Read cisena YOBU 22 Bible Online

YOBU 22 - cisena bible

YOBU 22

¹Tenepo Elifazi wa Chitemani adatawira mbati,

²“Ayi munthu nkhukhala wakuganyalisa kuna Mulungu? Ayi nyanzeruletu nkhukhala wakuganyalisa kuna Mulungu?

³Ayi ukunyerezera kuchita kwako pyakulungama kumbaphedza Nyamphamvu zonsene, penu iye kuganyalimbo chinthu na moyo wako wakusowa chakupokanyisa?

⁴Si thangwi yakuti iwe umbagopa Mulungu kuti iye ambakusumulula mbakudzesa kuthando ya miseru tayu.

⁵Nkhabe, ndi thangwi yakuti iwe wadawa pikulu; ndi thangwi ya pyakuipa pyonsene pimbachita iwe.

⁶Iwe wakwata pinyolo kuna mbaleako wakusowa na mathangwi ene; iwe wamdulisa nguwo zache mbumsiya chipezi-pezi.

⁷Kuna anyakutopa, iwe udakhonda kuapasa madzi; kuna anyakuva njala, iwe udakhonda kuadyesa.

⁸Iwe udaphatisa basa mphamvu zako kukwata dziko; mbupikhazikisa wekha ene pakuphatisa basa chidzo chako.

⁹Amamfelwa udaabera pinthu pyawo, pontho ana masiye udaapondereza.

¹⁰Natenepo chinchino pana misampha kukuzungulira, pontho iwe watutumuka na mantha.

¹¹Kunjaku kwachita mdima mwakuti iwe nkhabe kwanisa kuona tayu, pontho madzi makulu akubiza.

¹²Ayi Mulungu nkhabe khala kudzululetu tayu? Yang'ana nyenyezi kuti izo zili kudzulu pyakwanga.

¹³Kwache ukuvunza basi kuti, ‘Mulungu ambadziwanji?’ Iye abisalika na makole, apo iye anakwanisa tani kutitonga mseru?

¹⁴Ayi iwe ukunyerezera kuti makole akuswipa ambamchitisa kukhonda oneka, pinafamba iye padzulu pa thambo?

¹⁵“Ayi iwe ukukakamira basi kufamba m'njira za kale, zile zimbatewera anthu akuipa ndzidzi onsene?

¹⁶Podi ndzidzi wawo mbudzati fika, iwo adakukululwa; maziko awo adamala dyiwa na madzi makulu.

¹⁷Enewa mbanthu ale adalonga kuna Mulungu mbati, ‘Tilekeni pyathu,’ pontho kuti, ‘Nyamphamvu zonsene anatichitanji?’

¹⁸Kwache ndi Mulungu onthoyo ule adaachitisa kufuma, tenepo ine nkhabe kwanisa kuvesa manyerezero a anthu akuipa tayu.

¹⁹Anyakulungama ambakomerwa na kusekera angaona anyakudawika kutchunyuswa, anthu okhonda dawa ambaasedegula mbati,

²⁰‘Anyamalwathu amala vungika, pontho moto wapyereza mfumawo.’

²¹“Natenepo, Yobu, leka thimbana na Mulungu mbukhale pamtendere, tenepo pinthu pyako pyonsene pinakufambira mwadidi.

²²Tambira chifunziso chimbapereka iye; koya mafalache m'mtima mwako.

²³Ande, wathema kupichepesa[21] mbuzungunukire kuna Nyamphamvu zonsene, mbubasikiletu kuchita pyakuipa m'nyumba mwako.

²⁴Taya kutali golidi wako wa ku Ofiri; golidi wako wadidiletu umtayire mumkulo.

²⁵Nyamphamvu zonsene mbakhale golidi wako, pontho mbakhale silivako wakudula.

²⁶Tenepo ndzidzi onsene unanyindira Nyamphamvu zonsene, mbukwiza maso ako kuna iye.

²⁷Ungapemphera iye anakutawira, pontho unachita pidadumbira iwe kuna iye.

²⁸Pinthu pyonsene pinanyerezera iwe kuchita pinakwanisika, pontho cheza chinamwinikira njirako.

²⁹Mulungu ambatchithisa pansi anyakutumbama, mbapulumusa anyakupichepesa.

³⁰Iye ambapulumusa munthu okhonda dawa,[22] natenepo iye anakupulumusa thangwi ya kulungama kwako.”