Read cisena YOBU 38 Bible Online

YOBU 38 - cisena bible

YOBU 38

¹Kubulukira m'chivumbulu MBUYA adalonga kuna Yobu.

²Ndiwe ani iwe kuti udzudzumise uphungu wanga na mafalako akusowa nzeru pontho apezi-peziwo?

³Imira dzololo khala ninga ndiwedi mamuna; unditawire mivunzo inakuvunza ineyi?

⁴Ayi iwe ukhalipo pikhaikha ine maziko a dziko yapansi? Ngakhala unadziwadi pinthu, ngandipange.

⁵Mbani adalemba madire a dzikoyo? Mbani adaipima na nkhambala? Ayi mivunzo yonseneyi kutawira kwache ukukudziwa iwe?

⁶Ayi ninji chimbaphatisa mizati[35] ya dziko yapansi? Mbani adaikha mwala wa pankhomo wa dziko yapansi,

⁷ndzidzi ukhaimba nthanda pabodzi pene na nyenyezi zinango, pontho pikhakhuwa angelo[36] mwakukomerwa?

⁸Mbani adafunga msuwo kuti bara ileke kuka,[37] ingatumbuka kubulukira m'mimba mwa dziko yapansi?

⁹Ndine ndidagudumira bara na makole mbandiiunyiza mumdima.

¹⁰Ndidaikha madire a bara mbandifungira misuwo na mphinga.

¹¹Ine ndidaitonga kuti, “Basi wakwana, leka kwenda kutali! Mabimbi ako amphamvuwo mbamalire pano.”

¹²Ayi Yobu ilipombo nsiku pa moyo wako onsene idatonga iwe kuti masikati asanduke makalakwecha?

¹³Ayi ilipombo nsiku idatonga iwe makalakwecha kumwinikira dziko yapansi, mbusokolosa anyakudawa m'mbuto zidabisala iwo?

¹⁴Masikati ambachitisa mapiri na maphedi kuonekera ninga nguwo zakufunya-funya, yakudindika mwadidi ninga chidindo chakudindwa padongo.

¹⁵Anyakudawika akukhonda cheza chawo, pontho mkono wawo wamphamvu wakhumuka.

¹⁶“Ayi chipo hudzati manga ulendo kwenda kumphuno za madzi a m'bara penu kufamba pansi pa madzi a m'bara?

¹⁷Ayi chipo iwe udatoma kuoneswa misuwo ya kuimfa? Ayi chipo iwe udatoma kuona misuwo ya kumbuto ya mdima?

¹⁸Ayi unakwanisa kunyerezera kuti dziko yeneyi yakula tani? Nganditawire ngakhala ukupidziwadi.

¹⁹“Njirache imbabulukira cheza njipi? Apo nkhupi kumbakhala mdima?

²⁰Apo iwe unakwanisa kupikwata kwenda napyo kumbuto zawo? Ayi njira zakwendera kumbakhala ipyo unazidziwa iwe?

²¹Ndimomwene, unakwanisa kupidziwa thangwi ndiwe nkhalamba, pontho kuti ukhali penepo mukhasasanywa dziko yapansi!

²²“Ayi hudzati fikako kumasubi kule kumbakoyerwa kutonthola, penu kuona masubi ambakoyerwa matalala?

²³Ndimbapikoya penepi kusasanyikira ndzidzi wa nyatwa, pontho nsiku zakumenyana pontho nkhondo.

²⁴Ayi hudzati fikako iwe kule kumbabulukira dzuwa penu kule kumbabulukira mphepo ya mbalu?

²⁵“Mbani adakumba mgelo wakuvumbisa mvula mbachenesa njira ya chiphaliwali?

²⁶Mbani ambachitisa mvula kuvumba kuthando yatchetcha, kumbuto kule nkhabe khala anthu tayu?

²⁷Mbani ambathirira thando yatchetcha, towera maudzu amere?

²⁸Ayi mvula imbakhalambo na baba? Ayi babache bume mbani?

²⁹Apo mache madzi akuphatana mbani, pontho mbani adabala mainja?

³⁰Ngule ambasanduza madzi kukhala ninga mwala, pontho kuchitisa madzi kuphatana pabara?

³¹“Ayi iwe unakwanisa kumanga gulu ya mteme ndikutemembo, penu kusudzula nkhambala za mkazi mwezi?

³²Ayi iwe unakwanisa kubulusa atsikana akugwa mago pandzidzi wache wakuthema, na kutsogolera khwasa na gulu yache ya nyenyezi?

³³Ayi mwambo umbaphatiswa basa kuthambo umbaudziwa, pontho unakwanisa iwe kuuchitisa kuti uphatembo basa pansi pano?

³⁴“Ayi iwe unakwanisa kukhuwira makole, mbuachitisa kubira m'mabimbi a madzi?

³⁵Ayi iwe unakwanisa kutonga njazi kuti ichetume, ayi iyo inakwanisa kudza kuna iwe kulonga kuti, ‘Ndasasanyika?’

³⁶Mbani ambatonga makole, pontho kupereka uphungu kuna mvula?

³⁷Mbani ana nzeru zakulengesa nazo makole? Mbani anakwanisa kuboma pitomba pyakudzulu

³⁸kusanduza fumbi kukhala matope, pontho kuchitisa mataka kukhala madongolomwa?

³⁹“Ayi iwe umbakhulisa kuphera nyama nkhalamu ikazi, mbukhutisa ana a nkhalamu,

⁴⁰zinganjunja m'madzimba mwawo, penu kubisalira chinthu chinango pathenthere?

⁴¹Mbani ambapereka pyakudya kuna makhungubwe anawo angalira na njala kulirira Mulungu, mbadzedzereka thangwi ya kusowa pyakudya?”