Read cisena YOBU 12 Bible Online

YOBU 12 - cisena bible

YOBU 12

¹Tenepo Yobu adatawira mbati:

²“Anyanzeru ndimwe ene basi! Mungafa nzeru zanu munati mufe nazo kubodzi!

³Kwache ine ndina nzeru ningambo imwepo; si kuti mwandipiringana tayu. Mbani anakhonda kupidziwa pyonsene pyalonga imwepi?

⁴Lero ndine chakusekesa kuna ashamwali anga. Munthu adachemera Mulungu mbamtawira ule, ndasanduka chakusekesa podi kwene kuti ndine wakulungama, pontho wakusowa chinthu chakupokanyisa.

⁵Anthu ale ali pakutonthola ambasedegula ale ali panyatwa; ambamanga ndale ale alimbuka kale.

⁶Nyumba za anyakuba zili pamtendere, pontho anyakutikana Mulungu ali pakupata, anthu ale mphamvu zawo ndiye milungu yawo.

⁷“Kwache vunzani nyama, izo zinakufunzisani, penu mbalame, izo zinakupangani,

⁸penu longani na dziko yapansi, iyo inakufunzisani, penu nsomba za m'bara kuti zikupangeni.

⁹Ntchipi papinthu pyonsenepi chinakhonda dziwa kuti mkono wa MBUYA ndiye wachita penepi?

¹⁰Moyo wa pyakulengwa pyonsene uli m'manja mwache, pontho muya wa munthu onsene uli m'manja mwache.

¹¹Ayi khutu himbasiyanisa mafala tayu ninga mumbachitira lulume kulawira pyakudya?

¹²“Ayi nkhalamba nkhabe khala na nzeru tayu? Ayi anthu a mvula zakale nkhabe vesa pinthu?

¹³Mulungu ndiye mwenechiro nzeru na mphamvu; uphungu na kuvesa pinthu mphyache.

¹⁴Chinthu chinagwisa iye, nkhabe unango anakwanisa kuchimanga pontho tayu; munthu anaponya iye m'perezo, nkhabe unango anakwanisa kumsudzula tayu.

¹⁵Ngakhala iye anaphata mvula, penepo pambakhala njala ikulu; mbwenye ngakhala anaitawirisa kuvumba pyayo, penepo madzi makulu ambadza padziko yapansi.

¹⁶“Iye ndiye mwenechiroache mphamvu na kukunda; onsene anyakunyengezwa na anyakunyengeza anzawo mbache.

¹⁷Iye ambapupwisa nzeru za mapungu mbachitisa anyakutonga miseru kukhala madzemwa.

¹⁸Iye ambatchithisa mafumu pamipando yawo mbaachitisa kukhala anyaperezo.

¹⁹Iye ambachitisa manyadzo anyansembe mbapokosera chidzo amuna akukhazikika.

²⁰Iye ambachitisa mapungu akunyindirika kukhala mabewewe mbabulusa udziwisi wa amuna a mvula zakale.

²¹Iye ambachitisa manyadzo amuna akulemedzwa mbakhutcha mano amuna amphamvu.

²²Iye ambatchulula pinthu pikulu pyakubisika mumdima mbasanduza mdima wa ndiwe ani kukhala cheza.

²³Iye ambachitisa madzinza kukula mbaavunga pontho; iye ambakuza madzinza mbaabalalisa.

²⁴Iye ambapupwisa nzeru za akadamu mbaachitisa kutsalakatika na kutayika m'thando yatchetcha.

²⁵Iwo ambamphamphasa-mphamphasa mumdima; iye ambaachitisa kudzedzereka ninga anyakuledzera.”