Read cisena YOBU 28 Bible Online

YOBU 28 - cisena bible

YOBU 28

¹[32] “Pambakhala mgodi kule kumbakumbwa siliva; pambakhala mbuto kule kumbanyunguluswa golidi.

²Simbi ambakumbwa m'mataka, pontho nkuwa umbanyunguluswa kubulukira kumiyala yankuwa.

³Munthu ambathawisa mdima na nyale, iwo ambasaka-saka kuzwika kwa dziko yapansi, mbakumba mumdima kusaka-saka miyala.

⁴Kubulukira kutali na kunakhala anthu, pontho kule chipo dzinyalo ya munthu hidzati pondako tayu, anthu ambakumba m'mgodi mwenemo akudelumpha nkhambala m'dzenjemo.

⁵Pyakudya pile mbamera kubulukira m'mataka; mbwenye pansi pa mataka ontho-onthowa moto umbagaswa kuswa miyala,

⁶mule mumbagumanwa miyala ya safire, pontho mufumbi yache mumbakhala golidi.

⁷Mphamba nkhabe dziwa njira yakwendera kumgodi tayu; podi na maso a nkhwazi hadzati onako tayu.

⁸Chipo nee chirombo chinango cham'tsanga chidzati famba na njira yeneyo; nee nkhalamu idzati gwandirako tayu.

⁹“Anthu ambakumba miyala yakuwanga mbasiya mitsitsi ya mapiri nyimwa-nyimwa.

¹⁰Iwo ambafukula m'miyala mbagumana miyala yakudula yamtundu onsene.

¹¹Iwo ambaphopha mphuno za madzi, mbadzesa pakwecha chinthu chonsene chakubisika.

¹²Apo nkhupi kumbagumanwa nzeru? Kunakwanisa munthu kafunza udziwisiko nkhupi?

¹³“Muna munthu nkhabe gumanwa nzeru tayu. Kufunika kwache nkhabe na mbodzi ene anakwanisa kukuvesa tayu.

¹⁴Pansi pa bara pambalonga kuti, ‘Nzeru nkhabe gumanwa kuno tayu;’ bara imbalongambo kuti, ‘Muno nzeru nkhabemo.’

¹⁵Golidi wadidiletu nkhabe kwanisa kugula nzeru tayu; kontache nkhabe khala sasawa na siliva tayu.

¹⁶Golidi wadidiletu wa ku Ofiri nkhabe kwanisa gula nzeru tayu, nee miyala ya onikisi penu safire nkhabe.

¹⁷Nzeru njakufunika pyakwanga kupiringana golidi penu miyala ya krusitali; nkhabe chinjisana na pyakuthemesera pyagolidi.

¹⁸Nzeru nkhabe khala sasawa na miyala ya korali penu yasipere; kontache nkhabe khala sasawa na miyala ya rubi.

¹⁹Miyala ya topazi ya ku Kushinkhabe khala sasawa na kufunika kwa nzeru tayu, pontho kontache nkhabe khala sasawa na golidi chadi-chadi tayu.

²⁰“Phatache ya nzeruyo njipi apo? Nkhupi kunakwanisa munthu kafunza udziwisi?

²¹Chinthu chamoyo chakuchita kulengwa nkhabe kuziona tayu, podi na mbalame zene zakutwa maso nkhabe kuziona tayu.

²²Podi imfa na kuvungika pimbalonga kuti, ‘Timbalila kuva kwene mbiri basi.’

²³“Mulungu ene basi ndiye ambadziwa njirache, ndiye ene basi ambadziwa mbuto imbagumanwa nzeru,

²⁴thangwi iye maso ache ambafika mpakana kumadolomero a dziko yapansi; iye ambaona pyonsene pya pansi pa thambo.

²⁵Pidapereka Mulungu mphamvu kuna mphepo, mbaikhira bara madire;

²⁶pidanyerezera Mulungu kule kunafuna dzagwera mvula, pontho na njira inafuna dzagwanda na chiphaliwali;

²⁷ukhali ndzidzi wenewo udaona iye nzeru, mbayesa kufunika kwache mbazitsikimizira.

²⁸“Mulungu adalonga kuna anthu mbati, ‘Kugopa Mbuya ndi phata ya nzeru, pontho kuleka pyakuipa nkhukhala na udziwisi.’ ”