Read cisena YOBU 17 Bible Online

YOBU 17 - cisena bible

YOBU 17

¹“Kumala kwa moyo wanga kuli chifupi. Ine ndataya chidikhiro; nkhabe pontho chasala mbwenye kwenda kwene ku masiye basi.

²Anyakundisedegula andikutira; ndimbalila kuyang'ana kwene kundiselusa kumbandichita iwoku.

³Mulungu, perekani pinyolo m'mbuto mwanga, thangwi nkhabe unango wakufuna pyakundiikhira kunduli.

⁴Imwe mwafunga misolo yawo kuti aleke vesa pinthu. Lekani kuatawirisa kuti andikunde.

⁵Ngakhala munthu anasandukira ashamwaliache thangwi ya kobiri, anache anasanyika thangwi ya penepi.[16]

⁶Mulungu andisanduza chakusekesa kuna anthu, iwo ambadza mbandiphulira mata.

⁷Kusintili kwanga kwandichitisa kukhala boli-boli; manungo anga asaliratu nkhuu kuonda.

⁸Anyakupiyesa okha ene akulungama adatutumuka na penepi; onsenewo akundilonga kuti ndine munthu okhonda pembedza Mulungu.

⁹“Kwache nyakulungama ambathimiza kuponya maso patsogolo, munthu ule manjache nkhabe maphata-phata ambaenda mbakula mphamvu.

¹⁰Mbwenye mbapidakhala kuti onsenewo adadza mbaimira chifupi na ine, ine nee mbindidagumana na mbodzi ene wa iwo kuti ngwanzeru tayu.

¹¹“Nsiku zanga zagwanda kale; pikhanyerezera ine kuchita pyachimwanika, pontho chidikhiro changa chamala.

¹²Mbwenye ashamwali anga akulonga kuti mosiku ndi masikati; iwo akulonga kuti cheza chenecho chili chifupi, kwache ine ndikupidziwa kuti ndinati ndithimize basi kukhala mumdima.

¹³Chidikhiro china ine pano nkhwenda kwene kudziko ya anyakufa basi, kule kunafuna ine kagona mumdima.

¹⁴Masiye ndimbachemera baba, pontho mfunye ndimbazichemera mama penu anyamainganga.

¹⁵Nkhupi pontho kuna chidikhiro changa? Mbani akuchiona?

¹⁶Chidikhiro nkhabe kwenda nane pabodzi tayu ndingabidira kudziko ya anyakufa; icho nkhabe kwenda nane pabodzi kufumbi tayu.”