Read cisena KUBULUKA 8 Bible Online

KUBULUKA 8 - cisena bible

KUBULUKA 8

¹Tenepo MBUYA adalonga kuna Mose mbati, “Ndoko kuna mfumu, ukampange kuti MBUYA akulonga kuti, ‘Tawirisa anthu anga kwenda, towera akwanise kandipembedza.

²Ungakhonda ndinati nditchunyuse dziko yako yonsene na anyanchidwe.

³Mkulo wa Nailo unadzala na anyanchidwe mwakuti anabuluka mumkulomo mbakapita m'nyumba mwako, kusubi kwako, patalimba pako m'nyumba za mathubu ako na anthu ako, pontho na mwakuphikira mikate na mwakumunyira mpambo mwene.

⁴Iwo anakukwirakwirani, iwe, anthu ako, pontho na mathubu ako ene.’ ”

⁵MBUYA adalonga kuna Mose mbati, “Panga Aroni kuti aphatire ndodo yache mbathonya nayo kumikulo, mikhwawa, na mathawale, mbachitisa anyanchidwe kubuluka m'madzimo kudza pamtunda.”

⁶Aroni adaphatira ndodo yache mbathonya nayo pamadzi ponsene, natenepo anyanchidwe adabuluka m'madzimo mbaphopha pamtunda ponsene.

⁷Kwache anyamatsenga adaphatisa basa matsengawo, iwombo adachitisa kuti anyanchidwe abuluke m'madzimo kudza pamtunda.

⁸Mfumu adachemeresa Mose na Aroni mbalonga mbati, “Pempherani kuna MBUYA kuti abuluse anyanchidwe, natenepo ndinatawirisa anthu anu kwenda, towera akwanise kapereka nsembe kuna MBUYA.”

⁹Mose adatawira mbati, “Ndinakomerwa pyakwanga kukupemphererani. Longani kwene ndzidzi wathema ine kapempherera, imwe, mathubu anu na anthu anu ene. Tenepo anyanchidwe anamala mbapakhala nee nyanchidwe na mbodzi ene wakusalira kupambula mumkulo wa Nailo mwene basi.”

¹⁰Mfumu adatawira mbati, “Upemphere mangwana.” Mose adalonga mbati, “Ndinachita ninga montho mwapemphera imwe, tenepo munapidziwa kuti nkhabeve unango ninga MBUYA, Mulungu wathu tayu.

¹¹Anyanchidwe anabuluka pakati pa imwe, mathubu anu na anthu anu ene mbapakhala nee nyanchidwe na mbodzi ene wakusalira kupambula mu Nailo basi.”

¹²Tenepo Mose na Aroni adenda pyawo kubuluka pamaso pa mfumu. Mose adapemphera kuna MBUYA kuti abuluse anyanchidwe akhadadzesa iye kuna mfumu ale.

¹³MBUYA adachita ninga mudapemphera Mose, tenepo anyanchidwe m'nyumba, papintalo na m'minda adamala kufa.

¹⁴Anthu a ku Iguputo adaamuluka pamilu mikulu-mikulu, mpakana dziko idanunkha thangwi ya anyanchidwewo.

¹⁵Pidaona mfumu kuti anyanchidwe ale amala kufa, iye adaumisa pontho mtima ninga montho mukhadapilongera MBUYA mule, mfumu hadavesere Mose na Aroni tayu.

¹⁶MBUYA adalonga kuna Mose mbati, “Panga Aroni kuti amenye pansi na ndodo yache, tenepo mu Iguputo monsene fumbi inasanduka matchunya.”

¹⁷Tenepo Aroni adamenya pansi na ndodo yache, tenepo fumbi yonsene mu Iguputo idasanduka matchunya, ale adaumbikira nyama na anthu ene.

¹⁸Anyamatsenga adapiyeserambo kuphatisa basa matsengawo kuti matchunya adzembo, kwache adapichimwana. Matchunya akhali ponsene pene,

¹⁹tenepo anyamatsenga ale adalonga kuna mfumu mbati, “Achita penepi ndi Mulungu!” Mbwenye mfumu adaumisa mtima basi, pontho hadavesere Mose na Aroni tayu ninga montho mukhadapilongera MBUYA.

²⁰MBUYA adalonga kuna Mose mbati, “Mangwana na machibese, ndoko kagumanikane na mfumu pinaenda iye kumkulo mbakumpange kuti MBUYA akulonga kuti, ‘Tawirisa anthu anga kwenda, towera akwanise kandipembedza.

²¹Ndikukucheuza kuti ngakhala unakhonda ndinati ndikutchunyuse na ntchentche pabodzi pene na mathubu ako na anthu ako. M'nyumba za anthu a ku Iguputo munadzala na ntchentche, pontho ponsene pene panakhala ntchentche.

²²Mbwenye sinachita chibodzi-bodzi tayu m'nthemba ya Gosheni, kunakhala anthu anga kule. Kweneko nee kunakhala wumbi-wumbi wa ntchentche tayu, towera mupidziwe kuti ine MBUYA ndili pabasa mu Iguputo muno.

²³Ndinasiyanisa[9] pakati pa anthu anga na anthu ako. Chakudodomesa chenechi chinachitika mangwanawa.’ ”

²⁴MBUYA adagwisa wumbi-wumbi wa ntchentche m'nyumba mwa mfumu na m'nyumba za mathubu ache. Dziko yonsene ya Iguputo idaipiswa na ntchentche.

²⁵Tenepo mfumu adachemeresa Mose na Aroni mbalonga mbati, “Ndokoni kapereke nsembe kuna Mulungu wanu m'dziko montho muno.”

²⁶Mose adatawira mbati, “Kuchita tenepo nee pinakhala pyakuthema tayu, thangwi anthu a mu Iguputo muno anatizunguza angationa tikupereka nsembe kuna MBUYA Mulungu wathu. Ngakhala tinaphatisa basa nyama zenezi mbatidawira anthu a mu Iguputo pakuzipereka nsembe panationa iwopo, anati atiphe na miyala.

²⁷Ife tathema kwenda ulendo wa nsiku zitatu m'thando yatchetcha kapereka nsembe kuna MBUYA, Mulungu wathu, ninga montho mudatitongera iye mule.”

²⁸Mfumu adalonga mbati, “Ndinakutawirisani kwenda kapereka nsembe kuna MBUYA, Mulungu wanu, m'thando yatchetcha, mungakhonda kwenda kutali pyakwanga. Chinchino undipempherere kuna MBUYA.”

²⁹Mose adatawira mbati, “Ndingabuluka kwene pano, ndinati ndikapemphere kuna MBUYA kuti mangwana ntchentche zimale kuna imwe, mathubu anu na anthu ene. Kwache muleke kutinyengeza pontho mbamukhonda kuti anthu aleke kwenda kapereka nsembe kuna MBUYA.”

³⁰Mose adabuluka pana mfumupo mbaenda kapemphera kuna MBUYA,

³¹tenepo MBUYA adachita ninga mudapemphera Mose mule. Ntchentche zidabuluka kuna mfumu, mathubu ache na anthu ache ene; nee padasalave ntchentche na ibodzi ene tayu.

³²Podi na ndzidzi wenewu ene mfumu adaumisa basi mtima mbakhonda kutawirisa anthu kwenda.