Read cisena YOBU 29 Bible Online

YOBU 29 - cisena bible

YOBU 29

¹Tenepo Yobu adathimiza kulonga mbati:

²“Ndikhapifunadi kuti moyo wanga mbudakhala ninga montho mwakale, pandzidzi ukhandiyang'anira Mulungu ule.

³Ndzidzi onsene Mulungu akhakhala nane mbandimwinikira pikhafamba ine mumdima.

⁴Nsiku zenezo pinthu pikhandifambira mwadidi, pontho ushamwali chathu na Mulungu chikhatchinjiriza banjanga.

⁵Nyamphamvu zonsene akhali nane; ananga akhadandizungulira.

⁶Ng'ombe zanga zikhandipasa mkaka uzinji, pontho miti yanga yaolivi ikhamera m'mataka amiyala.

⁷Ndzidzi onsene ukhagumanyikana akulu-akulu pamsuwo wa mzinda, pontho pikhakhala iwo pachintalo cha mzindawo ine ndikhakhalambo pakati pawo.

⁸Aphale akhandipambukira ndzidzi nkhundiona, pontho akulu-akulu akhaimira kuonesa chilemedzo;

⁹atongi a anthu akhakhala mulomo phoo, mbaphopha pakanwa pawo na manjawo;

¹⁰podi na amuna ene akufunika akhamatamambo, pontho lulume yawo ikhamangika m'kanwa mwawo.

¹¹“Makutu onsene adava pya ine ale, akhandichemera nyakutsanzayiswa; maso onsene adandiona ale, akhandichitira umboni,

¹²thangwi anyakutcherenga angalira, ine ndikhaaphedza; mbandiphedza ana masiye, ale akhasowa na pakutsamira pene.

¹³Anyakuona nyatwa zikulu akhandisimba, pontho amamfelwa ndikhaachitisa kukomerwa.

¹⁴Ndzidzi onsene pyakulungama ndimbapiyesa nguwo zanga; chilungamo ndiye chimbakhala mkhanjo wanga, pontho nduwiranga.

¹⁵Kuna maboli-boli ine ndikhali maso awo, pontho kuna anyakulamala ine ndikhali manyalo awo.

¹⁶Kuna anyakutcherenga ine ndikhali babawo, mbandiikhira kunduli alendo pamiseru yawo.

¹⁷Ine ndidakhutcha mano anthu avinga mbandipulumusa anyakuphatwa m'kanwa mwawo.

¹⁸“Ndzidzi onsene ndimbadikhira kukhala na moyo wakulapha, na kufa na mtendere pamsuwo panga.

¹⁹Ine ndikhali ninga muti ule mitsitsi yache ikhakhala vuwa m'madzi, pontho ule nthambi zache zikhakhala nyontho na bume.

²⁰Ndzidzi onsene munthu onsene akhandisimba, pontho chipo mphamvu zanga zidzati kundichimwanisa tayu.

²¹Ndingapereka uphungu, anthu ambakhala fulike mbavesera mwadidi uphungu wanga.

²²Ndingamalisa kulonga, iwo nkhabe thimizapo na chinthu chene tayu; mafalanga ambamwerera m'makutu mwawo.

²³Iwo akhanditambira na manja mawiri ninga akutambira mvula, ninga mumbachitira nyakulima kusekera phumphuli.

²⁴Iwo angataya mtima, ine ndikhaasekerera; nkhope yanga yakukomerwa ikhaawangisa mtima.

²⁵Ine ndikhaasankhulira njira mbandikhala mfumu wawo. Ine ndidakhala ninga mfumu pakati pa anyankhondo ache, pontho ndikhali nyakuaphata pamkono ndzidzi wa kusintili.