Read cisena YOBU 18 Bible Online

YOBU 18 - cisena bible

YOBU 18

¹Tenepo Bilidadi wa Chishuhi adatawira mbati,

²“Ayi unaleka lini kulonga mafala ninga enewa? Iwe mbudatoma matama kuti uvesere, ife mbitidalonga nawe.

³Ninji chinakunyerezeresa kuti ife ndife akupupwa ninga ng'ombe? Thangwi yache ninji tikuoneka ninga anthu akusowa nzeru pamaso pako?

⁴Iwe ukupikuwaza wekha ene na kuzhangali kwako. Ayi dziko yapansi ingasale yokha thangwi iwe wazhangali? Ayi Mulungu angabuluse mapiri towera iwe ukomerwe?

⁵“Nyale ya munthu wakudawika inathimiswa; malulume a moto wache nkhabe dzayerima pontho tayu.

⁶Cheza cha m'nyumba mwache chinasanduka mdima; nyale ya chifupi na iye inathima.

⁷Ule kale akhafamba na mchiti, lero agwegweduka; uphungu wache onthowo wammanga ndale.

⁸Iye ambafamba mbapita na mumsampha, pontho manyalo ache akwesheka.

⁹Paka adampana chitende chache mbamphata titibwi.

¹⁰Pansi mulindi wakumbwa mwakubisa; gango yateyiwa m'njira mwache.

¹¹“Ponsene panakhala iye pana chakugoswa mbachimtewera ponsene panafamba iye.

¹²Iye akhali wakufuma, mbwenye lero akugona na njala; mulirimbo waimira kudikhira chifupi na iye.

¹³Akhali na utenda wakugoswa wa pamanungo, ule udachitisa mikono na miyendo yache kuvunda.

¹⁴Iye anabuluswa kunyumba kukhakhala iye pakupata kule; mbamkwekweta kwenda naye kuna imfa, mfumu wa pyakugoswa.

¹⁵Chinthu chonsene chabuluswa m'nyumba mwache, mbaponyamo miyala ya moto ya sulufule kuichenesa.[17]

¹⁶Mitsitsi ikududumuka, pontho nthambi zache zikuunyala.

¹⁷Kuveka kwache padziko ya pansi kwamala; dzinache nkhabe dzakumbukirikave tayu.

¹⁸Iye anathamangiswa m'dziko ya anthu amoyo; kubuluswa kubulukira kucheza kwenda kumdima.

¹⁹Iye nkhabe pidzukulu pakati pa anthu ache; nkhabe na mbodzi ene anafuna dzasala na moyo tayu kukhakhala iye kule.

²⁰Anthu akumadokero dzuwa ambatutumuka na dzedze idamgwera; anthu akumabulukiro dzuwa ale ambaphatwa na mantha.

²¹Ande, yeneyo ndi dzedze imbakwata munthu wakuipa, pontho na musa wa munthu okhonda tsalakana Mulungu.”