Read cisena YOBU 39 Bible Online

YOBU 39 - cisena bible

YOBU 39

¹“Ayi iwe umbadziwa ndzidzi umbateya mbala? Apo udatoma kuona panateya nyasa?

²Ayi umbalengesa miyezi yache imbakhala iyo na bele kufikirana kuteya; ndzidzi umbabala izo ana umbaudziwa?

³Iwo ambanjunja mbabala ana; mtswotswo wawo wakubala umbamala.

⁴Anawo ambakhala akujintcha mbakula mwamphamvu m'tsangamo; iwo ambabuluka penepo mbakhonda bwerera pontho.

⁵Mbani ambatawirisa bulu wam'tsanga kwenda pyache? Mbani ambasudzula nkhambala zache?

⁶Ine ndidampasa thando yatchetcha kukhala nyumbache, pontho maphedi amunyu ninga mbuto yache.

⁷Iye nkhabe komerwa na chimpiningu cha muluwani. Iye hambava kukhuwa kwa anyakufambisa pingolo tayu.

⁸Iye ambafamba-famba paphiri kusaka maudzu kuti adye, mbasaka-saka chinthu chonsene chakubiriwira.

⁹“Ayi nyati inatawira kukutumikira? Ayi na mosiku iyo inakhala m'khola mwako?

¹⁰Ayi iwe unakwanisa kumanga nyati na bande kuti ilime, penu kuichitisa kuti ikweye phaza kutipula m'munda mwako?

¹¹Ayi iwe unakwanisa kumnyindira thangwi ya mphamvu zache zikulu? Ayi unakwanisa kumsiyira mabasako onsene amphamvu?

¹²Ayi unakwanisa kumkhulupira kuti anakudzesera mapira, penu kuatuta kwenda nawo pambuwa?

¹³“Maphaphido a mphuwani ambafuthuka mwakukomerwa pyakwanga, kwache iye nkhabe mbuluka tayu ninga mumbachitira chidokowe?

¹⁴Mphuwani imbateya mazayi ache pamataka, towera mazayiwo apisirwe na m'bebebe wa mataka ule.

¹⁵Iye nkhabe dzindikira tayu kuti mazayiwo anakwanisa kupondedzwa, penu nyama za m'tsanga zinaabwededza.

¹⁶Iye ambachita ninga anawo si ache tayu, pontho hakupiikha konta tayu kuti mphamvu zache zamalira papezi,

¹⁷thangwi Mulungu adamchitisa kukhala pupwe, mbammana nzeru.

¹⁸Kwache angatoma kuthamanga, anakwanisa kuseka kavalo na nyakumpakirache.

¹⁹“Ayi ndiwe Yobu udapasa akavalo mphamvu, pontho kuachitisa kukhala na chinjerere kumsana?

²⁰Ayi udaachitisa ndiwe kunumpha ninga nyadzombe, mbathuswa anthu na kulira kwawo?

²¹Mwakukomerwa akavalo ambanumpha-numpha m'phedi; iwo ambathamangira kunkhondo na mphamvu zawo.

²²Iwo nkhabe dziwa kuti mantha ninji, pontho nkhabe talasada inakwanisa kuabweza tayu.

²³Matswimo athukula anyakuapakira ambalira; dipa na momba pimbayetimira na dzuwa.

²⁴Kutetemera thangwi ya kukomerwa, akavalo ambathamanga; ngoma ingalira iwo nkhabe kwanisa kuimira kwene tayu.

²⁵Ndzidzi onsene unalizwa ngoma, iwo ambafwentha. Iwo ambava khwema ya nkhondo mbadzati fika chifupi, mbava mathubu na anyankhondo akukhuwa.

²⁶Ayi nyakasenera adafunziswa na iwe kumbuluka angafuthula maphaphido ache kuyang'ana kumwera.

²⁷Apo mphamba umbadikhira iwe kuti umtonge kumbuluka padzululetu, pontho kumanga chisa chache pansonga ya phiri?

²⁸Iye ambamanga nyumbache pamiyala, miyala yakusongoka mbikhala mbuto yache yakupata.

²⁹Kubulukira penepo ambaona kutali pyakwanga, kusaka-saka nyama

³⁰kuti anawo aswute chiropa cha nyamayo; konsene kwene kuna chinthu chakufa iye ambakhala kweneko.”