Read cisena YOBU 37 Bible Online

YOBU 37 - cisena bible

YOBU 37

¹“Penepi pimbachitisa mtimanga kudima pikulu pene; mbupaluka na mantha.

²Veserani kubangula kunachita fala ya Mulungu, kuna kudima kwakubulukira m'kanwa mwache.

³Iye ambachitisa njazi kuchetuma kugwanda na kuthambo, kutomera kumadolomero a dziko kafika pontho kumadolomero a dziko.

⁴Penepo kutitima kwa falache kumbaveka ninga fala yachifumu, mwenemo ching'ani-ng'ani chikuchetuma.

⁵Na utongi wa Mulungu pinthu pyakudzudzumisa pimbachitika, pinthu pyakudodomesa pyakuti ife nkhabe kupivesa tayu.

⁶Iye ambatonga matalala kugwa padziko yapansi, mbatonga mvula kulikitika.

⁷Iye ambaimisa anthu kuphata mabasawo, mbaaonesa pinthu pinakwanisa iye kuchita.[34]

⁸Nyama zam'tsanga zimbabisala mbizienda kumadzimba kwawo.

⁹Chivumbulu chimbadza kubulukira kumbuto yache, pontho mphepo yakutonthola imbadza kubulukira kumpoto.

¹⁰Muya wa Mulungu umbachitisa madzi kutonthola, mbachitisa nyanza kuphatana ninga mwala.

¹¹Iye ambadzaza makole akuswipa na madzi; njazi imbachetuma kubulukira m'makole.

¹²Iwo ambafamba-famba na kutongwa kwa Mulungu. Iwo ambachita pyonsene pimbaatonga Mulungu, konsene kwene padziko yapansi.

¹³Mulungu ambavumbisa mvula kuthirira dziko yapansi; iye ambakwanisa kuitumiza towera atchunyuse nayo anthu, penu kuonesa kukoma kwache mtima.

¹⁴“Dikhira pang'ono Yobu, mbundivesere; nyerezera pinthu pyakudodomesa pimbachita Mulungu.

¹⁵Ayi iwe ukudziwa mule mumbaperekera Mulungu matongero ache, mbachitisa njazi kuchetuma kubulukira m'makole?

¹⁶Ayi iwe ukupidziwa mule mumbabelukira makole kuthambo, basache yakudodomesa yakuphatwa mwaluso pyakwanga?

¹⁷Nkhabe, iwe umbava kupisa pyakwanga, mwenemo mphepo yakumwera ikusanyisa dziko.

¹⁸Ayi imwe munakwanisa kumphedza Mulungu kufuthula thambo, na kuichitisa kukhala yakuwanga ninga gilazi?

¹⁹Tifunzise chakuti tilonge kuna Mulungu; ife nkhabe chakuti tilonge thangwi takhala mumdima.

²⁰Ayi ndinakwanisa kupempha Mulungu kuti ndilonge; thangwi yache ninji kuti ndimpase mwayi wakundivunga nawo?

²¹“Tenepo chinchino munthu nkhabe kwanisa kuyang'ana dzuwa thangwi kuyetima kwache nkhwamphamvu pyakwanga, mwenemo makole amala tswairwa mwadidi mwene na mphepo.

²²Kubulukira kumpoto kuyetima kukulu kukuoneka, pontho demelero ya Mulungu njakugopeka pyakwanga.

²³Nyamphamvu zonsene ngwamkulu pyakwanga mwakuti ife nkhabe kumfikira chifupi tayu. Iye ngwakulungama pontho wachilungamo pakuchita pinthu na anthu.

²⁴Ndi thangwi yache munthu onsene ambamgopa; iye ambakhonda anyakupiyesa okha ene anzeru ale.”