Read cisena YOBU 36 Bible Online

YOBU 36 - cisena bible

YOBU 36

¹Elihu adathimiza kulonga mbati,

²“Fulika mbuvesere ndzidzi pang'ono; kuna pinthu pinafuna ine kulonga m'mbuto mwa Mulungupi.

³Nzeru zanga ndazikwata kutali pyakwanga; ndinati ndiziphatise basa kuonesa kuti nyakundilenga ngwakulungama.

⁴Papyonsene pinakupanga inepi, nkhabe chakunama tayu; munthu wanzeruletu ali pakati pako.

⁵“Mulungu ngwamphamvu pyakwanga; iye nkhabe lulupisa munthu tayu. Nkhabe chinthu na chibodzi chene chimbakhonda iye vesesa tayu.

⁶Iye nkhabe lekerera anyakudawa kuthimiza kukhala na moyo tayu, mbwenye ambachitira chilungamo anyakusanyiswa.

⁷Iye ambatchinjiriza anthu ale mbakulungama; mbaatawirisa kutonga ninga mafumu, pontho mbaalemedza kwenda na kwenda.

⁸Mbwenye ngakhala anthu amangwa na njema, na kusanyiswa thangwi ya pinthu pyachita iwo,

⁹Mulungu ambaonesesa pinthu pyachita iwo, kudawa na kutumbama kwawo.

¹⁰Iye ambaachitisa kuva kuasumulula kumbachita iye, mbaatonga kuleka pyakudawa pyawo.

¹¹Ngakhala iwo anavera Mulungu mbamtumikira, anakhala pamtendere m'moyo wawo onsene, pontho pinthu pyawo pyonsene pinaafambira mwadidi.

¹²Mbwenye ngakhala hanavera tayu anaphiwa na talasada, mbafa pyawo akusowa udziwisi.

¹³“Kuna anthu ale okhonda tsalakana Mulungu ambathimiza basi kukhala akuzhangali podi kwene kuti atchunyuswe, iwo nkhabe pemphera kuti aphedziwe tayu.

¹⁴Iwo ambafa mbali atete ene, pontho moyo wawo mbumala mwakuchitisa manyadzo.

¹⁵Kwache Mulungu ambapulumusa anthu kudzera mukusanyika, mbaphatisa basa nyatwa kufungula maso awo.

¹⁶“Mulungu akubulusa panyatwa, mbakuchitisa kukomerwa thangwi ya kukhala akutonthola; pyakudya pili mbwee pathebulu pako.

¹⁷Mbwenye lero ukutchunyuswa ninga mumbachitirwa anyakuipa; kutongwa mseru mwachilungamo kwakugwera.

¹⁸Chita mphole-mphole kuti uleke kwatika na mfuma, penu kunyengezwa pakuchita kudyekerwa.

¹⁹Ayi kulira kufuna chiphedzo kungachitise kuti nyatwa zimale? Mphamvu zanu zonsene nkhabe kukuphedzani tayu.

²⁰Leka khumba kuti mosiku udze; wenewo ndi ndzidzi unafuna dzavungwa madzinza.

²¹Chita mphole-mphole gopesera unazungunukira kuna pyakuipa, thangwi pyakuipa ndiye pidakudzesera kusanyika.

²²Kumbuka kukula kwachita mphamvu za Mulungu; iye ndi mfunzisi wamkulu kupiringana onsene.

²³Nkhabe na mbodzi ene anakwanisa kupanga Mulungu pyakuchita tayu, penu kumsumulula kuti achita pyakuipa tayu.

²⁴Iye ambakuzwa thangwi ya pinthu pimbachita iye; iwembo pontho wathema kumkuza na nyimbo.

²⁵Munthu onsene apiona pyachita iye; kwache iwo anakwanisa kupiona na pakansinzo.[33]

²⁶Mulungu ngwamkulu pyakwanga; ife nkhabe kwanisa kuvesa ukulu wache onsene tayu; munthu nkhabe kulengesa pyaka pyache tayu.

²⁷“Ndi Mulungu ule ambakwata madzi kubulukira pa dziko yapansi; mbaaphika kukhala madontho a mvula.

²⁸Iye ambavumbisa mvula kubulukira m'makole mbawazira pana anthu onsene.

²⁹Nkhabe na mbodzi ene ambadziwa mule mumbafambira makole, penu mule mumbadimira chiphaliwali m'nyumba mwache kudzulu.

³⁰Iye ambatumiza njazi kuthambo yonsene, pile pimbafika podi na pansi pa bara pene.

³¹Mwenemu ndiye mumbatonga iye madzinza mbaapasa phoso izinji.

³²Iye ambaphata njazi na manjache mbaitonga kuti igwe pambuto panafuna iye.

³³Kulira kwa chiphaliwali kumbalonga pya kudza kwa chonzi; podi na ng'ombe zene zimbadziwisa pya kudza kwayo.