Read cisena YOBU 10 Bible Online

YOBU 10 - cisena bible

YOBU 10

¹“Kukhala na moyo ndatopa nako; natenepo vani kudungunya kunachita ineku, pontho ndinati ndilonge pinthu pyandipha mumtima.

²Lekani kundichitisa kukonwa, Mulungu. Ngandipangeni, mseru wache una ine.

³Ayi mphyakuthemadi kuti mundikalire mtima, kukhonda chinthu chidasasanya imwe na manjanu mbamusekerera pinthu pyakuipa pinafuna chita anyamalwa?

⁴Ayi imwe muna maso ninga a anthu? Ayi imwe mumbaonambo pinthu ninga mumbapionera anthu ambafa ale?

⁵Ayi moyo wanu ngwakuvirambo ninga wa munthu? Ayi pyaka pya moyo wanu mphyakuchepambo ninga pya anthu ambafa ale?

⁶Apo thangwi yache ninji mukusakanyula umambalanga, mbamufukula pyakudawa pyachita ine?

⁷Imwe mukupidziwa kuti ine sidadawe tayu, pontho kuti nkhabe munthu na mbodzi ene anakwanisa kundipulumusa m'manja mwanu tayu.

⁸“Manjanu ndiye adandisasanya mbamundiumba. Lero[10] manjanu onthowo ndiye akundivunga.

⁹Kumbukani kuti imwe mudandikanya ninga dongo mbamundisasanya. Apo lero mukundibwezera pontho kufumbi?

¹⁰Imwe mudapasa babanga mphamvu kuti andibale; imwe mudandichitisa kugunkhula m'mimba mwa mama.

¹¹Imwe mudandivazika khanda na mnofu mbamundiphataniza pabodzi pene magogodo na uzingo.

¹²Imwe mudandipasa moyo mbamuonesa kundifuna kwanu kokhonda mala, pontho kundiyang'anira kwanu kwandichitisa kukhala na moyo.

¹³Chinchino ndapidziwa kuti pinthu penepi pikhali mumtima mwanu, pontho kuti mukhasasanya kundichita chilimwawo.

¹⁴Imwe mukhandilonda manyalo kuti muone ngakhala ndinadawa, towera mukhonde kundilekerera.

¹⁵Sindzidzi ine nkhudawa, penepo ine ndili panyatwa zikulu na imwe. Kwache ine ndingachita pyakulungama, imwe nee mumbandifupa tayu. Ine ndiye ndasanyikiratu, pontho pana ine pano ndi manyadzo okhokha.

¹⁶Ngakhala ine ndapikwanisa pyonsene, imwe mumbandisakaza ninga nkhalamu mbamuchita pyakudzudzumisa kupokanyisana na ine.

¹⁷Ndzidzi onsene mumbakhala na mboni zakupokanyisana nane kundizhangalira kwanu kukwenda mbakukula; ndzidzi onsene mumbasasanya pyakundisosa.

¹⁸“Mulungu, thangwi yache ninji mudanditawirisa kubalwa? Mbapidakhala pyadidi mbidafera pyanga m'chikuta

¹⁹mbandipitirira pyanga kumasiye, khala ninga sidaone kunja tayu.

²⁰Moyo wanga wasala papi? Ndilekeni pyanga. Ndilekeni ndikomerwe na ndzidzi wasala na inewu.

²¹Chinchino ndikwenda pyanga, kwache sinabwererave tayu; ndikwenda kudziko ya mdima wakugoswa,

²²kudziko ya mdima na chimpiningu, kule cheza chachecho ndi mdima ene basi.”