Read cisena YOBU 16 Bible Online

YOBU 16 - cisena bible

YOBU 16

¹Tenepo Yobu adatawira mbati,

²“Mafala ninga enewa ndidatoma kale kuava; kundithondoza kunachita imwe kukundisanyisa kukulu.

³Munaleka lini kulonga mafala apezi-pezi ninga enewa? Mwatani munathimiza basi kundipokanya?

⁴Mbipidakhala kuti imwe ndine pano, mbidakwanisa kulonga pyonsene pinalonga imwe, mbidakwanisa kukutonjanimbo na mafala azinji, pontho mbidakupusa msolo thangwi ya imwe.

⁵Kwache mbidakuwangisani mtima na mafalanga, mbidathimiza kulonga mafala akukuthondozani nawo.

⁶“Mbwenye chonsene chimbalonga ine nkhabe chibodzi chimbaphedza tayu, pontho kukhala kwene mulomo phoo nkhabe matamisa mtswotswo wanga tayu.

⁷Mulungu mwandimala mphamvu; imwe mwatawirisa kuti banjanga iphiwe.

⁸Imwe mwandiphata mwakuti ndasala magogodo okhokha, tenepo kuonda kwanga ntchitsikimizo chakuti ine ndadawa.

⁹“Na kuzhangali kwache Mulungu andisosa mbandinyedza-nyedza, mbandikikitira mano mwakundizonda. Anyamalwanga andituzulira maso,

¹⁰iwo ambakhala mano chena-chena mbandigasa mbama kundisedegula. Iwo ambandikutira kupokanyisana nane.

¹¹Mulungu andipereka m'manja mwa anthu akuipa; mbandiponya m'manja mwa anyakudawika.

¹²Pinthu pyonsene pikhandifambira pyadidi, mbwenye lero Mulungu andigobola, andishipa pakhosi mbandipondedza. Iye athonyeza pana ine kuyeseza ponta,

¹³mbaponya matswimo ache pana ine, matswimo ale ambandilasa kukhundu zonsene mbandikuwaza. Mwakukhonda kundivera nsisi iye alasa nswikira zanga, mbatayira nyongo yanga pansi.

¹⁴Iye ambandikuwaza okhonda lekeza, andipomokera ninga nyankhondo wamphamvu.

¹⁵Ine ndikulira pontho kuvala masakha, pontho ndikukhala pano pafumbi wakukundwa.

¹⁶Ine ndalira mpakana maso kufira, maso anga ali ngwanda-ngwanda kutupa.

¹⁷Kwache ine sidachite chakuzunguzika tayu, pontho kupempha kwanga pamaso pa Mulungu nkhwakuona.

¹⁸“Dziko yapansi leka bisa pyakuipa pinandichitikirapi; leka chitisa kulira kwanga kufuna chilungamo kumatame!

¹⁹Alipo unango kudzulu ule ndi mboni yanga; nyakundiikhira kunduli ali kudzulu.

²⁰Ashamwali anga akundisedegula; maso anga ambakhuthulira misozi pana Mulungu.

²¹Ndikhapifuna pyakwanga kuti unango adembetere Mulungu m'mbuto mwanga, ninga mumbachitira munthu kudembeterera shamwaliache.

²²Pyaka pyanga pyasala pyakuchepa, chinchino ndinafamba njira yokhonda bwerera.