Read cisena YOBU 32 Bible Online

YOBU 32 - cisena bible

YOBU 32

¹Na thangwi yakuti Yobu adakhutira napyo mumtima mwache kuti iye hadadawe tayu, amuna atatu ale adamuleka pyawo okhonda kumtawira.

²Mbwenye munthu unango wakuimira pyache ninga apo, dzinache Elihu, hadakwanise kuuphata mtima tayu, thangwi Yobu akhapilungamisa yekha ene kupiringana Mulungu. (Elihu akhali mwana Barakelo chidzukulu cha Buzi wa m'banja ya Ramu.)

³Iye adazhangalira pontho ashamwali ache Yobu, amuna atatu ale. Iwo hadagumane mafala akumtawira nawo Yobu tayu. Penepi pidachitisa Mulungu kuoneka ninga wakuphophonya.

⁴Na thangwi yakuti Elihu akhali wamng'onoletu pakati pawo, iye adadikhira kuti onsene ale amale longa.

⁵Pidaona iye kuti amuna atatu ale hadakwaniseve kumtawira Yobu tayu, iye adazhangali

⁶mbatoma kulonga mbati, “Ine ndine mwana, imwe ndimwe akulu-akulu, natenepo ndikhali na mantha kulonga kuna imwe manyerezero anga.

⁷Ine ndapinyerezera kuti akulu-akulu ndiye athema kulonga, kuti amuna amvula zakale ndiye athema kugawa nzeru.

⁸Kwache ndi Mzimu wa Mulungu muna munthu, ndi muya wa Nyamphamvu zonsene, ule ambaapasa nzeru.

⁹Si kukalamba tayu kumbamchitisa munthu kukhala na nzeru, si kubalwa kale tayu kumbamchitisa munthu kuvesa pinthu.

¹⁰Natenepo ndinafuna kuti imwe mundiveserembo, ine ndinati ndikupangenimbo manyerezero anga.

¹¹“Ine ndikhali fulike pikhalonga imwe, ndikhavesera mafalanu akuphata mtima, mbandidikhira pikhasaka-saka imwe mafala a nzeru.

¹²Ine ndikhavesera mwadidi mwene mbindiva kuchimwana kwanu kumtawira; imwe nee mwampokanya mwakumtsikimizira pinthu pyalonga iye tayu.

¹³Apo munakwanisa tani kulonga kuti nzeru mwazigumana? Mulungu ndiye athema kuchita naye mphoka Yobu nee munthu tayu.

¹⁴Yobu akhalonga na imwe nee na ine tayu, kwache ine sidatawire ninga mwachitira imwe tayu.

¹⁵“Yobu, iwo azunguzika mbasowa chakukutawira nacho; mafalawo aamalira.

¹⁶Apo ine ndithimize basi kudikhira uku iwo amatama pyawo mwenemo iwo akhala mulomo phoo kusowa chakulonga?

¹⁷Nkhabe, ndinati ndikutawire ndine ene, mbandikupanga pinanyerezera ine.

¹⁸M'kanwa mwanga mwadzala na mafala; mtimanga ukundikhakhamiza kuti ndilonge.

¹⁹Ngakhala ine sinagumana mwayi wakulonga tayu, ndinati nditumbuke ninga budu yanthembe yachinchino kudzala na vinyu.

²⁰Ine ndathema kulonga kuti ndilulupirwe, ndathema kufungula mulomo kutawira.

²¹Pamseru wenewu ine nkhabe tonga mwakuyang'ana nkhope, pontho sinakomesa munthu tayu.

²²Ine kukomesa munthu sinakudziwa tayu, pontho Mulungu ananditchunyusa kabodzi kene ngakhala ndinachita tenepo.