Read cisena YOBU 15 Bible Online

YOBU 15 - cisena bible

YOBU 15

¹Natenepo Elifazi wa Chitemani adatawira mbati,

²“Ayi munthu wanzeru angatawire na mafala apezi-pezi ninga enewa, penu kudzaza m'kanwa mwache na mafala akusowa basa?

³Ayi iye anakwanisa kupokanya ninga mwachitira iwemu mbalonga mafala okhonda ganyalisa?

⁴Ayi iwe ukufuna kuti anthu aleke gopa Mulungu, penu iwo aleke kumpembedza?

⁵Kudawa kwako kwaoneka na malongero ako, pontho mafalako adzala na pyakunama.

⁶Kuna ine nkhabe funika pontho kuti ndikuchitise kukonwa tayu, iwe wakonwa kale na mafala alonga iwewa.

⁷“Ayi iwe ukunyerezera kuti udatoma kubalwa ndiwe? Ndzidzi udalenga Mulungu mapiri, ayi iwe ukhalipo?

⁸Ayi iwe udaveseradi mwadidi mwene pinthu pidasasanya Mulungu kupichita? Ayi una nzeru ndiwe ene basi?

⁹Ntchipi chinthu chache chinadziwa iwe, ifembo mbitikhonda kuchidziwa? Udziwisi wache ngwanji una iwe, unakhonda ife khala nawombo?

¹⁰Ife nzeru zathu tidazifunza kubulukira kuna anyaimvi, anthu ale adabalwa babako mbadzati balwa.

¹¹“Mulungu akukuthondoza, apo watani unakhonda kuthondozwako? Ayi mafala alongwa mwakufulikawa hadakuphate mtima tayu?

¹²Thangwi ache ninji ukuwanga mtima kuti iwe utituzulire maso ninga tenepa,

¹³pontho kuti uzhangalire Mulungu mbumulongera mafala apezi ninga enewa?

¹⁴“Ayi munthu mbani kuti anakwanisa kukhala wangwiro? Penu munthu wakubalwa na mkazi kuti anakwanisa kukhala wakulungama?

¹⁵Ngakhala Mulungu nkhabe nyindira angelo ache; ngakhala iwo si angwiro tayu pamaso pache,

¹⁶apo nditani na munthu, ule ngwakuipa pontho wakunyansa, munthu ule ambamwa pyakuipa ninga madzi.

¹⁷“Natenepo vesera, Yobu, ndikupange; ine ndinati ndikupange pinthu pyaona ine.

¹⁸Anthu anzeru andipanga pyakuona pile pidafunziswa iwo na makolo awo, pontho iwo nkhabe bisa chinthu na chibodzi chene tayu.

¹⁹M'dziko mwawo mukhali nkhabe nyakudza, mukhali nkhabe munthu wakuabausa kubuluka kuna Mulungu.

²⁰“Munthu wakuipa anati asanyike m'moyo wache onsene; nyakupondereza anzache kwache nkhuva kupha nsiku zonsene.

²¹Dungu yakugoswa inasokosera m'makutu mwache, pontho ndzidzi unaona iye kuti ali pakupata, anyakuvunga anadza.

²²Iye nkhabe chidikhiro kuthawa mdima wa imfa tayu, thangwi panango pontho talasada ikudikhira kuti imphe.

²³Malezi[12] akudikhira[13] kudya manungo ache. Iye ambadziwa kuti tsogolo yache ndi mdima.

²⁴Kusanyika mtima na mantha pimbammala manungo, ipyo pimbamsanyisa ninga mfumu wakusasanyika kumenya nkhondo.

²⁵“Yeneyi ndiye dzedze imbakwata munthu ule anakungira Mulungu mashoko, mbalulupisa Nyamphamvu zonsene.

²⁶Munthu weneyo ambathamanga kamenyana na Mulungu mwakukula mtima uku aphatira chakugedera matswimo chache.

²⁷Podi kwene kuti nkhope yache ina chidokhomiro, pontho kuti ana njodo,

²⁸mizinda inakhala iye inasanduka madembe, pontho anakhala m'nyumba zokhonda thema khaliwa, zile zidathema kugomoka mbizisala madongolomwa okhokha.

²⁹Iye nkhabeve dzakhala wakufuma tayu, pontho mfumache inamala kumbuluka, tenepo anasala padzuwa.

³⁰Iye nkhabe dzathawa kubuluka mumdima. Anakhala ninga muti, ule nthambi zache zimbapiswa pamoto, ule maluwache[14] amala gubudzika na mphepo.

³¹Ngakhala iye anapinyengeza yekha ene kunyindira pyakupupwa, penepo pyakupupwapyo ndiye pinakhala mfupo wache.

³²Ndzidzi wache mbudzati fika iye anaunyala,[15] anaunyala ninga nthambi ile nkhabe dzakhala pontho iwisi tayu.

³³Iye anakhala ninga mfesa, ule nsapo zache zimbapakatika zikali ziwisi, ninga muti waolivi ule maluwache ambamala na kulakatika.

³⁴Kuna anthu okhonda tsalakana Mulungu anakhala ngomwa, pontho anyakufuma pakuchita kudyekerwa, moto unavunga misawo.

³⁵Enewa mbanthu ale ambasasanya kudzesa nyatwa na kuchita pyakuipa; ndzidzi onsene kunama nkhudya kwawo.”