Read cisena YOBU 33 Bible Online

YOBU 33 - cisena bible

YOBU 33

¹“Tenepo, Yobu, vesera mafalanga; ikha khutu kuna pinafuna ine kulonga.

²Ndasasanyika kukutawira, ndinakupanga pili mumtima mwanga.

³Mafalanga onsene akutsikimizira kulungama kwanga, pontho pinalonga ine pikuonesa kuona mtima kwanga.

⁴Mzimu wa Mulungu ndiye andisasanya, muya wa Nyamphamvu zonsene ndiye umbandipasa moyo.

⁵“Apo nditawire ngakhala unakwanisa, pontho sasanyika kuchita nane mphoka.

⁶Iwe na ine ntchibodzi-bodzi pamaso pa Mulungu, tonsenefe tasasanywa na dongo.

⁷Natenepo leka kundigopa; ine nkhabe kukufitikiza tayu.

⁸“Mafalako apita m'makutu mwanga, pontho ndakuva ukulonga kuti;

⁹‘Ine sidadawe tayu; sidachite chinthu chakudawika tayu. Ndine munthu wangwiro, pontho wakusowa chakundipokanyisa.

¹⁰Kwache Mulungu ndiye andigumana na madawo. Iye akundiyesa ninga nyamalwache.

¹¹Iye andimanga matandadza, pontho makhaliro anga onsene ambaaona.’

¹²“Kwache ndikukupanga Yobu, kuti penepa iwe wadawa, thangwi Mulungu ngwamkulu kupiringana munthu.

¹³Thangwi yache ninji iwe ukuketesana na Mulungu kulonga kuti, ‘Iye nkhabe dzatawira mafalanga.’

¹⁴Mulungu ambalonga na njira zakusiyana-siyana, podi kwene kuti munthu nkhabe kupivesa pimbalonga iyepyo tayu.

¹⁵Na mosiku anthu angagona pabonde, mwenemo ali m'chitulo chakufa nacho, Mulungu ambalonga na munthu kundoto pontho kumasomphenya.

¹⁶Iye ambaachitisa kuvesera pinalonga iye, pontho ambaagoswa mbaacheuza,

¹⁷towera aleke pyakudawa pyawo, pontho abasikeletu kutumbama kwawo.

¹⁸Iye nkhabe dzaatawirisa kwenda kudziko ya anyakufa tayu; iye ambaapulumusa kuimfa.

¹⁹Mulungu ambasumulula munthu pakumdwazika, mbachitisa manungo ache kuti ave kupha,

²⁰towera kukhosi kwache kuswipe nee funa pyakudya tayu, podi pyakudyapyo pikhale pyapyo pyadidi pyakwanga.

²¹Manungo ache ambamala pakatika; magogodo ache akhabisika kale ale lero ali nkhong'o-nkhong'o.

²²Iye ali chifupi kwenda ku Chiphompho chikulu, pontho akutchithira kudziko ya anyakufa.

²³“Mwinango mbapadakhala mngelo dzamphedza, nyakumuikhira kunduli pakati pa angelo pikwi-pikwi, ule anadza dzalonga pya kulungama kwache,

²⁴mbalalika mwakumkomera mtima kuti, ‘Mpulumuseni kuti aleke bidira ku Chiphompho chikulu, ndamgumanira dombo kuti asudzulwe.’

²⁵Penepo manungo ache anasanduka akumyalala ninga a mwana, pontho mphamvu zache zinabwerera ninga mukhali iye mphale.

²⁶Iye angapemphera, Mulungu anava kupempha kwache, mbamtambira pamaso pache mwakukomerwa, mbamuyesa munthu wakulungama.

²⁷Iye analonga pakwecha kuti, ‘Ine ndadawa, sidachite chinthu chakulungama tayu, kwache Mulungu adandilekerera.

²⁸Iye andiombola kuti ndileke kwenda ku Chiphompho chikulu, pontho na lero ndikuona basi cheza cha dzuwa.’

²⁹“Mulungu ambachita pyonsene kuna munthu, iye ambapichita kawiri, penu mwakubwereza-bwereza,

³⁰kubweza moyo wache ku Chiphompho chikulu, towera aone cheza cha anyakukhala na moyo.

³¹“Natenepo, Yobu, vesera chinthu chinafuna ine kulonga, matama pontho undileke ndilonge.

³²Kwache ngakhala una chinthu kuti ulonge, nditawire, thangwi ndinapifuna kuti iwe uyeswe munthu wakulungama.

³³Mbwenye ngakhala iwe nkhabe chakulonga, matama mbundivesere, pontho ndikupange nzeru.”