Read cisena YOBU 19 Bible Online

YOBU 19 - cisena bible

YOBU 19

¹Tenepo Yobu adatawira mbati,

²“Munaleka lini kundisanya na kundinyangula na mafalanu.

³Nkhachikhumi keneka kananditikana imweka; mwakusowa manyadzo imwe mumbandisosa.

⁴Ngakhala mphyakuona kuti ine ndachita pyakudawa, ndilekeni pyanga, imwe muli napyonji.

⁵Ngakhala munapikuza mwekha ene padzulu pa ine, mbamuphatisa basa kululupiswa kwanga kunditonja nako,

⁶penepyo pidziweni kuti Mulungu ndiye andichitira penepi, pontho anditeyera msampha kundizungulira.

⁷Ndimbakhuwa kuti, ‘Kuno!’ Kw ache ine nkhabe tawirwa tayu; ndimbachemera kufuna chilungamo, kwache icho nkhabe oneka.

⁸Mulungu anditchingira njira, towera ndileke gwanda; mbaikha mdima njira inafamba ine.

⁹Iye akunundula demelero yanga, mbabulusa chipewu cha chilemedzo mumsolo mwanga.

¹⁰Iye ambandinyedza-nyedza makhundu onsene kufikirana ndamaliratu; chidikhiro changa ambachidula ninga muti.

¹¹Iye agasa ukali wache pana ine, mbandiyesa nyamalwache.

¹²Anyankhondo ache ambandidzera mwamphamvu; iwo ambandifungira na milu ya mataka khundu zonsene mbamanga misasa kuzungulira nyumbanga.

¹³“Mulungu achitisa abale anga kundikhonda, pontho anyakudziwana nawo andiyesa mlendo.

¹⁴Abale anga chadi-chadi amala kundithawa; ashamwali anga andipasa nkhodolo.

¹⁵Anyakuchemerwa kumusa kwanga ambandiduwalira, pontho anyabasanga achikazi ambandiyesa ninga nyakudza; ine ndasanduka mbaliro ya kunja kuna iwo.

¹⁶Ine ndimbachemeresa nyabasanga, kwache iye hambatawira tayu; podi kwene kuti ndimpemphe ndine ene kuti andiphedze.

¹⁷Muya wanga ene ngwakuchitisa mkazanga kupinda, podi na abale anga ene amimba ibodzi nkhabe kundifikira chifupi tayu.

¹⁸Podi na ana ene ambandilulupisa; iwo angandiona ambandisedegula.

¹⁹Ashamwali anga ene apamtima ambanyansirwa nane; ashamwali aponde pondembo andisandukira.

²⁰Ine ndasala nkhong'o-nkhong'o; ndapulumukira m'kanwa mwa ng'ona.

²¹“Ndiverenimbo nsisi ine, ashamwali anga! Ndivereni nsisi ine, thangwi mkono wa Mulungu wandipamantha.

²²Thangwi yache ninji mukundilonda-londa ninga mumbachitira Mulungu? Ayi kundisanyisa kunandichita imweku mudakwane nako tayu?

²³“Ndikhapifuna pyakwanga kuti mafalanga alembwe, kuti alembwe mumpukutu,

²⁴kuti iwo alembwe pamwala pakuchita kugoba na simbi, mbaikhamo pilemba pyantove kuti pikhalepo kwenda na kwenda.[18]

²⁵Ndikupidziwa kuti Dombo wanga ana moyo, pontho kuti pakumalisira pache anadza dzaimira kukhundu kwanga padziko yapansi.

²⁶Podi kwene kuti manungo anga amale vunda, kwache ine na manungo anga onthowa[19] ndinamuona basi Mulungu.

²⁷Ine ene ndinati ndimuone na maso anga, ine ene nee unango tayu. Mtimanga ukufuna pyakwanga kuti nsikuyo ifike.

²⁸“Ngakhala munalonga kuti, ‘Tinakwanisa tani kumsanya weneyu, podi nyatwazi akuzidzesa yekha ene,’

²⁹iwe wathema wekha ene kugoswerwa na talasada; thangwi kuzhangali kumbadzesa kutchunyuswa na talasada, penepo unapidziwa kuti kunja kuno kuna nyakutonga miseru.”[20]