Read cisena YOBU 3 Bible Online

YOBU 3 - cisena bible

YOBU 3

¹Pakumalisira pache Yobu adabulusa fala mbatemberera nsiku idabalwa iye.

²Iye adalonga mbati,

³“Nsiku idabalwa ine mbitembererwe, mbutembererwe mosiku udandikwatira mama mimba!

⁴Nsiku yeneyo mbisanduke pyayo mdima; Mulungu wa kudzulu mbaleke kuitsalakanave; cheza mbichileke kuonekave pansiku yeneyo.

⁵Mdima na mthunzi ukulu mbipiphimbire nsiku yeneyo; makole mbakhale padzulu pache; kuswipa kwache mbukukunde cheza chache.

⁶Mosiku wenewo, mdima wa ndiwe ani mbukugwere, pontho mbileke werengerwa ninga ibodzi mwa nsiku za chaka, penu kuikhwa pansiku za mwezi.

⁷Mosiku wenewo mbukhale wakuuma nthumbo; mkhuwo wakusekera mbuleke vekave mosiku wenewo.

⁸Anyakudziwa kutemberera, ale mbanyaluso kulamusa Leviatani mbatemberere pyawo nsiku yeneyo.

⁹Nthandache mbisanduke mdima; mbidikhire papezi kuchena kwa kunja, pontho mbakhonde kuona manyika,

¹⁰thangwi mosiku wenewo hudafunge tayu misuwo ya nthumbo, towera ndileke ona nyatwa ninga yeneyi.

¹¹“Thangwi yache ninji ndidakhonda kufa pyanga mfutete m'mimba, pontho kufa pyanga pikhabuluka ine m'mimba?

¹²Thangwi yache ninji mama adandiikha pamiyendo mbandipasa bele kundiyamwisa?

¹³Thangwi chinchino mbidagona pyanga mumtendere; ine mbidakhala m'chitulo kupuma pyanga,

¹⁴pabodzi pene na mafumu pontho mapungu a dziko yapansi, ale adapimangira okha ene mbuto zile chinchino zasanduka madembe,

¹⁵pabodzi pene na atongi ale akhali na golidi, ale adadzaza nyumba zawo na siliva.

¹⁶Penu ndidatani khonda ikhwa m'masiye ninga mwana wakubwerera kunjira, ninga kachiya ule chipo hadzati kuona kunja tayu?

¹⁷Kumasiye kule anyakuipa nkhabe onesave anthu nyatwa tayu, pontho anyakutopa ali pyawo gadaa.

¹⁸Kweneko podi na anyaperezo ene ali pamtendere, pontho aleka kuva fala ya anyakuayang'anira avinga.

¹⁹Anyakuveka na anyakukhonda veka ene ali kweneko, pontho na mabitchu ene ngakusudzuka kuna ambuyawo.

²⁰“Thangwi yache ninji anyakusanyika mukuatawirisa kuona cheza, pontho anyakuva kupha mukuatawirisa kukhala na moyo?

²¹Chinadikhira iwo chene nkhufa basi, kwache imfa hikudza tayu; iwo ambasaka-saka imfa pikulu pene kupiringana mfuma yakubisika.

²²Iwo ambakomerwa na kusekera pyakwanga angafika m'masiye.

²³Mulungu ambaabisira tsogolo yawo mbaatsekereza kukhundu zonsene.

²⁴M'mbuto mwa kudya, ine ndikulira, pontho ine nkhabe kwanisa leka kubulira tayu.

²⁵Chonsene chikhagopa ine, lero chandigwera; chonsene chikhachita na ine mantha, lero chandifikira.

²⁶Mumtima mwanga nkhabemo mtendere, nkhabemo kupuma; nyatwa zanga nkhabeve dzamala tayu.”