Read cisena YOBU 35 Bible Online

YOBU 35 - cisena bible

YOBU 35

¹Kubuluka penepo Elihu adathimiza kulonga mbati,

²“Ukunyerezera, Yobu, kuti mphinthu pyamaso kulonga kuti ndiwe wakulungama pamaso pa Mulungu.

³Penu kumvunza Mulungu kuti, ‘Ayi pyakudawa pyanga pyasosanji? Ayi chaganyali ine ninji pakukhonda dawa?’

⁴Ine ndinati ndikutawire mivunzo yakoyi, iwe pabodzi pene na ashamwali akowa.

⁵“Yang'ana kuthambo mbuone; makole ali kudzulu pyakwanga kupiringana iwe!

⁶Ngakhala iwe unadawa, ayi penepyo nkhabe pinthu na Mulungu tayu? Ngakhala unachita umambala kazinji kene, ayi Mulungu nkhabe kuva napyo kupha tayu?

⁷Kukhala nyakulungama kumbamphedzanji Mulungu? Ayi chinakwanisa iye kutambira ninji kuna iwe?

⁸Ndi munthu mnzako ule ambasanyika thangwi ya kudawa kwako, pontho pyadidi pimbachita iwe pimbamphedza.

⁹“Anthu angaponderezwa, iwo ambabulira; iwo ambalira chiphedzo thangwi ya kuzunguzika kwa anyamphamvu.

¹⁰Kwache iwo hambazungunukira kuna Mulungu nyakualenga tayu, ule ambaapasa chidikhiro mosiku,

¹¹ule ambaachitisa kukhala anzeru, anzeru kupiringana nyama penu mbalame.

¹²Pimbalira iwo kufuna chiphedzo, Mulungu hambaatawira tayu, thangwi iwo ngakunyada pontho ngakuipa.

¹³Kuna Mulungu, kulira kwawo nkhupitcherengesa kwene pyawo; Nyamphamvu zonsene nkhabe kupiikha konta tayu.

¹⁴“Yobu, ukulonga kuti iwe nkhabe kwanisa kumuona Mulungu; kwache dikhira mwakuuphata mtima, mseru wako auva.

¹⁵Ayi iwe ukunyerezera kuti Mulungu nkhabe tchunyusa mwakuzhangali tayu, pontho kuti iye hambaikha maka konta tayu kuna pyakudawa?

¹⁶Iwe, Yobu, pinalonga iwe nkhabe mphuno, mafalako azinji mbapezi-pezi.”