Read cisena YOBU 11 Bible Online

YOBU 11 - cisena bible

YOBU 11

¹Natenepo Zofari wa Chinaama adatawira mbati:

²“Ayi nkhabe munthu wakutawira pinthu pyakupupwa pinalongwapi? Ayi munthu anakwanisa kupilungamisa pakulonga pinthu pizinji?

³Yobu, ayi ukunyerezera kuti ife nkhabe kwanisa tayu kukutawira? Ayi ukunyerezera kuti mafalako akusedegula analonga iwewa nkhabe unango nyakukusumulula?

⁴Iwe ukulonga kuti pyalonga iwepi mphyakuona, pontho kuti ndiwe munthu wakusowa chakupokanyisa pamaso pa Mulungu.

⁵Mbwenye ndikhapifuna pyakwanga Mulungu mbadalongapo chinthu, pontho kufungula mulomo kukutawira.

⁶Iye mbadakutchululira pagona nzeru, thangwi nzeru za Mulungu nsakuzwika pyakwanga. Mulungu akukutchunyusa pang'ono kusangiza na mule mudathemera iwe.

⁷“Ayi iwe unakwanisa kudziwa pinthu pyakuzwika pya Mulungu? Ayi iwe unakwanisa kudziwa madire a Nyamphamvu zonsene?

⁸Nzeru za Mulungu zapiringana kuthambo mwakuti iwe nkhabe kwanisa fikako; izo nsakuzwika pyakwanga kupiringana dziko ya anyakufa mwakuti iwe nkhabe kuzidziwa tayu.

⁹Nzeru za Mulungu nsakutambalala pyakwanga kupiringana dziko yapansi, pontho nsakutambalala pyakwanga kupiringana bara.

¹⁰Ngakhala Mulungu anakumanga mbadza nawe kuti utongwe mseru, mbani anakwanisa kumkhondesa?

¹¹Anyakusowa basa onsene, Mulungu ambaadziwa; apo angaona pyakuipa pyawo, iye ambalila kupiyang'ana kwene?

¹²Anthu akupupwa anatoma kukhala anzeru ngakhala bulu wam'tsanga anabala munthu.

¹³“Yobu pereka mtimako kuna Mulungu, pontho kwiza manjako m'dzulu kupemphera kuna iye.

¹⁴Bulusa pyakuipa pyonsene pili chifupi na iwe; pyakudawa pyonsene leka kupitawirisa kukhala m'nyumba mwako.

¹⁵Ungamala penepo unakwanisa kuyenusa nkhope yako mwakusowa manyadzo; unaimira dzololo mwakusowa mantha.

¹⁶Kubuluka penepo nyatwa zako zonsene unaziduwalira; zinaduwalika ninga madzi makulu agwanda kale ale.

¹⁷Moyo wako unaonesa cheza kupiringana cheza cha dzuwa na masikati, pontho ndzidzi wa mdima wa moyo wako unakhala makalakwecha.

¹⁸Iwe unakhala pakupata pontho na chidikhiro chonsene; iwe unatchinjirizwa mbupuma mwadidi.

¹⁹Iwe unagona pyako gada okhonda goswerwa; anthu azinji anakupempha kuti uaphedze.

²⁰Anyakuipa anayang'ana-yang'ana uku m'maso muli bii, mbagumana kuti nkhabe pakuthawira; chidikhiro chawo nkhufa kwene basi.”