Read cisena YOBU 31 Bible Online

YOBU 31 - cisena bible

YOBU 31

¹“Ine ndadumbira pikulu pene kuti maso anga nkhabe dzayang'anave mtsikana mwakumsirira tayu.

²“Ayi chinthu chache ntchanji chandikoyera Mulungu? Ayi Nyamphamvu zonsene za kudzulu ambandisasanyira pinthu pyanji?

³Iye ambatumiza nyatwa kuna anthu akuipa, mbatumiza kuvungika kuna anyakuchita pyakudawika.

⁴Mulungu ambadziwa pyonsene pimbachita ine; mafambiro anga onsene iye ambaaikha maso.

⁵“Ndinadumbira kuti chipo sidachite chinthu chaufaka-faka tayu; chipo ine nee sidanyengeze munthu na mbodzi ene tayu.

⁶Mulungu mbandipime na mdida wakuona, tenepo iye anaona kukhonda dawa kwanga.

⁷Ngakhala ine ndabauka panjira yakuonadi, penu ndakwatika na pyakudawa, ngakhala manjanga aswipiswa na mathotho a pyakudawa,

⁸penepo mbewu zanga mbizivungike pyazo, pontho anthu anango mbadye pyawo phoso yalima ine ile.

⁹“Ngakhala ine ndidatunduka na mkazi, penu ndamyamira tsanthembanga kunja kwa msuwo wache,

¹⁰penepo mkazanga mbaphikire pyache amuna anango kudya, pontho mbagonwe pyache na amuna anango.

¹¹Kudawa ninga kweneku mbukudakhala kwakugoswa pyakwanga, kwathema kutchunyuswa pikulu pene.

¹²Mbapidakhala ninga moto wakuvunga mbudanyekesa pyonsene pina ine.

¹³“Ngakhala ndidapondereza anyabasanga achimuna penu achikazi, ndzidzi udadza iwo dzadungunya kuna ine,

¹⁴apo ndinachita tani ndingaonana naye Mulungu? Apo ndinalonganji iye angandivunza pya mseru wanga?

¹⁵Mulungu adandilenga ule, ngonthoyo adalengambo anyabasanga; Mulungu wache ngonthoyo adaumba tonsenefe m'mimba mwa amathu.

¹⁶“Ine chipo sidaleke kuphedza anyakutcherenga tayu, pontho amamfelwa sidaaleke kwene gwamwa tayu.

¹⁷Ana masiye sidaasiye kwene kumimba kadabwi na njala tayu uku ine ndili mimba nganganga kukhuta.

¹⁸Kutomera uwananga ine ndaaphedza ninga babawo, pontho moyo wanga onsene ndapereka uphungu wadidi kuna amamfelwa.

¹⁹“Ndingagumana munthu wakutcherengera chakuvala penu wakutcherenga pyakwanga mwakuti nkhabe chakufinika,

²⁰ine ndikhampasa nguwo yakusasanywa na ubweya wa bira wa pamkumbi wanga, penepo iye akhandisimba thangwi ya kukhumbirwa kudamchitisa ine kule.

²¹“Ngakhala ine ndidaphatisa fuwa ya moto mwana masiye mbandipidziwa kuti sinakonwa tayu m'thando ya miseru,

²²penepo mikono yanga mbigwandwe pyayo; mbikhwadzuke pyayo m'mapewa mwanga.

²³Na thangwi yakuti ndine munthu wakugopa kutchunyuswa kwa Mulungu, ine nkhabe chita chinthu ninga chenecho tayu.

²⁴“Ngakhala ine ndidaikha mtima pamfuma, penu kunyindira golidi,

²⁵penu kugaya na ufumi wanga, penu kutumbama na pinthu pidaphata ine na manjanga;

²⁶ngakhala ine ndidakwatika na dzuwa, pontho na kuyetima kumbachita iyo, penu mwezi thangwi ya kubalika kwachita iwo;

²⁷penu kubauswa kupembedza penepi, pakumpsompsona manjanga kuonesa chilemedzo kuna ipyo,

²⁸kudawa ninga kweneku kwathema kutchunyuswa pikulu pene; thangwi penepa nkhulonga kuti ndidakhonda Mulungu wa kudzulu.

²⁹“Ine ndimbadzadzadika mumtima nyamalwanga angasanyika, ine nkhabe kuva kukoma mumtima tayu iwo angaona nyatwa.

³⁰Chipo ine sidatawirise mulomo wanga kudawa tayu pakumtemberera kuti afe.

³¹Amuna onsene ambandiphatira basa ale, ambapidziwa kuti alendo onsene ndimbaakhutisa na nyama.

³²Ndikhachemera anyakufamba pyawo na njira kudza kumsuwo kwanga, mbindikhonda kualeka kugona m'nkhwerekwete mwa njira.

³³“Anthu anango ambayesa kubisa pyakudawa pyawo, mbwenye ine chipo sidabise pyakudawa pyanga tayu.

³⁴Ine sidagope kuti anthu analonganji tayu, ine sidakhale kwene mulomo phoo, penu kubindikira m'nyumba tayu, thangwi ya kundithuswa kwawo.

³⁵“Ayi, nkhabe munthu unango wakuvesera pinalonga inepi? Ndinadumbira kuti mafala onsene analonga inewa ngakuona. Nyamphamvu zonsene mbanditawire. “Mbapidakhala kuti mseru unandipambizira nyamalwanga walembwa, towera ine ndiuone,

³⁶ine mbidauvala pagangafuwa panga mwakunyadira, pontho kuuvala mumsolo mwanga ninga chipewu.

³⁷Mulungu mbidampanga pyonsene pyachita ine, mbindifika pamaso pache na chilemedzo ninga mumbachitirwa mfumu.

³⁸“Ngakhala ine ndidachita kuba munda unalima inewu, ngakhala ndidachita kuupokosera kuna mwenechiroache,

³⁹ngakhala ndidadya phoso yakulimwa mwenemo, mbandialeka na njala anyantchoche anga,

⁴⁰penepo m'mbuto mwa tirigu ntcheswa mbizimere pyazo, pontho m'mbuto mwa mapira dawe mbamere pyache.” Mafala a Yobu adamalira ponthopo.