Read cisena YOBU 26 Bible Online

YOBU 26 - cisena bible

YOBU 26

¹Tenepo Yobu adatawira.

²Imwe ndimwedi chiphedzo chikulu kuna ine, kuna munthu wakutcherenga pontho wakusowa mphamvu ninga ine!

³Imwe mwapereka uphungu kuna ine munthu wakusowa nzeru, pontho kugawira nzeru zanu kuna pupwe ninga ine!

⁴Mbani aikha mafala ninga enewa m'kanwa mwanu? Mbani akupepesera kuti mulonge ninga tenepa?

⁵[25]Mizimu ya anyakufa imbatetemera na mantha m'madzi pansi pa mataka; pyonsene pyakukhala mwenemo pili panyatwa ikulu.

⁶Dziko ya anyakufa ili nyimwa pamaso pa Mulungu; nkhabe chakumpsampsika chimbaitchinga kuti ileke oniwa.

⁷Kumbuto yakusowa pinthu Mulungu adafuthula thambo kumpoto; iye adamanika dziko yapansi chidzulu-dzulu.

⁸Ndi Mulungu ule ambachitisa makole kudzala na madzi, mbaachitisa kumangana pabodzi pene gopesera anatumbuka thangwi ya kulemerwa.

⁹Iye ambabisa mwezi, mbauphimbira khundu yache inango na makole.

¹⁰Iye adaikha madire akukhala ninga uta pakati pa dziko yapansi na thambo mbalekanisa cheza na mdima.

¹¹Mizati yakuphatisa kudzulu imbatekenyeka, iyo imbaphatwa na mantha Mulungu angakalipa.

¹²Na mphamvu zache iye adamatamisa bara,[26] pontho na udziwisi wache iye adavunga Rahabi.[27]

¹³Na muyache iye adachitisa kudzulu kukhala ngwiro; na mkono wache iye adalasa nyangume wakuthawa wa m'bara ule.[28]

¹⁴Mbwenye penepi mphing'ono kusangiza na mphamvu zache; pyava ife pya iye mphiwere-were pene basi. Mbani anakwanisa kudziwa chadi-chadi pya ukulu wa Mulungu?