Read cisena YOBU 27 Bible Online

YOBU 27 - cisena bible

YOBU 27

¹Tenepo Yobu adathimiza kulonga mbati:

²“Ine ndinadumbira pamaso pa Mulungu wamoyo, ule adandikhondera chilungamo, pamaso pa Nyamphamvu zonsene, ule achitisa moyo wanga kusanyika;

³ndinadumbira mwenemo mbandili na moyo, pontho kuti muya wa Mulungu uli muna ine,

⁴mulomo wanga nkhabe dzabulusa mafala akuipa tayu, pontho lulume yanga nkhabe dzalonga mafala akunama tayu.

⁵Ine nkhabe dzalonga tayu kuti imwe mukulonga pyakuona; ine ndinakakamira kuti ndine nyakukhonda dawa kufikirana nsiku ya kufa kwanga.

⁶Ine nkhabe dzaleka kulonga kuti ndine wakulungama; chikumbu mtima changa nkhabe kundisumulula na pang'ono pene tayu.

⁷“Anyamalwanga mbatchunyuswe ninga anyakudawika, pontho onsene anyakundipokanya mbaoneswe nyatwa ninga anyakukhonda lungama.

⁸Ayi panakhala chidikhiro chanji kuna anthu okhonda tsalakana Mulungu iye angagwanda moyo wawo, ndzidzi unafuna Mulungu dzaapokosera moyo wawo?

⁹Ayi Mulungu anava kulira kwawo, nyatwa zingaafikira?

¹⁰Ayi iye anagumana kukomerwa muna Nyamphamvu zonsene? Ayi iye anapemphera kuna Mulungu mwakukhonda lekeza?

¹¹“Bwerani ndikufunziseni kukula kwachita mphamvu za Mulungu; ine nkhabe kukubisirani tayu pinthu pyanyerezera Nyamphamvu zonsene kupichita.

¹²Pyonsenepi imwe mwapiona mwekha ene na maso anu; apo thangwi yache ninji mukulonga pyakusowa basa?”

¹³[29]“Mwenemu ndiye mumbatchunyusira Mulungu anyakudawika; penepi ndiye pimbatambira anyakuzunguzika kubulukira kuna Nyamphamvu zonsene.

¹⁴Iwo anakwanisa kukhala na ana azinji, kwache onsene anamala phiwa kunkhondo; anawo nkhabe dzakhala na kudya kwakukwana tayu.

¹⁵Ale adapulumuka anafa na utenda, pontho amamfelwa nkhabe dzasintili anyakufawo tayu.

¹⁶Anyakuipa anakwanisa kukhala na siliva wakuinjipa ninga tchetcha, pontho na nguwo zizinji ninga mataka.

¹⁷Kwache munthu wadidi ndiye anafuna dzavala nguwo zawozo, pontho munthu wakuona mtima ndiye anafuna dzakwata siliva wawoyo.

¹⁸Nyumba imbamanga anyakuipa imbakhala ninga ya nyantandaude,[30] penu ninga khumbi ya nyakuzwingira mbalame m'munda.

¹⁹Ndzidzi ubodzi ene wakumalisa[31] iye anagona pansi wakufuma; mbwenye angafungula maso anagumana kuti mfuma yonseneyo yamala mbuluka.

²⁰Pyakugoswa pinamfikira ninga madzi makulu; na mosiku chivumbulu chinambulusa.

²¹Mphepo yakumabulukiro dzuwa inamkwata mbakhonda onekave; iyo inamtswaira kumbulusa pambuto pache.

²²Mphepoyo inammbumbulutha mwakusowa nsisi; iye ambapidigolika mwenemo iye akuyesera kuthawa.

²³Mphepoyo inaimba manja; iyo inasekera thangwi iye aenda.