Read cisena YOBU 34 Bible Online

YOBU 34 - cisena bible

YOBU 34

¹Kubuluka penepo Elihu adathimiza kulonga mbati,

²“Amunamwe, imwe ndimwe anzeru pontho akudziwa pinthu; ngavani kuno pinthu pinafuna ine kulonga.

³Imwe mumbadziwa kuti kudya uku nkhwadidi mungakulawa, kwache si tenepo tayu na mafala anzeru mungaava.

⁴Tipitonge tekha ene kuti chakulungama ntchipi; tendeni tipidziwe kuti chadidi ntchipi.

⁵Yobu akupilonga kuti, ‘Ndine munthu wakulungama, mbwenye Mulungu akukhonda kundichitira chilungamo.

⁶Podi kwene kuti ine ndine wakulungama, ndayeswa nyakunama; podi kwene kuti sidadawe tayu, matswimo andikuwaza pyakwanga.’

⁷“Chipo imwe mudzati kuonambo munthu ninga weneyu Yobu? Iye nkhabe lemedza Mulungu tayu.

⁸Iye basache nkhukhala phathi na anthu akuipa, mbafamba pabodzi na anthu akudawika.

⁹Iye ambalonga kuti kuchita pimbafuna Mulungu nkhabe kuganyalira munthu tayu.

¹⁰“Ngavani kuno imwe anthu akuvesa pinthu! Mulungu nkhabe chita chinthu chakuipa na pang'ono pene tayu, Nyamphamvu zonsene nkhabe dawa na pang'ono pene tayu.

¹¹Iye ambafupa anthu thangwi ya pinthu pyachita iwo, mbaatchunyusa mwakuthemerana na makhaliro awo.

¹²Ndimomwene Mulungu nkhabe chita chinthu chakuipa, Nyamphamvu zonsene chipo hadzati khala wakusowa chilungamo tayu.

¹³Ayi mphamvu za Mulungu zidabulukira kuna unango? Ayi adampasa utongi wa dziko yonsene ngunango?

¹⁴Mbipidakhala kuti Mulungu adapifuna kupokosera munthu mzimu na muyache wakupasa moyo,

¹⁵munthu onsene wa moyo mbadafa, kubwerera pontho kufumbi.

¹⁶“Ngakhala imwe ndimwe anzeru; tenepo ndivesereni pinalonga ine.

¹⁷Ayi imwe mukunyerezera kuti nyakuzonda chilungamo athema kutonga? Ayi imwe mukusumulula Mulungu, nyakulungama pontho nyamphamvu,

¹⁸ule ambalonga kuna mafumu kuti, ‘Ndimwe akusowa basa,’ pontho kuna atongi kuti, ‘Ndimwe akudawika?’

¹⁹Iye nkhabe tonga mseru atongi mwakuyang'ana nkhope tayu, penu kukoma mtima kuna anyamfuma kupiringana anyakutcherenga tayu, thangwi iye ndiye adalenga onsene uwiriawo.

²⁰Munthu anakwanisa kufa mwakututumusa na mosiku. Mulungu ambakhamwadza anthu mbaferatu. Iye ambapha anyamphamvu mwakukhonda bulusa kaluma.

²¹Maso ache ambakhala ponsene panaenda munthu; iye ambaona mafambiro ache onsene.

²²Nkhabe mbuto ya mdima, nkhabe mdima wa ndiwe ani, kule kunakwanisa kubisala nyakudawa.

²³Mulungu nkhabe funika kuikha ndzidzi tayu kuti anthu adze pamaso pache dzatongwa mseru.

²⁴Mwakukhonda vunza-vunza iye ambabulusa anyamphamvu pachidzo chawo, mbaikhapo anango m'mbuto mwawo.

²⁵Na thangwi yakuti iye ambadziwa mabasawo, iye ambaasosa na mosiku, tenepo iwo ambamala peyeka.

²⁶Iye ambaatchunyusa pakwecha thangwi ya pyakudawa pyawo,

²⁷thangwi iwo aleka kumtewera mbakhonda tsalakana matongero ache na abodzi ene,

²⁸mwakuti achitisa kulira kwa anyakutcherenga kufika kuna iye, tenepo iye adava kulira kwawo kufuna chiphedzo.

²⁹“Ngakhala Mulungu anakhala kwene mulomo phoo, mbani anakwanisa kumsumulula? Ngakhala iye anabisa nkhope yache mbani anakwanisa kumuona. Kwache Mulungu ali padzulu pa anthu na dziko ene,

³⁰towera akhondese munthu okhonda tsalakana pya iye kutonga, pontho kuti aleke teyera misampha anthu.

³¹“Tisangize munthu unango alonge kuna Mulungu kuti, ‘Ine ndatchunyuka, pontho sinadawave tayu.

³²Ndifunziseni pinthu pinakhonda ine kwanisa kuona; ngakhala ndachita pyakudawika, ine nkhabe dzapichitave tayu.’

³³Ayi Mulungu anakwanisa kukufupa na mafalakowa, mwenemo iwe ukukhonda kuleka pyakudawa pyako? Ndiwe wathema kusankhula nee ine tayu; natenepo ngandipange chinadziwa iwe.

³⁴“Amuna akuvesa pinthu ambalonga, amuna anzeru, ale ambandiva, ambalonga kuti,

³⁵‘Yobu akulonga kwene mwakusowa udziwisi, pontho pyonsene pinalonga iye nkhabe mphuno tayu.

³⁶Nyerezerani pyonsene pimbalonga Yobu; munakwanisa kuona kuti iye ambalonga ninga munthu wakuipa.

³⁷Padzulu pa pyonsenepi iye ambathimizapo kupandukira; pamaso pa ife tonsene iye ambaketesana na Mulungu.’ ”