Read cisena YOBU 2 Bible Online

YOBU 2 - cisena bible

YOBU 2

¹Nsiku inango pontho angelo adadza dzaonekera pamaso pa MBUYA, tenepo Satana akhali nawombo penepo.

²MBUYA adamvunza mbati, “Ukubulukira kupi?” Satana adatawira mbati, “Ndikhaponda-ponda pontho kuzunga-zunga pyanga m'dziko yapansi.”

³MBUYA adamvunza mbati, “Ayi waonako nyabasanga Yobu? Nkhabe pontho padziko yapansi munthu wakukhulupirika ninga iye tayu? Iye ambandipembedza pontho ambachita mphole-mphole gopesera kuchita chakuipa. Podi kwene kuti pakutoma iwe udandikhakhamiza kuti ndikutawirise kamchita pyakuipa wakusowa na thangwi ene, iye akuthimiza kukhala wakukhulupirika ninga pakutoma pale.”

⁴Satana adatawira mbati, “Munthu anakwanisa kutaya pyache pyonsene towera iye akhale na moyo.

⁵Mbwenye chinchino pichiteni kumkuwaza manungo ache. Iye anati akutikaneni maso na maso.”

⁶Natenepo Mulungu adalonga kuna Satana mbati, “Pyakoma, iye ali m'manja mwako, kwache leka kumpha.”

⁷Tenepo Satana adabuluka pamaso pa Mulungu mbachitisa manungo onsene a Yobu kubuluka pironda.

⁸Yobu adenda mbakhala pakhuku mbakwata dzinga kutchera nayo pironda pyache pile.

⁹Mkazache adalonga kuna iye mbati, “Ayi ukuthimiza basi kukhala wakukhulupirika ninga pakutoma pale? Tikana Mulungu, mbufe pyako?”

¹⁰Yobu adatawira mbati, “Pinalonga iwepi mphyapezi-pezi! Mulungu angatitumizira pinthu pyadidi, ife timbapitambira na manja mawiri. Apo tinadungunyiranji iye angatitumizira nyatwa?” Podi kwene kuti Yobu adaona nyatwa yonseneyi, iye hadalonge chinthu na chibodzi chene chakuipa tayu.

¹¹Ashamwali atatu a Yobu akhali: Elifazi wa Chitemani, Bilidadi wa Chishuhi, na Zofari wa Chinaama. Pidava iwo kusanyika kudachita Yobu, iwo adanyerezera pyakwenda kamuombera.

¹²Pikhali iwo kutali pang'ono na pakhali Yobu pale, iwo adamuona kwache iwo hadamdzindikire tayu. Tenepo pidamdzindikira iwo, adatoma kulira, kung'amba nguwo zawo pontho adawaza fumbi mumsolo mwawo kuonesa kutsukwala.

¹³Kubuluka penepo iwo adakhala pansi pa mataka pabodzi pene na Yobu, nsiku zinomwe mosiku na masikati okhonda longa chinthu na chibodzi chene, thangwi iwo adaona kusanyika kukulu kudachita Yobu kule.