Read cisena KUBULUKA 7 Bible Online

KUBULUKA 7 - cisena bible

KUBULUKA 7

¹MBUYA adalonga mbati, “Yang'ana, ndinati ndikuchitise kukhala ninga ndiwe Mulungu kuna mfumu, tenepo mbaleako Aroni analonga kuna iye ninga mprofeti wako.

²Panga Aroni pyonsene pyakutonga ine, tenepo iye anapanga mfumu kuti atawirise Aisraele kubuluka m'dziko mwache.

³Mbwenye ndinaumisa mtima wa mfumuyo, tenepo iye hanakuveserani tayu, podi kwene kuti ndichite pidzindikiro na pyakudodomesa pizinji mu Iguputo. Penepo ine ndinadzesa kutchunyuka kukulu pana Iguputo mbandibulusa madzinza a anthu anga mu Iguputomo.

⁵Tenepo anthu a ku Iguputo anapidziwa kuti ine ndine MBUYA ndingafuthula mkono wanga kubulusa Aisraele m'dziko mwawomo.”

⁶Mose na Aroni adachita ninga montho mudaatongera MBUYA.

⁷Pandzidzi ukhalonga iwo kuna mfumu, Mose akhali pyaka makumasere pyakubalwa, Aronimbo akhali na pyaka makumasere na pitatu.

⁸MBUYA adalonga kuna Mose na Aroni mbati,

⁹“Ngakhala mfumu anakafuna kuti mumtsikimizire pakuchita chakudodomesa, ukapange Aroni kuti akwate ndodo yache mbaiponya pansi pamaso pa mfumuyo, tenepo ndodo inasanduka nyoka.”

¹⁰Tenepo Mose na Aroni adenda kuna mfumu mbakachita ninga montho mukhadaapangira MBUYA. Aroni adaponya ndodo yache pansi pamaso pa mfumu na mathubu ache, ndodoyo idasanduka nyoka.

¹¹Mfumu adachemeresa amunache anzeru na anyamatsengache, iwombo adachita chibodzi-bodzi na matsengawo.

¹²Iwo adaponya pansi ndodo zawo mbazisanduka nyoka. Mbwenye ndodo ya Aroni idakhudyula ndodo zawo zonsene zile.

¹³Kwache mfumu akhali wakuuma mtima basi, pontho hadaavesere tayu Mose na Aroni ninga montho mukhadalongera MBUYA.

¹⁴Tenepo MBUYA adalonga kuna Mose mbati, “Mfumu auma mtima pyakwanga mbakhonda kutawira kuti anthu anga aende.

¹⁵Tenepo ndoko na machibese ukagumanikane naye pinatchithira iye kumkulo. Kwata ndodo idasanduka nyoka ile mbukamdikhire pankhomole ya mkulo.

¹⁶Tenepo ukalonge kuna mfumu kuti, ‘MBUYA, Mulungu wa Aheberi, andituma kuti ndikupangeni kuti mutawirise anthu ache kwenda, towera akwanise kumpembedza m'thando yatchetcha. Mbwenye na lero, imwe hamudavere tayu.

¹⁷Mfumu, chinchino MBUYA akulonga kuti munati mumdziwe kuti iye mbani kubulukira pa pinthu pyonsene pinafuna iye kuchita. Yang'anani, ndinamenya madzi mumkulomu na ndodo yanga, tenepo madzi anasanduka chiropa.

¹⁸Nsomba zinafamo, pontho mkulo unanunkha pyakwanga mwakuti anthu onsene a mu Iguputo hanakwanisa kumwamo madzi tayu.’ ”

¹⁹MBUYA adalonga kuna Mose mbati, “Panga Aroni kukwata ndodo yache mbaithonyeza kumikulo, mikhwawa, na mathawale konsene mu Iguputo. Madzi anasanduka chiropa, pontho pamtunda ponsene panakhala chiropa, podi na m'ndilo na m'pitomba mwene munakhala chiropa.”

²⁰Tenepo Mose na Aroni adachita ninga mudaapangira MBUYA. Pamaso pa mfumu na mathubu ache, Aroni adakwiza m'dzulu ndodo yache mbamenya nayo madzi, tenepo madzi onsene mumkulomo adasanduka chiropa.

²¹Nsomba zidafamo, mkulowo udanunkha pyakwanga mwakuti anthu a ku Iguputo hadakwanise kumwamo madzi tayu. Ponsene pene mu Iguputo pakhali chiropa.

²²Tenepo anyamatsenga a mfumu adachita chibodzi-bodzi na matsengawo, kwache mfumu adaumiratu mtima. Mfumu adakhonda kuvesera Mose na Aroni ninga montho mukhadalongera MBUYA.

²³M'mbuto mwache iye adazungunuka mbabwerera pyache m'nyumba mwache yachifumu okhonda ikha konta penepi.

²⁴Anthu onsene a ku Iguputo adakumba m'khundu-khundu mwa mkulo kusaka madzi akumwa, thangwi iwo hadakwanise tayu kumwa madzi a mumkulomo.

²⁵Nsiku zinomwe zidagwanda kubuluka pandzidzi udamenya MBUYA madzi mumkulo mule.