Read cisena YOBU 23 Bible Online

YOBU 23 - cisena bible

YOBU 23

¹Tenepo Yobu adatawira mbati:

²“Ine ndikuthimiza basi kudungunya pamaso pa Mulungu; ine ndikubulira thangwi ya kundiboneresa kwache.

³Mbidadziwakove kumbuto kumbakhala iye mbwenye; mbidadziwa njirache yakwendera kweneko mbwenyeve,

⁴ine mbidalonga mseru wanga pamaso pache mbandipereka mphokanga yonsene kuti atonge mwakundikomera.

⁵Ine mbidadziwa kuti anakalonganji, pontho kuti anakanditawira tani?

⁶Ayi Mulungu angaphatisedi mphamvu zache zonsene kupokanyisana na ine? Nkhabe, iye mbadavesera pinalonga inepi.

⁷Kweneko nyakulungama anakwanisa kulonga na Mulungu pya mseru wache, tenepo inembo mbidayeswa okhonda dawa kwenda na kwenda na nyakunditonga mseru wanga.

⁸“Ndasaka-saka kumabulukiro dzuwa, kwache Mulungu hali kweneko tayu; sidamgumane tayu pidamsaka-saka ine kumadokero dzuwa.

⁹Ndidayang'ana kumpoto, kwache ine sidamuoneko tayu; pidazungunukira ine kumwera na kweneko kwene sidamgumaneko tayu basi.

¹⁰Kwache Mulungu ambadziwa mafambiro anga onsene; iye angamala kundiyesa ninga golidi ndinabuluka wakusowa masepu-sepu.

¹¹Ine ndatewera mwakukhulupirika njira idasankhula iye mbandikhonda baukira kumadyo penu kumabzere.

¹²Ndzidzi onsene ndimbachita chinthu chonsene chimbanditonga Mulungu; ine ndakoya mafalache onsene mumtima mwanga.

¹³“Iye nkhabe chinja mwakuti nkhabe munthu anakwanisa kuketesana naye; chinthu chinafuna iye kuchichita ambachichitadi.

¹⁴Iye anati achitise kukwana-kwana pinthu pidanyerezera iye kupichita kuna ine pile; manyerezero enewo ngabodzi mwa manyerezero ana iye.

¹⁵Ndi thangwi yache ine ndimbatetemera na mantha pamaso pache; ine ndinganyerezera pya pyonsenepi ndimbachita naye mantha.

¹⁶Mulungu andikomola; Nyamphamvu zonsene andichitisa mantha.

¹⁷Ndi Mulungu ene basi ambachita na ine mantha, nee mdima tayu, podi kwene kuti mdima ndiye wandichitisa kukhala boli-boli.