Read cisena YOBU 20 Bible Online

YOBU 20 - cisena bible

YOBU 20

¹Kubuluka penepo Zofari wa Chinaama adatawira mbati,

²“Ine ndathema kukutawira kabodzi kene, thangwi ndanenseka napyo mumtimamu.

³Ine ndava kusumulula kwako kule kwandilulupisa, pontho kuvesa kwanga kwandichitisa kutawira.

⁴“Ayi iwe nkhabe kupidziwa tayu mule mukhali ipyo pakutoma, kutomera ndzidzi udaikhwa munthu padziko yapansi?

⁵Kukomerwa kwa nyakudawa nkhwa nsiku zakulengeseka; kusekera kwa nyakukhonda tsalakana pya Mulungu kumbamala kwene ndzidzi pang'ono basi.

⁶Podi kwene kuti kutumbama kwache kufike kudzulu, msolo wache mbukhuya makole,

⁷iye anavungika kwenda na kwenda ninga matubzi ache onthowo, ale akhamuona kale anavunza kuti, ‘Iye ali kupi?’

⁸Ninga ndoto iye ambawayukiratu mbakhonda oneka pontho, mbabalalika ninga masomphenya na mosiku.

⁹Diso idamuona ile, nkhabe dzamuona pontho tayu; pambuto pakhakhala iye pale, hanaonekapove tayu.

¹⁰Anache athema dzabwezera mfuma, ile idabera iye anyakutcherenga,

¹¹Manungo ache ale akhali amphale pontho amphamvu, chinchino anasanduka fumbi.

¹²“Podi kwene kuti pyakuipa pimbatapira m'kanwa mwache, mwakuti ambapimulumunya;

¹³podi kwene kuti iye ambakomerwa napyo mwakuti iye ambathimiza basi kupivuatira,

¹⁴kudya kweneko kungafika m'chifu mwache kumbasanduka kwakuwawa, kuwawa ninga nyongo yakupha.

¹⁵Iye analukula mfuma idakhudyula iye; Mulungu anamchitisa kupitapika.

¹⁶Iye ananyanguta nyongo ya nyoka yakupha; iye analumwa na nyoka ya chipiri mbafa.

¹⁷Iye nkhabeve dzaona mikulo ya mafuta aolivi, penu mikulo yakufamba mkaka na uchi.

¹⁸Iye athema kubwezera pyonsene pidagumana iye mwakubulusa kaluma; iye nkhabe dzakhala na mwayi wakukomerwa na pidaganyali iye,

¹⁹thangwi iye adapondereza anyakutcherenga mbaasiya padzuwa; iye adakwata nyumba zidamanga anthu anango.

²⁰Mtimache nkhabe khuta tayu, iye nkhabe yang'ana kwene chinthu na maso tayu.

²¹Angadya nkhabe siya mkhutche na pang'ono pene tayu, tenepo pinthu pyache nkhabe dzamfambira mwadidi tayu.

²²Mwenemo pinthu pyache pili nadza-nadza, nyatwa zinamgwera basi; pyakutsukwalisa pizinji pinamkutira.

²³Mulekeni pyache akhutise mimbache! Kwache Mulungu anakhuthulira ukali wache wakugoswa mbauvumbisa pana iye ninga mvula ya chaka.

²⁴Iye angayesera kuthawa chida chasimbi, tswimo ya mphethe yankuwa inamulasa.

²⁵Tswimo imbalasa manungo ache mbiphutchukira; nsonga yache yakuyetimira idaipiswa na nyongo yache; tenepo mantha makulu ambamphata.

²⁶Mdima wakugoswa ukumdikhira; moto okhonda lira kupepeswa unampisa mbunyanguta pyonsene pidasalira m'nyumba mwache pile.

²⁷Kudzulu kunabulusa pakwecha pyakudawa pyache, pontho dziko yapansi inaperekera umboni kupokanyisana naye.

²⁸Madzi makulu anakukulula nyumbache; mfumache yonsene inavungika na ukali wa Mulungu.

²⁹“Yeneyi ndi nyatwa yakoyera Mulungu munthu wakuipa; penepi ndiye pidadumbira Mulungu dzapichita kuna iye.”