Read cisena YOBU 30 Bible Online

YOBU 30 - cisena bible

YOBU 30

¹“Mbwenye amuna ale mbana kuna ine, lero akundiyesa chinthu chakusenzekesa. Ababawo nee akhalive anthu amaso tayu mwakuti ine sidaatawirise tayu kuphedza anambwanga kulondali mabiranga.

²Ayi mphamvu za manjawo mbizidandiganyalisanji, podi mboko zawo zaamalira?

³Na thangwi yakuti iwo akhali anthu akutcherenga pyakwanga pontho anjala, iwo akhanyenyena mitsitsi ya miti m'thando yatchetcha.

⁴Iwo akhasaka mtambe na luni mbadya; mbaphatisa basa minyanya ninga nkhuni.

⁵Iwo akhathamangiswa pakati pa anthu, iwo akhachita kujomerwa ninga mbava.

⁶Iwo akhakhala m'maphompho, m'madzenje akukumbwa pansi, pontho kunkhwimba.

⁷Kutali m'tsanga iwo akhalira ninga nyama; iwo akhafinyizana pabodzi pamthunzi wa nyakhanche.

⁸Akhali anthu akupupwa, pontho a mbiri yakuipa. Iwo adathamangiswa m'dziko.

⁹“Lero anawo akundiimba nyimbo kundiseka; ine ndasanduka chinthu chakusekesa kuna iwo.

¹⁰Iwo ambandizonda mbandichalira; ambawanga mtima kundiphulira mata kunkhope.

¹¹Podi Mulungu athethesa utanga mbandichepesa, iwo nkhabe kundigopave tayu.

¹²Kukhundu yanga yamadyo dzinza imbandisosa; iwo ambateyera msampha manyalo anga, mbasasanya njira zakundivunga nazo.

¹³Iwo amala tchinga njiranga mbayesera pyakundivunga wakusowa na mbodzi ene kuakhondesa.

¹⁴Kudza kwawo khala ninga akupita na pafufu yakugumuka; pakati pa pyakufudzika iwo ambadza mwamphamvu kuna ine.

¹⁵Pyakugoswa pyandiphata pyakwanga pene; chilemedzo changa chambuluka na mphepo, pontho mfumanga yamala wayuka ninga makole.

¹⁶“Chinchino ine ndili nenene kufa; nsiku na nsiku nyatwa zili nane kakaidwe.

¹⁷Na mosiku magogodo anga ambandiswa pyakwanga, pontho mtswotswo umbandinyenyena ule nkhabe lekave tayu.

¹⁸Nguwo zanga zavinyizwa-vinyizwa thangwi ya utenda mwakuti ndashipwa pakhosi.

¹⁹Iye adandiponyera m'mathaphwinya; tenepo ndakhala ninga fumbi pontho dotha.

²⁰“Ine ndimbakuchemerani, imwe Mulungu, kwache imwe nkhabe kunditawira tayu; ine ndingapemphera, imwe nkhabe kupiikha konta tayu.

²¹Imwe mwandikalira mtima; dzanjanu ya mphamvu ikundisanyisa.

²²Mumbatawirisa kuti ndimbumbuluthwe na mphepo; mbamundibulumundisa m'chonzi chikulu.

²³Ndikupidziwa kuti mukundiendesa kuimfa, pontho kumbuto kunafuna dzaenda anthu onsene a moyo kule.

²⁴Ayi munthu wakuona nyatwa nkhabe dzaphedzwa pinathambidza iye dzanjache? Ayi iye nkhabe dzaverwa nsisi mu kusanyika kwache?

²⁵Ayi anthu akhali panyatwa ale, ine sidalire nawo tayu? Ayi anyakusowa pakuphata, ine sidave nawo nyambalo tayu?

²⁶Ndzidzi ukhadikhira ine udidi, pyakuipa ndiye pidadza m'mbuto mwache; ndzidzi ukhadikhira ine cheza m'mbuto mwache udadza ndi mdima.

²⁷Ndasanyika pikulu mumtima mwanga, pontho nkhabe puma, pontho nsiku na nsiku kwanga nkhubonera kwene basi.

²⁸Ndimbafamba-famba mwakutsukwala pontho wakusowa chithondozo. Ndimbaimira pamgumano wa anthu kupempha chiphedzo.

²⁹Ine ndasanduka shamwali wa mibinzi, pontho mwanzache dzidzi.

³⁰Khandanga yasanduka yakuswipa bii, pontho yamala suwika-suwika; manungo anga ali jerere kupisa na nyampwanda.

³¹Nyakatangale wanga asanduka wakulirisa maliro, pontho chitoliro changa chikutawirizana na anyakulira.