Read cisena YOBU 14 Bible Online

YOBU 14 - cisena bible

YOBU 14

¹“Munthu wakubalwa na mkazi nsiku zache nsakulengeseka, pontho nsakudzala na nyatwa.

²Iye ambaphwitha ninga maluwa mbaunyala. Ninga chigudu-gudu kabodzi kene iye nkhabe onekave tayu.

³Ayi munthu ninga weneyu nkhumuwerengera basi? Ayi nkhumdzesa basi pamaso panu kuti atongwe mseru?

⁴Mbani anakwanisa kudzesa chinthu chakuchena kubulukira kuchinthu chokhonda chena? Nkhabe na mbodzi ene tayu.

⁵Nsiku za munthu nsakulembwa kale. Konta ya miyezi yache ili m'manja mwanu; imwe mwamuikhira madire mwakuti iye nkhabe kwanisa kuanumpha tayu.

⁶Natenepo mulekeni pyache,[11] pontho akomerwe ninga nyaganyo angakotoka.

⁷“Mutive mbwenye, umbakhala na chidikhiro. Ngakhala iwo unagwandwa, umbaphwitha pontho, mphukira zachembo nkhabe mala tayu.

⁸Mitsitsi yache inakwanisa kukalamba pansipa, pontho chitsa chache mbichifera m'mataka monthomo,

⁹kwache sindzidzi nkhulawira madzi unaphwitha, mbukhala na nthambi ninga chakumera.

¹⁰Mbwenye munthu ambafa mamalisiro ache mbakhala onthowo; iye ambafa mbakhonda oneka pontho.

¹¹“Ninga mumbachitira mikulo kuleka kufamba, pontho nyanza zile zimbapwa mbiziuma,

¹²sasawambo munthu ambafa mbakhonda lamuka pontho. Kufikirana thambo ileke oneka pontho, nyakufa nkhabe dzalamuka, nee nyakugonera mkono tayu.

¹³“Mbamudandibisa pyanu m'dziko ya anyakufa mbwenye, kundibisa kufikirana kuzhangali kwanu kwamala, pontho mbamudandiikhira ndzidzi, m'nduli mwache mbamundikumbuka mbwenye.

¹⁴Ngakhala munthu anafa, ayi iye anakhala pontho na moyo? Podi ndiphate pyanga basa mwakubulusa kaluma tani, ndinati ndidikhire basi kudza kwa ndzidzi wanga wadidi.

¹⁵Imwe munandichemera, ine mbindikutawirani. Imwe munanditchuwa, ule adasasanya imwe na manjanu.

¹⁶Penepo munakwanisa dzandilonda manyalo, mbamukhonda lengesa pyakudawa pyanga.

¹⁷Imwe munamangirira umambalanga m'fukusi, mbamufikhira pansi pyakudawa pyachita ine.

¹⁸“Mbwenye ninga mumbachitira mapiri kukukuluka, pontho miyala ikulu kugubuduka kubuluka m'mbuto mwawo;

¹⁹ninga mumbachitira madzi kunyenyena miyala, pontho mvula izinji kukukulula mataka, mwenemo ndiye mumbamalisira imwe chidikhiro cha munthu.

²⁰Imwe mumbakunda munthu, iyembo ambabuluka m'maso mwa anthu; nkhope yache imbasanduzikira kuimfa mbamumgwinyira kutali kwenda na kwenda.

²¹Ngakhala anache anapaswa chilemedzo, iye nkhabe kupidziwa tayu; ngakhala iwo analulupiswa, iye nkhabe kupidzindikira.

²²Pimbava iye kupha mphya m'manungo mwache mwene basi, pontho ambapisintili yekha ene basi.”