhamize maka-maka kuabulusa m'dziko mwachemo.”

²Mulungu adalonga kuna Mose mbati, “Ine ndine MBUYA.

³Ine ndidaonekera kuna Abrahamu, Isake na Yakobo ninga Mulungu Wamphamvu zonsene, mbwenye sidapichite ndekha ene tayu kudziwika kuna iwo na dzinanga yakuchena, MBUYA.[8]

⁴Ndidachita pontho chiverano nawo mbandiapanga kuti ndinaapasa dziko ya Kanani, dziko ile ikhadakhala iwo ninga alendo.

⁵Chinchino ndava kubulira kwa Aisraele, ale adaikhwa paubitchu na anthu a ku Iguputo, tenepo ine ndakumbuka chiverano chidachita ine na iwo.

⁶Tenepo panga Aisraele kuti ine ndikulonga kuna iwo kuti, ‘Ine ndine MBUYA; ine ndinakupulumusani mbandikusudzulani panyatwa ya ubitchu mu Iguputo na mkono wanga wamphamvu. Ndinaatchunyusa pikulu mbandikupulumusani.

⁷Ndinakusanduzani kukhala anthu anga, inembo ndinakhala Mulungu wanu. Penepo imwe munadziwa kuti ine ndine MBUYA, Mulungu wanu, ndingakusudzulani paubitchu mu Iguputo.

⁸Ndinakudzesani kudziko, ile idadumbira ine kuna Abrahamu, Isake na Yakobo; mbandiipereka kuna imwe kukhala yanu ene. Ine ndine MBUYA.’ ”

⁹Mose adalonga penepi kuna Aisraele, mbwenye iwo hadamvesere tayu, thangwi mitimawo idasanyika pikulu na ubitchu wakuphawu.

¹⁰Tenepo MBUYA adalonga kuna Mose mbati,

¹¹“Ndoko kapange mfumu kuti iye athema kutawirisa Aisraele kubuluka m'dziko mwachemo.”

¹²Mbwenye Mose adatawira mbati, “Ngakhala Aisraele hakundivesera tayu, apo ndi tani na mfumuyo? Ine ndine munthu pyache wamathatha.”

¹³Tenepo MBUYA adatonga Mose na Aroni mbati, “Pangani Aisraele na mfumu ene wa ku Iguputo kuti ndakutongani ndine kutsogolera Aisraele kubuluka mu Iguputo.”

¹⁴Rubeni, mwana wamamuna wautombo wa Yakobo, akhali na ana anayi achimuna: Hanoki, Palu, Hezironi na Karimi; iwo akhali makolo a mbumba adakwata madzinawo ale.

¹⁵Simioni akhali na ana atanthatu achimuna: Yemuele, Yamini, Ohadi, Yakini, Zohari na Shauli, mwana wamamuna wa mkazi wa ku Kanani; iwo akhali makolo a mbumba adakwata madzinawo ale.

¹⁶Levi akhali na ana atatu achimuna: Gereshoni, Kohati na Merari; iwo akhali makolo a mbumba adakwata madzinawo ale. Levi adakhala moyo pyaka dzana na makumatatu na pinomwe.

¹⁷Gereshoni akhali na ana awiri achimuna: Libini na Shimei: iwo akhali na pidzukulu pizinji.

¹⁸Kohati akhali na ana anayi achimuna: Amuramu, Izihara, Hebroni na Uziele. Kohati adakhala moyo pyaka dzana na makumatatu na pitatu.

¹⁹Merari akhali na ana awiri achimuna: Mahili na Mushi. Enewa ndi mbumba ya Levi na pidzukulu pyawo.

²⁰Amuramu adasemba Yokebedi, nyamaingache babache, ule adabala Aroni na Mose. Amuramu adakhala moyo pyaka dzana na makumatatu na pinomwe.

²¹Izihara akhali na ana atatu achimuna: Kora, Nefegi na Zikiri.

²²Uzielembo akhali na ana atatu achimuna: Mishaele, Elizafani na Sitiri.

²³Aroni adasemba Elisheba, mwana wamkazi wa Aminadabu, pontho nyamaingache Nashoni; iye adambalira Nadabu, Abihu, Eleazara na Itamara.

²⁴Kora akhali na ana atatu achimuna: Asiri, Elikana na Abiasafu; enewa akhali makolo a mbumba akhadapambuka kuna mbumba ya Kora ale.

²⁵Eleazara, mwana Aroni, adasemba mbodzi wa ana achikazi a Putiele mbabala naye Finiasi. Enewa akhali akadamu a mbumba ya m'dzinza ya Levi malingana mabanjawo.

²⁶Nkhuna amuna enewa, Aroni na Mose, kudalonga MBUYA mbati, “Tsogolerani Aisraele kubuluka mu Iguputo.”

²⁷Iwo akhali amuna ale adapanga mfumu wa ku Iguputo kuti abuluse Aisraele mu Iguputo. Anthu ache ngonthowa Mose na Aroni.

²⁸Pidalonga MBUYA kuna Mose m'dziko ya Iguputo,

²⁹adalonga mbati, “Ine ndine MBUYA. Panga mfumu wa ku Iguputo pyonsene pinakupanga ine.”

³⁰Mbwenye Mose adatawira mbati, “Imwe mukupidziwa kuti ine ndine munthu pyache wamathatha, apo pinakwanisika tani kuti mfumu akandivesere?”