Read cisena YOBU 24 Bible Online

YOBU 24 - cisena bible

YOBU 24

¹“Thangwi yache ninji Nyamphamvu zonsene akhonda khazikisa nsiku yakutonga mseru? Thangwi yache ninji anyakumdziwa nkhabe ona nsiku zenezi?

²“Anthu ambabulusa miyala ya madire, towera kukulisa mindawo; iwo ambaba mabira mbaavungaza na pifuyo pyawo.

³Iwo ambapokosera mabulu a ana masiye mbakwata pinyolo ng'ombe zachingolo za amamfelwa achikazi.

⁴Iwo ambagwinyira kunja anyakutcherenga ambaakhakhamiza kuthawa na kubisala.

⁵“Ninga bulu wam'tsanga anyakutcherenga ambatsalakatika kusaka pyakudya m'thando yatchetcha; nkhabe kunango kunakwanisa iwo kugumana pyakudya kwakudyesa anawo tayu.

⁶Iwo ambaphalakatira m'minda ya anango[23] tayu, pontho kulokotera mfesa m'minda ya anyakudawa.

⁷Na mosiku iwo ambagona nyimwa, kusowa na chakufinika chene; iwo nkhabe na chinthu chene chakufinika kuti akhumbirwe tayu.

⁸Iwo avumbwa na mvula ya kumapiri, pontho ali bwatha-bwatha kumwala kusowa pakuthawira mvula.

⁹“Anthu akuipa ambasomphola ana masiye kubere kwa a mawo; iwo ambakwata pinyolo ana a anyakutcherenga.

¹⁰Mbwenye anyakutcherenga ambakhala chitakwa-takwa kusowa na chakumpsampsika chene; iwo ambathukuliswa misumbu ya tirigu, kwache kumimba kumbakhala kade-kade na njala.

¹¹Iwo ambasikinya mafuta aolivi, pontho kutchitchitha vinyu, kwache iwo ene kukhosi kumbakhala kakata na nyota.

¹²Kubulira kwakuthatha na imfa kukuveka mumzindamu; anthu akukuwazwa akulira kufuna chiphedzo. Kwache Mulungu nkhabe ikha konta kupempha kwawoko tayu.

¹³“Alipo anthu anango ale nkhabe funa cheza tayu; ale nkhabe kuchivesa, penu kwenda kumbamwinikira icho tayu.

¹⁴M'makalakwecha mphandu zimbalamuka kwenda kapha anyakutcherenga; na mosiku zimbaenda kaba.

¹⁵Puta ambadikhira m'chidodo; iye ambazimbaisa nkhope yache towera aleke dzindikirwa.

¹⁶Na mosiku mbava zimbaswa nyumba za anthu, mbwenye na masikati ambabindikira m'nyumba; cheza iwo nkhabe nacho pinthu tayu.

¹⁷Thangwi kuna iwo mdima ndi machibese awo; mdima wa ndiwe ani ndiye umbakomerwa na iwo.”

¹⁸[24]“Munthu wakuipa ambakukululwa na madzi makulu; mindache yakwata dzedze. Iye hanaendave kuminda yache yamfesa kaphata basa tayu.

¹⁹Ninga mumbanyungulukira matalala na kupisa kwa dzuwa, sasawambo anyakudawa anamala endeswa kudziko ya anyakufa.

²⁰Podi na mache ene hanamkumbukave tayu, pontho mfunye zinamchita phwando; iye anavungwa ninga muti wakuvunda.

²¹Penepi pimbamchitikira thangwi iye adasanyisa amamfelwa, mbakhonda komera mtima akazi akusowa ana.

²²Mulungu na mphamvu zache ambavunga anyamphamvu; podi kwene kuti akhazikika tani, iwo nkhabe chidikhiro kukhala na moyo tayu.

²³Mulungu anakwanisa kumuleka kukhala pakupata, kwache ndzidzi onsene maso ache ambakhala pana iye.

²⁴Ndzidzi pang'ono munthu wakuipa pinthu pyache pimbamfambira mwadidi, mbwenye ndzidzi pang'ono pimbamaliratu ninga maudzu, penu ninga ngala za mapira zile zagwandwa kale.

²⁵Ayi alipo munthu wakupokanya kuti si pyakuona tayu? Ayi alipo munthu wakutsikimizira kuti mafalangawa si akuona tayu?”