Read cisena YOBU 21 Bible Online

YOBU 21 - cisena bible

YOBU 21

¹Tenepo Yobu adatawira mbati,

²“Veserani mwadidi mafalangawa, kweneku mbukukhale kundithondoza kubulukira kuna imwe.

³Pirirani na pinalonga ine, penepo ndingamala kulonga munakwanisa kundisedegula pyanu.

⁴“Ayi ine ndikudungunya kuna munthu? Thangwi yache ninji kuti ndileke kukhonda kuuphata mtima?

⁵Ngandiyang'aneni mbamututumuke; phatani pakanwa.

⁶Ndinganyerezera pya penepi ndimbaphatwa na mantha; manungo anga onsene ambatetemera na mantha.

⁷“Thangwi yache ninji anthu akuipa ambathimiza kukhala na moyo, mbakalamba pontho mbathimiza kukhala na mphamvu zizinji?

⁸Iwo ambaona anawo akukhazikika pakati pawo, pidzukulu pyawo pamaso pawo.

⁹M'misa mwawo nkhabe nyatwa penu pyakugoswa; ndodo ya Mulungu nkhabe kuakwapula tayu.

¹⁰Ng'ombe zawo zimuna zimbabebesa mbizikhonda chimwana; ng'ombe zawo zikazi zimbakwata bele, pontho nkhabe polozwa tayu.

¹¹Anawo ambasenzeka pachintalo ninga anabira; anawo ambavina-vina na kunumpha-numpha.

¹²Iwo ambaimba na nkhotcho pontho anyakatangale; mbakomerwa na kuimbwa kwa pitoliro.

¹³Pinthu pyawo pyonsene pimbaafambira mwadidi nsiku zonsene za moyo wawo; iwo ambaenda kudziko ya anyakufa na mtendere.

¹⁴“Kwache iwo ambalonga kuna Mulungu kuti, ‘Tileke pyathu! Ife nkhabe maba kuti tidziwe njira zako tayu.

¹⁵Nyamphamvu zonseneyo mbani kuti ife timtumikire? Apo tinaganyalinji tingapemphera kuna iye?’

¹⁶Kwache mfumayo hili m'manja mwawo tayu; natenepo ndimbaimira kutali na uphungu wa anthu akudawikawa.

¹⁷“Kwache nyale ya anthu akuipa nkhabe thimiswa kawiri-kawiri tayu; dzedze nkhabe kuagwera kawiri-kawiri, pontho Mulungu nkhabe kuapasa pinthu pyakubulukira mu kuzhangali kwache.

¹⁸Iwo nkhabe mbuluka na mphepo ninga mphulu ya maudzu tayu, penu ninga dzungu kupheluka na mphepo ikulu tayu.

¹⁹“Pidalongwa kuti Mulungu ambakoya kutchunyuswa kwa munthu kuti kudzagwere anache. Mulekeni abwezere munthu ndiye mwenechiroache towera apidziwe.

²⁰Mulekeni aone yekha na maso ache kuvungika kwache; mulekeni amwe ukali wa Nyamphamvu zonsene.

²¹Chimbatsalakana iye ninji pya banjache iye angafa, penu pinasala iye na moyo miyezi yakuchepa?

²²Ayi alipo munthu ule anakwanisa kufunzisa Mulungu, podi Mulungu ndiye ambatonga mseru anyakukhala kudzulu.

²³“Munthu unango ambafa mwenemo pinthu pyache pikumfambira mwadidi, pontho ali pamtendere na kukomerwa,

²⁴uku manungo ache ali myaa, pontho magogodo ache adzala na unongo-nongo.

²⁵Mbwenye unango ambafa mwakusanyika, okhonda komerwa na chinthu chene chadidi.

²⁶Kwache onsene uwiriawo ambafa mbaikhwa m'masiye, pontho mfunye zimbadya onsene awiri.

²⁷“Ndikudziwa manyerezero anu, pontho pinthu pyasasanya imwe kuti mundidawise napyo.

²⁸Imwe mumbavunza kuti, ‘Nyumba ya baa ale ili kupi, munthu ule ambachita pyakuipa?’

²⁹Ayi imwe mudatome kuavunza tayu anthu ale ambafamba na njira yeneyi? Ayi imwe nkhabe phatizana na umboni wawo kuti:

³⁰Nsiku za nyatwa ambakoyiwa ndi munthu wakuipa, nsiku imbazhangali Mulungu iye ambapulumuka panyatwa?

³¹Mbani munthu anakwanisa kusumulula munthu wakuipa, penu kumbwezera papinthu pyonsene pyachita iye.

³²Iye angathukulwa kwenda kumasiye, nthumbi yache imbayang'anirwa mwadidi,

³³Anthu pikwi-pikwi ambaenda kumaliroko, podi na mataka ene ambamtambira na manja mawiri.

³⁴“Apo imwe, mukuyesa kundithondoza na mafala akusowa basa; pyonsene pinalonga imwe mphyakunama!”